Chutka pačnuć sudzić padpałkoŭnika KDB, jaki pieradavaŭ telehram-kanałam «sakretnuju» infarmacyju
Na telekanale ANT u sakaviku minułaha hoda pakazali film «Apieracyja KDB «Mankurty», u jakim paviedamili pra zatrymańnie padpałkoŭnika KDB Alaksieja Chrałoviča. Ciapier jaho buduć sudzić za «zdradu dziaržavie», paviedamlajuć pravaabaroncy.
Hod tamu ŭ tym siužecie paviedamlałasia, što Chrałoviča vinavaciać u «zdradzie dziaržavie».
Ciapier stała viadoma, što jaho sapraŭdy abvinavačvajuć pa č. 2 art. 356 Kryminalnaha kodeksa (zdrada dziaržavie, ździejśnienaja słužbovaj asobaj, jakaja zajmaje adkaznaje stanovišča, ci asobaj, na jakuju raspaŭsiudžvajecca status vajskoŭca).
Padpałkoŭniku pahražaje ad 10 da 20 hadoŭ pazbaŭleńnia voli.
Zhodna ź filmam, Chrałovič mieŭ dačynieńnie da pieradačy Ściapanu Puciłu ŭ listapadzie 2020 aŭdyjarazmovaŭ pres-sakratarki Łukašenki Natalli Ejsmant z roznymi słužbovymi asobami. Mienavita ŭ hetych aŭdyja havaryłasia pra abstaviny hibieli Ramana Bandarenki.
Ale ŭ hetym ža filmie śćviardžałasia, što razmovy — insceniroŭka, pra jakuju Chrałovič nie viedaŭ. Taksama paviedamlałasia, što Alaksieja zatrymali i dałučyli da apieratyŭnaj hulni, kab vyjavić šlachi evakucyi biełarusaŭ, jakich mohuć pieraśledavać pa palityčnych matyvach.
Akramia taho, siłaviki nibyta zatrymali i hrupu ludziej, jakija jamu musili dapamahčy.
Sud nad padpałkoŭnikam KDB pačniecca 21 sakavika ŭ budynku Minskaha haradskoha suda. Spravu ŭ zakrytym režymie budzie razhladać sudździa Dzijana Kučuk.
Kamientary