«Na zakupy» ŭ Polšču. Kolki kaštujuć šop-tury i adkul možna źjeździć
U dakavidnyja časy šop-tury ŭ Polšču i Litvu karystalisia vialikaj papularnaściu siarod biełarusaŭ. Šyroki vybar, źnižki i mahčymaść viartańnia PDV — usio heta padšturchoŭvała biełarusaŭ rabić zakupy za miažoj, vydatkoŭvajučy pry hetym šmat času i niervaŭ. Sa źniaćciem abmiežavańniaŭ na vyjezd takaja mahčymaść adnaviłasia. «Naša Niva» pacikaviłasia, kudy možna nakiravacca za pakupkami ŭžo ciapier i kolki heta kaštuje.
Minsk: u Biełastok za 80 rubloŭ
Znajści ŭ Minsku firmy, jakija hatovyja zavieźci vas «na zakupy» ŭ Polšču ci Litvu ciapier składaniej, čym, naprykład, na pačatku sakavika 2020-ha. Šmat pieravozčykaŭ kažuć, što praca pa hetym kirunku pakul nie adnoŭlenaja.
Pry hetym na niekatorych sajtach dahetul zastajecca infarmacyja sa starymi cenami ŭ 30-40 rubloŭ. Naturalna, što za hetyja hrošy ŭ vas nie atrymajecca źjeździć za pakupkami ŭ Biełastok. Tamu padčas pošuku šop-turaŭ varta ŭdakładniać infarmacyju pa telefonie, bo, jak pakazała praktyka, infarmacyja na sajtach pieravozčykaŭ davoli časta nie adpaviadaje realnaści.
Jeść šop-tury ŭ Biełastok na aŭtobusie za 80 rubloŭ.
Vyjezdy pa aŭtorkach i piatnicach. U firmie padkreślili, što navat padčas isnavańnia kavidnych abmiežavańniaŭ jany praciahvali akazvać hetyja pasłuhi.
Šop-tury ŭ Vilniu ź Minska pakul niedastupnyja.
Hrodna: jość roznyja varyjanty
Šop-tury ŭ Polšču tradycyjna karystalisia vialikim popytam u žycharoŭ Hrodna. Siarod miascovych navat chadzili žarty, što sustreć znajomych u biełastockim «Ašanie» praściej, čym u miascovaj kramie.
U dakavidnyja časy z abłasnoha centra možna było štodzionna pajechać u šop-tur u Biełastok, Sakułku ci Vilniu. Apošniaja karystałasia značna mieńšym popytam, ale prapanoŭ i žadajučych usie adno chapała.
Vialikaja kankurencyja na rynku vymušała pieravozčykaŭ ładzić akcyi i rabić šostuju ci dziasiatuju pajezdku biaspłatnaj.
Ale ŭviedzienyja krainami ES karanavirusnyja abmiežavańni faktyčna pastavili kryž na hetym biznesie.
Cana pajezdki pa maršrucie Hrodna — Biełastok z naviedvańniem handlovych kropak raniej składała ŭsiaho 15-20 rubloŭ (kala 7-9 dalaraŭ pa tahačasnym kursie).
Infarmacyju z padobnymi cenami možna i dahetul znajści na sajtach niekatorych kampanij, jakija raniej akazvali hetyja pasłuhi, ale pracu nie adnavili.
Jak vyśvietliłasia, znajści pieravozčykaŭ, jakija hatovyja zavieźci ŭ šop-tur u Biełastok, niaprosta. Bolšaść firm, u jakija my datelefanavalisia, pakul takuju pasłuhu nie akazvajuć. Častka pieravozčykaŭ za dva hady isnavańnia abmiežavańniaŭ uvohule syšła ź biznesu. Ale my adšukali prynamsi adnu firmu, jakaja zajmajecca šop-turami ŭ Biełastok.
Cana pajezdki — 100 rubleŭ (kala $34) z čałavieka. Najbližejšy vyjezd u subotu. U aŭtobusie zastavałasia tolki adno miesca.
U prahramu ŭvachodzić naviedvańnie rynka, hipiermarkieta «Ašan» i «Haleryi Białaj». Pasažyraŭ źbirajuć pa horadzie, a pa viartańni razvoziać pa damach.
Ci buduć dadatkovyja rejsy pa subotach i kali varta čakać viartańnia maršrutak u budnyja dni, pieravozčyk pakul nie viedaje. Kaža, što ŭsio budzie zaležać ad popytu.
U inšaj firmie nam raspaviali, što šop-turaŭ u ich prahramie niama, ale za 90 rubleŭ (kala 30 dalaraŭ) možna nabyć kvitki ŭ dva baki. Pry hetym nie abaviazkova vyjazdžać i viartacca adnym i tym ža transpartam. Čas adpraŭki z Hrodna i Biełastoka možna vybirać samastojna. Ale i jeździć pa kramach taksama daviadziecca samomu.
Pry zamovie kvitkoŭ praz sajt dva kvitki buduć kaštavać krychu tańniej — 112 złotych (kala $27).
Šop-turaŭ z Hrodna ŭ Vilniu my nie znajšli. Pieravozčyki prapanavali prosta nabyvać kvitki na rehularnyja rejsy. U lubym vypadku, kali kazać pra Litvu, to treba mieć na ŭvazie, što ŭ adroźnieńnie ad palakaŭ, litoŭcy patrabuć PŁR-test abo siertyfikat vakcynacii adnoj z pryznanych ES vakcyn. Pryščepki, zroblenyja ŭ Biełarusi, nie padychodziać.
A što nakont rejsaŭ z Bresta?
Jak vyśvietliłasia, źjeździć zakupicca ŭ Varšavu ci Biełastok z Bresta taksama niaprosta. Firmy, jakija raniej akazvali takija pasłuhi, kažuć, što pakul u šop-tury nie jeździać. Prapanoŭvajuć nabyvať kvitki na rejsavyja maršrutki da Ciarespala abo Varšavy. Častka byłych pierievozčykaŭ taksama spyniła dziejnaść.
Ahułam situacyja ŭkazvaje na toje, što, navat niahledziačy na poŭnuju adsutnaść abmiežavańniaŭ i dadatkovych patrabavańniaŭ, prynamsi ŭ vypadku z Polščaj, kultura pajezdak za pakupkami pakul nie viarnułasia.
Dyrektar adnoj ź firmaŭ, jakaja pracuje ŭ halinie, źviazvaje heta z tym, što za hety pieryjad u bolšaści z tych, chto chacieŭ by pajechać zakupicca, banalna niama dziejnaj vizy.
«Ryełtary choram kažuć, što narod pakul u stupary». Što adbyvajecca na rynku nieruchomaści
«Naša Niva» adnaŭlaje zbor danataŭ — padtrymać prosta
Na Šry-Łancy ŭ 37 hadoŭ pamior biełaruski kinapradziusar Andrej Matałyha3
Kamientary