Kitaj najmaje zachodnich tyktokieraŭ za sotni tysiač dalaraŭ dla palapšeńnia svajho imidžu pierad Alimpijadaj
Armija upłyvovych zachodnich błohieraŭ, u kožnaha ź jakich sotni tysiač padpisčykaŭ u TikTok, Instagram abo Twitch, budzie raspaŭsiudžvać pazityŭnyja historyi pra Kitai padčas zimovych Alimpijskich hulniaŭ u nastupnym miesiacy.
Zaniepakojeny niehatyŭnaj reakcyjaj śvietu na Piekinskija hulni na fonie chvali dypłamatyčnych bajkotaŭ, urad Kitaja naniaŭ zachodnich śpiecyjalistaŭ pa suviaziach z hramadskaściu dla stvareńnia i raspaŭsiudžvańnia alternatyŭnaha vobrazu krainy praz sacyjalnyja sietki, piša The Guardian.
U listapadzie, kali Džo Bajden abdumvaŭ dypłamatyčny bajkot, Vipinder Džasvał, amierykanski žurnalist Newsweek i były vykanaŭčy dyrektar Fox News i HSBC, padpisaŭ kantrakt na 300 000 dalaraŭ z Hienieralnym konsulstvam Kitaja ŭ Ńju-Jorku na «raspracoŭku stratehii i praviadzieńnie» kampanii ŭpłyvu, jakaja budzie prasoŭvać u Štatach zimovyja Alimpijskija i Paralimpijskija hulni ŭ Piekinie.
U kantrakcie, jaki byŭ zarehistravany ŭ Ministerstvie justycyi ZŠA, vykładziena padrabiaznaja stratehija rekłamnaj kampanii. Pavodle pahadnieńnia, u pieryjad z 22 listapada pa 13 sakavika, kali skončacca zimovyja Paralimpijskija hulni, kožnamu błohieru treba padrychtavać ad troch da piaci pastoŭ, raspracavanych z ulikam metavaj aŭdytoryi. Džasvał śćviardžaje, što jaho kampanija atrymała da 50 prapanoŭ ad influensieraŭ — ad byłych alimpijcaŭ da pradprymalnikaŭ.
U kantrakcie havorycca, što 70% kantentu budzie źviazana z kulturaj: historyjaj Piekina, kulturnymi relikvijami, sučasnym žyćciom ludziej i novymi tendencyjami. Jašče 20% buduć padkreślivać «supracoŭnictva i lubyja dobryja rečy ŭ kitajska-amierykanskich adnosinach», u tym liku dvuchbakovyja źmieny na vysokim uzroŭni i stanoŭčyja vyniki.
Džasvał, jaki naradziŭsia ŭ Vialikabrytanii, atrymaŭ 210 000 dalaraŭ nieŭzabavie paśla taho, jak kantrakt byŭ zaklučany z kitajskimi dypłamatami, paviedamiŭ jon The Observer. Jon paabiacaŭ Piekinu, što jaho błohiery pryniasuć prykładna 3 miljony pakazaŭ u sacyjalnych sietkach, jakija časta vykarystoŭvajucca maładymi amierykancami.
Pry hetym žurnalist paćvierdziŭ, što jon u kursie pytańniaŭ, jakija vyklikaje palityka Kitaja ŭ Sińczianie i Hankonhu, ale «toje, što my sprabujem zrabić, — heta prosta padkreślić sumlennaść i hodnaść Alimpijskich hulniaŭ», — skazaŭ jon. «Bajkoty nie spryjajuć parazumieńniu… Ja nie padtrymlivaju bajkotaŭ. Jany nieefiektyŭnyja, niedarečnyja i nieistotnyja».
Piekinski kantrakt Džasvała vyklikaŭ krytyku ŭ ZŠA. Sienatar-respublikaniec Ryk Skot u liście kiraŭnictvu Newsweek zaklikaŭ «pierahledzieć svaje stasunki ź Vipam Džasvałam».
U minułym miesiacy Bajden abviaściŭ, što jaho administracyja zładzić dypłamatyčny bajkot zimovych Alimpijskich hulniaŭ u znak niazhody z tym, jak kitajski ŭrad abychodzicca ź ludźmi ŭ Sińczian-Ujhurskim rehijonie. Niekalki sajuźnikaŭ ZŠA, uklučajučy Vialikabrytaniju i Aŭstraliju, dałučylisia da zaklikaŭ nie pasyłać svaich čynoŭnikaŭ u Kitaj.
U svaju čarhu kitajski ŭrad admaŭlaje abvinavačańni ŭ parušeńniach pravoŭ čałavieka na svajoj terytoryi.
Kitaj — tatalitarnaja dyktatura, usia ŭłada ŭ krainie naležyć Kamunistyčnaj partyi, ludzi nie vybirajuć ułady svabodna.
Kamientary