U Homieli rasijskaja delehacyja čakaje pieramovaŭ z Ukrainaj: čamu heta prosta pakazucha

Uznačalvaje delehacyju niečakana Uładzimir Miadzinski. Jon zajmaje pasadu pamočnika prezidenta Rasii. Miadzinski — były ministr kultury, viadomy tym, što pahražaŭ piekłam ludziam, jakija nie vierać u podźvih panfiłaŭcaŭ. Taksama doktarskuju pracu historyka Miadzinskaha aceńvali naŭprost jak «nienavukovuju i absurdnuju».

Taksama ŭ skład delehacyi ŭvachodziać namieśniki ministraŭ abarony i zamiežnych spraŭ Rasii, pasoł Rasii ŭ Biełarusi Hryzłoŭ, kiraŭnik mižnarodnaha kamiteta Dziarždumy Rasii.

Miadzinski zajaviŭ, što inicyjatyvu pravieści pieramovy vykazała Ukraina, Rasija pahadziłasia i prapanavała Minsk. Ukrainski bok prapanoŭvaŭ inšyja harady, ale nibyta «znajšli kampramis, pa prapanovie ukrainskaha boku my pahadzilisia pravieści pieramovy ŭ Homieli». 

27 lutaha Ukraina paćvierdziła: Homiel sapraŭdy abmiarkoŭvaŭsia, ale Rasija vysunuła ŭmovy, što spačatku ukraincy musiać skłaści zbroju. Paśla čaho rasijskija pieramoŭniki «adrazu atrymali prapanovu adpravicca za «russkim vojennym korablom», paviedamiŭ pres-sakratar Zialenskaha Nikifaraŭ. Jon padkreśliŭ: Ukraina hatovaja da pieramovaŭ na niejtralnaj terytoryi i biez papiarednich umoŭ.

Čakać ukrainski bok u Homieli rasijskaja delehacyja źbirajecca da 15.00 pa Minsku. Paśla, skazaŭ Miadzinski, «usia adkaznaść za krovapralićcie budzie na ukrainskim baku».

Toje, što hetaje čakańnie pieramovaŭ — prosta pryhožaja karcinka dla prapahandysckich ŚMI, razumiejuć i ŭ samoj Rasii. 

«Jakaść i skład delehacyi śviedčać pra niežadańnie Rasii razmaŭlać da zaviaršeńnia «śpiecyjalnaj apieracyi», to-bok ŭstanaŭleńnia łajalnaha ŭrada ŭ Kijevie», — napisaŭ u svaim kanale Alaksiej Vieniadziktaŭ, hałoŭny redaktar «Echa Moskvy» i blizki siabar pucinskaha pres-sakratara Piaskova.

Što skazaŭ Łukašenka pra pieramovy?

«Biedny Pucin. To prapanujuć, to nazad adstupajuć. Mnie jaho, ščyra kažučy, škada. Učora ja jaho tak pierakonvaŭ, kažu: «Słuchaj, treba pajechać». «Dy nie pajeduć jany». Kažu: «Nu, nie pajeduć — heta ich budzie vybar». Tak i atrymałasia. Nu jak ź imi razmaŭlać [ukrainskimi ŭładami]? Učora paabiacali, što pryjeduć. Jon samalot pasyłaje z delehacyjaj, my viaziom ich u Homiel. Jany admaŭlajucca, kali heta nie fejk.

Vy dumajecie, heta Vałodzia Zialenski pryniaŭ rašeńnie? Dy nie, jon ahučyŭ jaho. Ci chtości ahučyŭ. Nie daduć jamu, nie daduć! Kali jon dzieści tuzaniecca, vykinuć z bunkiera i budzie stajać kala RSZA na praśpiekcie Pieramožcaŭ u Kijevie. Voś usio. Voś ich palityka. Heta ich vybar. Darma, vielmi darma!»

Čytajcie jašče:

Łukašenka paćvierdziŭ, što z terytoryi Biełarusi zapuskalisia rakiety pa Ukrainie

• 0
• 0
• 0
• 0
• 0
• 0
• 0
• 0