«Spačatku pastavili tvaram da ściany, potym dazvolili prysieści». Siarhiej Čeračań raskazaŭ, jak prachodziŭ pieratrus u ofisie prafsajuza REP

— Siarhiej, raskažycie, jak usio było? Usich adrazu pakłali tvarami ŭ padłohu?

— Nie, spačatku pastavili tvaram da ściany, potym dazvolili prysieści.

— Što šukali?

— Byŭ standartny pieratrus, z paniatymi.

— Chto byŭ u ofisie, akramia vas i Hienadzia Fiadyniča?

— Byŭ Bieraśnieŭ Vasil Cichanavič, Źmicier Barodka. Jašče pamočnica, jakaja prosta ŭ niaŭdały čas pryjšła ŭ ofis.

— Usio pieraviarnuli ŭvierch dnom?

— U pryncypie, pracavali dastatkova akuratna. Jasnaja sprava, što dakumienty, jakija dastavali z šafaŭ, nazad nie składali. Ale nie było takoha, kab niešta łamali. Tolki adrazu kali zachodzili, pa-mojmu, vynieśli dvoje dźviarej…

— Patłumačyli, z čym źviazana ŭvarvańnie?

— Pieratrus pravodziŭsia ŭ miežach kryminalnaj spravy, inicyjataram źjaŭlajecca Śledčy kamitet. Jasnaja reč, što ja nie zapisvaŭ, ale nazyvali vielmi šmat (kali nie pamylajusia, paradku dziesiaci) artykułaŭ Kryminalnaha kodeksa.

— Paśla taho, jak pieratrus skončyŭsia, usich adpuścili?

— Nie. Adpuścili tolki mianie i čałavieka, jaki nie mieŭ dačynieńnia da prafsajuzaŭ.

— Vy ŭsie piać hadzin pieratrusu stajali la ściany? U tualet choć vypuskali?

— Nie, my siadzieli. U tualet vypuskali. Chto prasiŭ — navat častavali harbataj-kavaj. Adnosna ŭsio było narmalna, bieź niejkich asablivych pierahinaŭ.

— Jak Hienadź Fiadynič usio heta kamientavaŭ?

— Kazaŭ, što heta ŭščamleńnie pravoŭ pracoŭnych i palityčna matyvavanaja situacyja. Sprava ŭ tym, što ich prafsajuznuju arhanizacyju niadaŭna ŭnieśli ŭ śpisy ekstremisckich. U adkaz na heta Hienadź Fiadynič i Vasil Cichanavič nakiravali zapyt u Kamitet dziaržaŭnaj biaśpieki z prośbaj rastłumačyć, pa jakoj pryčynie ich pryznali ekstremisckaj arhanizacyjaj, kali prafsajuz aficyjna zarehistravany i pracuje ŭ ramkach zakanadaŭstva stroha pa svaim profili — adstojvaje pravy pracoŭnych. I voś taki matyvavany adkaz ad KDB siońnia jany atrymali…

— A jak vy tam apynulisia?

— My stelefanavalisia z Hienadziem Fiadyničam, damovilisia ab sustrečy. Zajechaŭ daviedacca, jak u ich spravy, jak situacyja ŭ arhanizacyi. I voś… daviedaŭsia… Heta była adna ź niamnohich arhanizacyj, jakaja zajmałasia realnaj dapamohaj rabočym ludziam.

Tak, mahčyma, u 2020 hodzie jany padtrymali pratest, ale paśla hetaha jany ŭvajšli ŭ ramki svaich statutnych metaŭ i zadač i, pa-mojmu, vielmi spakojna pracavali.

Čytajcie taksama:

Idzie «začystka» niezaležnych prafsajuzaŭ: prajšli pieratrusy ŭ ofisach i na kvaterach aktyvistaŭ 

• 3
• 0
• 0
• 3
• 1
• 5
• 21
• 0