«Pradavali ŭ asnoŭnym ukrainski cukar». Što viadoma pra rasijskich vajskoŭcaŭ, jakija handlujuć na Homielščynie narabavanym va Ukrainie
Na minułym tydni hałoŭnaje ŭpraŭleńnie vyviedki Ukrainy raspaŭsiudziła infarmacyju, što ŭ Naroŭli isnuje rynak, na jakim rasijskija vajskoŭcy pradajuć narabavanaje va Ukrainie. Čytačy «Radyjo Svaboda» źniapraŭdzili hetuju infarmacyju, ale padzialilisia niekatorymi inšymi cikavymi padrabiaznaściami.
«Tak, rasijanie jeduć ciapier z Ukrainy «zahružanymi», šmat viazuć narabavanaha. Pa horadzie jany toje-sioje pradajuć, ale rynka niama», — raskazaŭ žychar Naroŭli.
«Handal ź ich boku pačaŭsia jašče da taho, jak jany zajechali va Ukrainu. Rasijanie pradavali miascovym soki, kansiervy. Kali ciapier jany viartajucca z Ukrainy, to viazuć šmat miaškoŭ, kłunkaŭ. Što tam, nie viedaju. Aktyŭna pradavali ŭkrainski cukar. Miašok — 65 rubloŭ, heta za 50 kiłahramaŭ. Pradavali jaho kala šynamantažu na vulicy Minskaj. Niekatoryja ludzi brali», — raskazała krynica «Svabody».
Žychar Naroŭli nie vyklučaje, što narabavanym dabrom rasijanie handlujuć pa chatach ci stychijna — na ŭjeździe ŭ Naroŭlu z boku Ukrainy.
«Bačyŭ, što rasijanie ciahnuli sadovuju tačku, dyvany ciahnuli. Na prodaž, ci sabie, nie viedaju. Jašče jany pa centry horada haniali na skuterach i rovarach. Dzie ich uziali — pytańnie», — zaznačyŭ miascovy žychar.
Jon kaža, što ciapier rasijskija vajskoŭcy skuplajuć šmat praduktaŭ u kramach Naroŭli.
«Biaruć cyharety, enierhietyčnyja napoi, trusy, škarpetki — usio hrabuć. U razmovy nie ŭstupajuć. Ich technika staić na našaj aŭtabazie, akurat nasuprać palavoha špitala. Kazali, što pajeduć adsiul jašče 29 sakavika. Potym niešta źmianiłasia, ciapier havorać, što 7 krasavika vyjeduć z Naroŭli», — zaznačyła krynica «Svabody».
Žychary Mazyra kažuć, što mienš rasijan u horadzie nie stała. «Jany, jak i raniej, paŭsiudna — u barach, kramach, łaźniach», — zaznačyŭ miascovy žychar.
U roznych supołkach «VKontaktie» Naroŭli i Mazyra prysutnaść rasijskich vajskoŭcaŭ nie nadta adčuvajecca. U supołcy «Kuplu Prodam Narovla» byli raźmieščanyja abviestki pra prodaž iPad za 150 rubloŭ i novaha mabilnaha telefona, pra canu jakoha nie paviedamlajecca. Adzin z pradaŭcoŭ — nibyta «žychar horada Enierhadara», u druhoha profil pryvatny, ale na avatarcy — vajskoŭcy i tanki.
U mazyrskich pablikach jość abviestki pra znachodku mabilnaha telefona, u futarale jakoha lažaŭ siertyfikat ab vakcynacyi ad karanavirusa. Siertyfikat byŭ zrobleny miedpunktam vajskovaj častki 45123 Ministerstva abarony Rasii. Častka raźmieščanaja ŭ horadzie Kamiensk-Uralski Śviardłoŭskaj vobłaści. Heta avijabaza vajskovaj avijacyi.
U mazyrskich supołkach «VKontaktie» taksama jość abviestka pra znojdzienuju rasijskuju bankaŭskuju kartku sistemy «Mir».
Taksama ad imia žychara Rasii była raźmieščanaja abviestka pra žadańnie paznajomicca z «cikavaj dziaŭčynaj z formami».
Čytać taksama:
Pavodziać siabie jak haspadary, pradajuć toje, što narabavali va Ukrainie. Što raspaviadajuć pra rasijskich vajskoŭcaŭ na Homielščynie
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii15
Kamientary