«Biazdarnaje kiraŭnictva i niedaacenka ŭkrainskaj dziaržavy». Čamu rasijskija vojski niasuć takija vialikija straty
Adna z samych sprečnych ličbaŭ hetaj vajny — kolkaść achviar rasijskaha boku. Ukrainskija ŭłady kažuć pra toje, što rasijskaja armija straciła bolš za 12 tysiač čałaviek zabitymi, paranienymi i pałonnymi. Maskva ž tolki adzin raz za dva tydni z pačatku vajny paviedamiła pra svaje straty: rasijskaje Minabarony naličyła 498 zahinułych sałdat. Jakija ličby bližejšyja da praŭdy?
Spačatku adznačym: va ŭmovach vajny dakładna vyśvietlić kolkaść strat niemahčyma. Pryviadziom roznyja acenki rasijskich strat, na padstavie jakich možna zrazumieć, jakija ž ličby bolš vierahodnyja.
Kiraŭnik Raźviedvalnaha ŭpraŭleńnia Minabarony ZŠA abviaściŭ 8 sakavika, što, pa mierkavańni amierykanskich analitykaŭ, straty rasijan mohuć skłaści ad 2 da 4 tysiač vajskoŭcaŭ. U toj ža čas straty ZŠA za ŭsie 20 hadoŭ vajny ŭ Afhanistanie — heta 2461 čałaviek.
Takija maštabnyja straty — pakazčyk taho, nakolki vialikuju škodu rasijskaj armii naniesła ŭkrainskaje vojska. Ukraincy supraciŭlajucca zachopnikam va ŭmovach, kali Kreml bambić jak vajennyja, tak i hramadzianskija abjekty pa ŭsioj krainie.
Ben Uoles, brytanski ministr abarony, taksama vykazaŭ svajo staŭleńnie da ličbaŭ strat rasijan. Čynoŭnik udakładniŭ, što jon nie moža paćvierdzić ličbu ŭ bolš za 11 tysiač zahinułych, ale pry hetym rasijskaja armija — dakładna toj bok kanflikta, jaki panios padčas hetaj vajny samyja vialikija straty.
Uoles taksama pieraličvaje pryčyny takoha stanovišča: drennaje kiraŭnictva ŭ rasijskaj armii, drennaje płanavańnie i zabieśpiačeńnie armii, a taksama samaŭpeŭnienaść rasijskaha kiraŭnictva, što niedaacaniła siłu ŭkrainskaj dziaržavy i armii i patryjatyzm ukrainskaha naroda.
Brytanski vajenny analityk Nik Rejnalds — adzin z tych, chto schilajecca da taho, kab ličyć kolkaść achviar u rasijskim vojsku davoli maštabnym. Ličbu ŭ 498 zahinułych, jakuju pradstaviła Maskva, Rejnalds nazyvaje «nierealistyčna małoj», a ličby ŭkraincaŭ pra tysiačy zahinułych ličyć «vysokimi, ale nie niemahčymymi».
Varta adznačyć, što ličba strataŭ rasijskaj armii, jakuju ahučvajuć ukrainskija ŭłady, uklučaje ŭ siabie i zabitych, i paranienych, i pałonnych sałdat.
U minułych rasijskich vojnach infarmacyja pra straty rabiłasia viadomaj praź siemji sałdat, bo rodnyja sprabavali daviedacca pra ich los. Časam jany ničoha nie viedali pra svaich rodnych da taho momantu, pakul nie atrymoŭvali ich cieły dla pachavańnia.
Takim čynam, analityki schilajucca da dumki, što sapraŭdnaja kolkaść achviar siarod rasijskich vajskoŭcaŭ značna pieravyšaje aficyjnyja ličby Maskvy. Kali rasijskaje hramadstva atrymaje hetyja źviestki, jany dakładna paŭpłyvajuć na nastroi ŭ krainie.
Ale da taho momantu, kali dakładnaja infarmacyja trapić da bolšaści rasijan, moža prajści vielmi šmat času. U krainie zastałosia zusim mała niezaležnych miedyja, i tyja ciapier znachodziacca pad vialikim ciskam. Dostup da sacsietak, jašče adnoj krynicy infarmacyi, u Rasii taksama vielmi chutka abmiažoŭvajecca.
«Jon vielmi Pucina lubiŭ». Što kaža žonka rasijskaha vajskoŭca, jaki zahinuŭ va Ukrainie
«My dakładna razumieli, što nie vyžyviem». Biełaruski dobraachvotnik Dzianis «Kit» raskazaŭ pra piekła pad Bučaj
Kubań, Tatarstan, Samara, Nižnievartaŭsk — pa ŭsioj Rasii chavajuć zahinułych va Ukrainie vajskoŭcaŭ
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary