Kiraŭnik źniešniaj raźviedki FSB, jaki adkazvaŭ za Ukrainu, pieraviedzieny ŭ SIZA

Hienierał-pałkoŭnik Siarhiej Biasieda šmat hadoŭ uznačalvaŭ tak zvanuju 5-uju słužbu FSB — adździeł apieratyŭnaj infarmacyi i mižnarodnych suviaziaŭ FSB.

Hetaje padraździaleńnie, da stvareńnia jakoha maje dačynieńnie Pucin, adkazvaje u tym liku za raźviedvalnyja apieracyi na terytoryi byłoha Savieckaha Sajuza, sproby ŭtrymańnia postsavieckich krain u śfiery ŭpłyvu Rasii.

Andrej Sałdataŭ adznačaje, što Siarhiej Biasieda i raniej traplaŭ u niepryjemnyja dla siabie situacyi, źviazanyja z Ukrainaj.

Pieršy raz heta zdaryłasia jašče padčas Majdana ŭ 2014 hodzie, kali vyśvietliłasia, što hienierał-pałkoŭnik byŭ u Kijevie.

— Padčas hetych padziej jon pavinien byŭ utrymać Viktara Janukoviča va ŭładzie, ale ŭ jaho ničoha nie vyjšła. Heta stała viadoma paśla taho, jak Janukovič adlacieŭ.

MZS Ukrainy dasyłała aficyjnyja zapytu ŭ rasijskija śpiecsłužby i MZS Rasii ab dopycie Siarhieja Biasiedy nakont taho, što ŭłasna jon rabiŭ u Kijevie. Ale jon prydumaŭ niejkuju dziŭnuju historyju pra toje, što jon praviaraŭ biaśpieku rasijskaha pasolstva. Moža, chadziŭ praviaraŭ tam lampački i kalučy drot.

Ale situacyja ciapier našmat bolš žorstkaja i našmat horš paviarnułasia dla jaho asabista, tamu što litaralna praz paŭtary tydni paśla pačatku vajny stała viadoma, što Siarhiej Biasieda źmieščany pad chatni aryšt, što da jaho vielizarnaja kolkaść pretenzij, źviazanych ź dziejnaściu jaho 5-j słužby.

I heta pretenzii, ad drennaj raźviedvalnaj infarmacyi da niapravilnaha vykarystańnia biudžetnych srodkaŭ, jakija byli vyłučanyja na padryŭnuju pracu na terytoryi Ukrainy.

Ciapier stała viadoma, što Siarhiej Biasieda bolš nie znachodzicca pad chatnim aryštam, jon znachodzicca ŭ Lefortaŭskaj turmie.

Jak paviedamlajuć maje krynicy, — pad čužym imiem. Heta ŭpieršyniu takaja situacyja, kali hienierał-pałkoŭnik FSB znachodzicca ŭ Lefortavie.

Byccam ciapier im zajmajucca ŭžo śledčyja vajennaha śledčaha ŭpraŭleńnia SK. Aficyjnaja linija rasśledavańnia — kradziež biudžetnych srodkaŭ, vydzielenych na pracu jaho słužby, i zrazumieła, što ŭ hetym vypadku znoŭ taki havorka idzie pra dziejnaść na terytoryi Ukrainy, — raspavioŭ žurnalist.

Całdataŭ kaža, što, mahčyma, hienierał-pałkoŭnik niedakładna infarmavaŭ Pucina pra hramadskija nastroi va Ukrainie.

Pa jaho infarmacyi, spravaj Biasiedy ciapier zajmajecca vajennaja kontrraźviedka — struktura, jakaja zvyčajna zajmajecca pošukam zdradnikaŭ. Pa słovach žuranalista, u jaho jość adčuvańnie, što šmat chto ŭ Kramli ciapier zadajecca pytańniem, čamu amierykanskaja raźviedka tak šmat viedała i pradkazvała.

Supracoŭniki FSB praciahły čas źjaŭlalisia niedatykalnaj kastaj u Rasii, navat šarahovych supracoŭnikaŭ hetaj struktury zvyčajna nie pryciahvali da adkaznaści za pravaparušeńni, a aficery takoha vysokaha ranhu nikoli raniej nie pryciahvalisia da kryminalnaj adkaznaści.

Analityk źviartaje ŭvahu, što ŭ 2014 dziejańni rasijskaj raźviedki va Ukrainie aceńvajucca jak pravalnyja — pierad imi stajała zadača nie dapuścić adchileńnia Janukoviča ad ułady, i jany nie dali rady, a vojska ž naadvarot — efiektyŭna vyrašyła zadaču pa akupacyi Kryma, tamu ŭpłyŭ vajskoŭcaŭ u atačeńni Pucina ŭ toj čas uzros.

Ciapier ža i vajskoŭcy apynulisia ŭ składanaj situacyi. Paru tydniaŭ tamu byŭ zvolnieny namieśnik kamandujučaha Roshvardyjaj hienierał-lejtenant Raman Haŭryłaŭ. Usie hetyja pracesy śviedčać ab tym, što Pucin niezadavoleny chodam «śpiecapieracyi».

— Jon praŭda ličyć, što jaho vialiki płan byŭ absalutna narmalny, prablema — z elemientami. U apošni čas, prynamsi da vajny, na pieršyja pazicyi ŭvieś čas vysoŭvalisia vajskoŭcy, ale i jany apynulisia ciapier u składanaj situacyi. Nu, prosta tamu, što drenna idzie vajna, i jak žachliva ŭsia hetaja historyja razhortvajecca, straty i hetak dalej.

Bolš za toje, Uładzimir Pucin niadaŭna adkryŭ dla siabie iścinu, jakuju viedali absalutna ŭsie savieckija kiraŭniki, što vajennyja zaŭsiody chłusiać. Vajskoŭcy chłusili navat Stalinu, što ŭžo kazać pra Uładzimira Pucina?

Voś jon niadaŭna adkryŭ dla siabie, što i sałdaty terminovaj słužby tam vykarystoŭvajucca, i inšyja rečy adbyvajucca. Bolš za toje, ja b skazaŭ, što toje, što płan viadzieńnia vajennych dziejańniaŭ na terytoryi Ukrainy nie mianiaŭsia na praciahu praktyčna miesiaca, choć było adrazu zrazumieła, što jon nie spracavaŭ, — heta śviedčyć ab tym, što Uładzimir Pucin nie vielmi dobra razumieŭ naohuł, što adbyvajecca ŭ jahonym vojsku, ź jaho siłavymi strukturami. Tamu ciapier kazać pra toje, na kaho jon u rešcie rešt zrobić staŭku i jak źmienicca raskład sił pamiž siłavikami, ja prosta nie biarusia.

VVS ahučyła imia rasijskaha hienierała, jakoha pryznačyli hałoŭnym pa vajnie va Ukrainie

Dva aficery KDB padarvalisia na rasijskaj minie ŭ Homielskaj vobłaści

• 5
• 0
• 43
• 6
• 1
• 0
• 1
• 0