U Hrodnie miascovaja aktyvistka chacieła pravieści praŭładny aŭtaprabieh, ale ŭłady zabaranili
Viadomaja ŭ Hrodnie aktyvistka «Infaśpiecnazu» Volha Bondarava chacieła pravieści aŭtaprabieh u padtrymku siłavikoŭ i padała zajavu ŭ Hrodzienski harvykankam. Ale ŭłady nie ŭzhadnili mierapryjemstva. Pra heta raskazała sama Bondarava ŭ svaim Telegram-kanale, vykłaŭšy adpaviednyja dakumienty, paviedamlaje Hrodna.life.
«Pahutaryŭšy z pradstaŭnikom haradskoj ideałohii, nakiravała zajaŭku na praviadzieńnie aŭtaprabiehu. Siabry, raniej nie atrymajecca nijak, miarkujučy pa nastrojach, jakija panujuć u harvykankamie. Skažu bolš: jość vialikija sumnievy, što i hety patryjatyčny aŭtaprabieh zarežuć, spasłaŭšysia na jakuju-niebudź niepieraadolnuju pryčynu. Daj Boh, kab ja pamylałasia!» — napisała Bondarava ŭ kanale 11 sakavika.
Aŭtaprabieh płanavaŭsia na 26 sakavika, pryniać udzieł u im pavinny byli kala 20 aŭtamabilaŭ. Meta mierapryjemstva — «vykazać padtrymku rabotnikam siłavych struktur Biełarusi i Rasiei ŭ ich pracy pa abaronie pravaparadku».
Adkaz za podpisam namieśnika staršyni harvykankama Andreja Bołtryka pryjšoŭ Bondaravaj 17 sakavika. Hrodzienski harvykankam padziakavaŭ Volhu za «aktyŭnuju hramadzianskuju pazicyju i nieabyjakavaje staŭleńnie da hramadska-palityčnych padziej, što adbyvajucca ŭ Respublicy Biełaruś». Ale nie dazvoliŭ pravieści aŭtaprabieh z-za ramontu daroh u horadzie.
U harvykankamie Bondaravaj prapanavali dałučycca da śviatkavańnia Dnia Pieramohi i Dnia Niezaležnaści.
Padpisčyki Bondaravaj u kamientarach vyrašyli, što pryčynaj admovy źjaŭlajecca «polski dušok» siarod hrodzienskaj ułady, i razvažajuć, ci budzie na ich uprava.
Kamientary