«Usie našy kiroŭcy — biełarusy. Płacim im nie mienš za $1000 «čystymi». Jak biełarus adkryŭ słužbu taksi ŭ Poznani
«Pieršaje majo ŭkładańnie — 5 tysiač jeŭra», — dzielicca Jahor Jarmolenka. U sakaviku jon zapuściŭ u Poznani słužbu taksi. Biełarus apisaŭ ułasny dośvied, jak u Polščy adkryć svaju spravu.
«Nie pajšoŭ znoŭ u łahistyku, bo ŭkładvać u Polščy treba było nie mienš za 50 tysiač jeŭra»
Jahoru Jarmolenka 31 hod. U Polšču kančatkova pierajechaŭ za tydzień da prezidenckich vybaraŭ.
U Biełarusi ŭ jaho z žonkaj była svaja kampanija. Jany zajmalisia mižnarodnymi hruzapieravozkami.
«Ab pierajezdie zadumalisia jašče ŭ 2018-m. Pačali rychtavacca da adjezdu. U 2019-m žonka atrymała kartu palaka, i ŭ lutym hetaha ž hoda my źjechali. Ale ŭletku ja viarnuŭsia, bo ŭ Biełarusi zastavaŭsia biznes, jaho treba było pradać. Kančatkova źjechaŭ užo ŭ 2020-m, za tydzień na vybaraŭ», — kaža jon.
Adna z asnoŭnych pryčyn, čamu Jahor vyrašyŭ pierajechać i pradać kampaniju, — ciažkaści ź viadzieńniem biznesu.
«Prablemy z kursam, prodažam valutnaj vyručki, niestabilnaja situacyja z padatkovaj, FSAN i pravierki.
Biełaruś u viadzieńni biznesu adstała ad Polščy na 20 hadoŭ. I ŭ ličbavizacyi, i ŭ zakanadaŭstvie.
Pieršy raz jašče kali pryjazdžaŭ u Poznań, padumaŭ, što možna budzie adkryć tut taksi. U 2020 hodzie ŭ Polščy nabyŭ moc zakon ab lehalizacyi Uber, Bolt. Značna spraścili pracu. Naprykład, admianili taksomietry, prybrali patrabavańnie viedańnia horada dla zamiežnikaŭ, uviali prostuju praceduru atrymańnia licenzii», — apisvaje situacyju surazmoŭca.
Na pytańnie, čamu nie staŭ znoŭ adkryvać łahistyčny biznes, Jahor adkazvaje, što ŭ takuju spravu ŭ Polščy treba ŭkłaści bujnuju sumu.
«Vybraŭ taksi, bo na toj momant heta byŭ całkam pusty rynak. Jon pierastrojvaŭsia, možna skazać, što jaho rabili z nula. Adkryć taki biznes było niadoraha i prosta. Ryzyki minimalnyja, tamu što ŭkładańni nievialikija.
Sama ideja z taksi pryjšła ŭ suviazi z tym, što takim biznesam u Minsku zajmalisia maje znajomyja. Ja jašče parazmaŭlaŭ z kiroŭcami, jakija ŭ Polščy nielehalna pracavali, i zrazumieŭ, što treba sprabavać.
Nie pajšoŭ znoŭ u łahistyku, bo ŭkładvać u Polščy treba było nie mienš za 50 tysiač jeŭra. Jašče adzin momant — apłata za pasłuhu ŭ hetaj śfiery ŭ Jeŭropie składaje 60 pracoŭnych dzion. Atrymlivajecca, što heta «doŭhija» hrošy. A ŭ taksi ŭsio stabilna, atrymlivaješ dachod chutka ad apierataraŭ.
Abrali Poznań, bo heta vielmi libieralny horad. Jość roźnica pamiž uschodam i zachadam u płanie mientalitetu, jakaści žyćcia. U Varšavie mnie nie padabajecca, i hety biznes tam prynosić mienš hrošaj. A Poznań ličycca horadam pradprymalnictva», — kaža mužčyna.
«Za dzień, kali taksavaŭ, moh zarabić 100-150 dalaraŭ»
U pačatku Jahor nabyŭ adzin aŭtamabil. I adrazu sieŭ za rul, kab zrazumieć, ci pracuje jaho biznes-płan.
«Ciapier u nas 5 mašyn, — dzielicca jon. —
Pieršaje majo ŭkładańnie — 5 tysiač jeŭra. Heta prosta, kab pačać. Kala 80% ad hetaj sumy — košt adnaho aŭtamabila. My brali zvyčajnuju staruju mašynu — biez kandycyjaniera, ź nievialikim prabieham i ŭ narmalnym stanie.
Tut jašče dziejničaje taki momant: treba ŭ techničny pašpart pastavić štamp «taksi». Paśla hetaha mašyna adrazu ž stračvaje ŭ canie. Strachoŭka darahaja, minimum 500 jeŭra.
Za dzień, kali taksavaŭ, ja moh zarabić 100-150 dalaraŭ.
Samo adkryćcio biznesu zaniało 10 chvilin. Tut jość dźvie formy: IP i AAT. Apošniaje adkryvać niavyhadna pry abarocie mienš za niekalki miljonaŭ jeŭra. Adkryć IP tut nie ŭsie mohuć. Patrebna karta palaka, pastajanny vid na žycharstva abo pierajezd u suviazi z uźjadnańniem siamji. Pakolki ŭ mianie ŭ žonki ŭžo była karta palaka, to ja atrymaŭ pastajanny vid na žycharstva ŭ suviazi z uźjadnańniem siamji. A zaraz u žonki ŭžo polskaje hramadzianstva».
Padatki vyšejšyja, ale bieź niečakanaściaŭ i dadatkovych paboraŭ
U Polščy jość try vidy padatkaabkładańnia: sproščanaja sistema, liniejnaja i ahulnaja. Jahor pracuje pa pieršaj.
«Vy płacicie padatak ad usiaho abarotu firmy, suma pastupleńniaŭ minus PDV. Padatak składaje 8,5%, heta mienavita staŭka dla taksi. Druhi varyjant — pastajannaja staŭka, jakuju vy płacicie ad prybytku firmy — 19%. U trecim vypadku pieršy padatkovy paroh (kali hadavy prybytak da $30 tysiač) — 17%, druhi — 32%», — kaža jon.
U Biełarusi Jahor płaciŭ mienš — 3% i PDV. Ale tam jamu nichto nie davaŭ harantyi, što padatkovaja iśpiekcyja nie vypiša štraf na roŭnym miescy albo nie abaviaža zapisacca na płatnyja kursy.
«U Biełarusi padatkovaja zaŭždy moža ŭnieści karekciroŭku i ŭ vyniku niešta pieraličyć abo prydumać, za što dać štraf. U Polščy takoje niemahčyma.
Kali ja adkryvaŭ taksi, u mianie była nievialikaja sprečka z padatkovaj, jakuju my vyrašyli adnym listom pa elektronnaj pošcie. Jany sa mnoj pahadzilisia, paprasili prabačeńnia, i pytańnie było źniata na praciahu niekalkich hadzin. U Biełarusi heta nierealna. Nam uvieś čas prychodzili listy ab sieminarach, u jakich treba było ŭdzielničać. Heta svajho rodu pabor. Zapłacić hrošy za navučańnie, jakoje mnie zusim nie treba. Maŭlaŭ, my nie vypišam vam štraf, ale vy schadzicie na kursy.
Była sprečka ŭ Biełarusi z FSAN. My ź imi źviazalisia i spytali, ci ŭsio ŭ nas apłačana. Jany adkazali, što tak, a praz dva tydni z rachunku śpisalisia hrošy. Nibyta my niešta nie daličyli za supracoŭnikaŭ.
U Biełarusi navat parazmaŭlać z padatkovym inśpiektaram ciažka. Tut dastatkova jamu napisać na poštu, i jon daść adkaz.
I kali ja jak pradprymalnik rablu pamyłku, mnie dapamahajuć jaje vypravić. Heta narmalnaja praktyka. Nijakich štrafaŭ nie vypisvajuć», — kaža surazmoŭca.
Taksama mužčyna cikaviŭsia, jak uziać mašynu ŭ lizinh. Ad hetaj idei z časam admoviŭsia: tady byŭ samy razhar pandemii, i čakać aŭto treba było kala 6-8 miesiacaŭ.
«Kali ŭ vas IP, to lizinh lepš brać praz paŭhoda paśla adkryćcia biznesu. Jak praviła, pieršy ŭniosak ad 1 da 20%. Chutčej za ŭsio, u vas bank paprosić 10%. Na praciahu hadziny vam ŭchvalać lizinh, a z patrebnych dakumientaŭ — zajava, u jakoj vy prosta pakazvajecie vaš prykładny zarobak u miesiac. Jaho nie treba ničym paćviardžać. Kali nie zmožacie płacić, to heta buduć užo vašy prablemy», — dzielicca jon.
«Druhuju firmu budu adkryvać z partniorami-biełarusami»
Ofis i stajanku dla aŭto Jahor u arendu nie braŭ. U hetym niama nieabchodnaści.
«Ja ŭsie dakumienty mahu hladzieć doma. A mašyny zaŭsiody ŭ pracy. Na adno aŭto ŭ nas dva kiroŭcy. Usiaho ŭ nas ich šeść.
Usie kiroŭcy — biełarusy, jakija pryjechali pa humanitarnaj vizie. Zarobki — nie mienš za tysiaču dalaraŭ, heta «čystymi». My dapamahajem biełarusam znajści žytło, razabracca ź lehalizacyjaj, miedycynskimi daviedkami i inšymi dakumientami».
U bližejšy čas Jahor płanuje pašyrać biznes. Mužčyna choča adkryć druhuju firmu.
«U mianie buduć dva partniory-biełarusy. Hetaja kampanija budzie ŭklučać pasłuhi taksi, budaŭničyja pasłuhi, evakuacyju transpartu, arendu abstalavańnia. Viadoma, vajna paŭpłyvała zaraz na biznes: padaražeła paliva, zapčastki niatannyja. Nie skažu, što krytyčna. Źniziłasia rentabielnaść, ale my razumiejem, što heta časova».
«Naša Niva» adnaŭlaje zbor danataŭ — padtrymać prosta
Čytajcie taksama:
«U Minsku ŭ nas časta śniedali Znak i Kaleśnikava». Jak biełarus adkryŭ kafe ŭ Vilni
«Śvitary raskupili za dzień». Biełaruskaja dyzajnierka raskazała pra biznes u Vilni i ŭkrainskuju kalekcyju
Ciapier čytajuć
«Byŭ upeŭnieny, što ja niedatykalnaja asoba dla rasijan». Pieršaje intervju Jurasia Ziankoviča na svabodzie14
Kamientary