Ekśpiert pra pasłańnie Łukašenki: «Jon napałochaŭ navat svaich prychilnikaŭ»
Bolš za try hadziny Łukašenka vystupaŭ z pramovaj i adkazvaŭ na pytańni padčas svajho pasłańnia da naroda i Nacyjanalnaha schodu. Ale ž što važnaha jon skazaŭ? Na što treba było źviarnuć asablivuju ŭvahu?
Razvažaje palitołah Valer Karbalevič:
«Hałoŭny sens pasłańnia byŭ taki — dakazać, što kraina viartajecca ŭ narmalny stan, dakazać, što sam Łukašenka lehitymny prezident i całkam kantraluje situacyju ŭ Biełarusi. Ale źmiest pasłańnia abvierh heta.
Kali ŭdumacca ŭ toje, što kazaŭ Łukašenka, to heta faktyčna pryznańnie taho, što Biełaruś akazałasia ŭ situacyi vostraha ŭnutranaha i vonkavaha kryzisu i heta nadoŭha.
Viartańnie da situacyi, jakaja była pierad prezidenckimi vybarami, niemahčymaje — ja maju na ŭvazie tuju samuju stabilnaść. Bo kancept stabilnaści ciaham 25 hadoŭ byŭ hałoŭnym, maŭlaŭ, kraina i nie vielmi bahataja, ale stabilnaja, biez kanfliktaŭ, u biaśpiecy.
A ciapier Biełaruś jakraz pieratvaryłasia ŭ niestabilnuju krainu: unutrany kryzis, kanflikt z susiedziami… Kraina ŭstupiła ŭ epochu destabilizacyi. Sam jon vinavacić Zachad, ale tut navat niavažna, chto vinavaty. Hałoŭnaje — usio, epocha stabilnaści skončyłasia.
Svaimi słovami pra vajnu Łukašenka napałochaŭ navat svaich prychilnikaŭ. Zadavała ž pytańnie žančyna, cikaviłasia, ci pryjdziecca joj adpraŭlać synoŭ na vajnu. I Łukašenku pryjšłosia abviarhać, zapeŭnivać, što nie budzie vajny».
Taksama Karbalevič miarkuje, što represii buduć praciahvacca, nie varta čakać adlihi.
«Dziejańni pa baraćbie z apanientami nie spyniajucca ni pierad čym, — kaža palitołah. — Była ž zajava pra toje, što navat kali ludzi viernucca z-za miažy i pakajucca, to im pryjdziecca ŭsio roŭna sieści ŭ turmu, i vyznačać, chto siadzie, budzie Azaronak.
Značyć, represii buduć mieć piermanientny charaktar i nie varta spadziavacca, što paśla refierendumu moža niešta ŭ hetym płanie źmianicca. Represii praciahnucca ŭ tych ža maštabach, pakul budzie isnavać hety režym.
Što tyčycca PVT, ajcišnikaŭ, biznesu, to bačym takuju pazicyju: luby siektar ekanomiki, navat samy prybytkovy, jaki budzie pahražać jaho ŭładzie, prosta likvidujuć. Zachavać uładu — hałoŭnaje, ekanomika na druhim płanie. Jak bačycie, supracoŭniki PVT, akazvajecca, pratestavali suprać jaho, adpaviedna, treba niejak reahavać».
Hałoŭnaja vysnova — sproba zapeŭnić hramadstva, što kraina viartajecca ŭ stan spakoju, faktyčna nie ŭdałasia, padkreślivaje Valer Karbalevič.
«Łukašenka sprabavaŭ heta danieści, ale ž sam heta abvierh šmat jakimi tezisami. Kali jon pytajecca ŭ biełarusaŭ, ci hatovyja jany płacić za niezaležnaść, to značyć jość pahroza hetaj niezaležnaści. I tady ŭźnikaje pytańnie: a jaki ž tady vynik 28-hadovaha kiravańnia Łukašenkam?
Atrymlivajecca, hetyja hady prajšli darma, kali jość pahroza niezaležnaści. Heta važny vynik, bo faktyčna sam Łukašenka hetym pryznaje, što budavaŭ niešta nie toje. U našych susiedziaŭ takoj pahrozy niama — a ŭ Biełarusi čamuści jana ŭźnikaje», — adznačyŭ ekśpiert.
Čytajcie taksama: «Ci hatovyja vy płacić?» Pra što kazaŭ Łukašenka ŭ Pasłańni narodu — sabrali hałoŭnaje
-
U čym roźnica pamiž Trampam u Iranie i Pucinym va Ukrainie
-
Režym Łukašenki časova stanie mienš ahresiŭnym da susiedziaŭ, ale stratehična budzie imknucca da avałodańnia atamnaj zbrojaj
-
«Znajšli krajniaha», a «pastaviać sałdafona jakoha-niebudź». U sacsietkach adreahavali na zvalnieńnie kiraŭnika «Minsktransa»
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi8
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary