Nul na trybunach, nul pa hulni. Zbornaja Biełarusi sastupiła słavakam na starcie futbolnaj Lihi nacyj
Kamanda Hieorhija Kandraćjeva za 90 chvilin sustrečy pry maksimalna sumnaj hulni naniesła ŭsiaho adzin, zusim nie niebiaśpiečny, udar pa čužoj bramie. A pakolki hetym strełam supiernikaŭ nie zasmuciła, to łahična zastałasia biez zabitych miačoŭ i nabranych bałaŭ na niejtralnym poli ŭ Sierbii.
Źmiest hulni ŭ horadzie Novi-Sad całkam adpaviadaŭ anturažu vakoł i ŭnutry areny. Mižnarodny «ban» prymusiŭ zbornuju Biełarusi vystupać nie prosta na niejtralnym stadyjonie, ale jašče i pry pustych trybunach. Pakolki ž u metach ekanomii ajčynnaja fiederacyja futboła abirała tannuju placoŭku, źniešni vyhlad 15-tysiačnika miascovaha kłuba «Vajvodzina» navodziŭ na sum jašče da startavaha śvistka hałoŭnaj refiery Stefani Frapar.
Paziachać chaciełasia i niepasredna ŭ čas dvuboju: «biełakryłyja» amal nie vałodali miačom (usiaho 33 adsotki za viečar), abaranialisia ledź nie ŭsioj kamandaj, a pra spatkańni z kipieram słavakaŭ Rodakam mahli razvažać tolki va ŭmoŭnym ładzie. Tamu całkam łahična, što za viečar toj amal nie ŭstupaŭ u baraćbu, bo byŭ zaśviedčyŭ usiaho adzin udar pa ŭłasnaj bramie.
Dziela spraviadlivaści pryznajem: pratakolnyja hości taksama niečaha niezvyčajnaha na poli nie demanstravali. Ale kłas słavakaŭ dazvoliŭ im kanviertavać adzin ź niešmatlikich šancaŭ u pieramožny miač: na 61-j chvilinie junijor Tomaš Susłaŭ pravioŭ debiutny hoł u składzie darosłaj zbornaj dy prynios joj pieramohu.
Minimalnaja viktoryja dazvoliła słavakam stać śledam za kamandaj Kazachstana u tablicy hrupy 2 dyvizijona «S» — lidary pierajhrali azierbajdžancaŭ kryšku bolš upeŭniena, 2:0. Biełarusy ž paśla startavaha tura apynulisia ŭ kvartecie trecimi.
Nastupny matč kamanda Kandraćjeva praviadzie tamsama na hetym stadyjonie 6 červienia suprać kalektyva Azierbajdžana. Matč pačniecca ŭ 21.45 pa biełaruskim časie.
Na Šry-Łancy ŭ 37 hadoŭ pamior biełaruski kinapradziusar Andrej Matałyha4
Kamientary