Łaŭroŭ zajaviŭ, što situacyja z ukrainskim zbožžam nie maje nijakaha dačynieńnia da charčovaha kryzisu
Ministr zamiežnych spraŭ Rasii Siarhiej Łaŭroŭ sustreŭsia ŭ Maskvie sa svaim tureckim kaleham Mieŭlutam Čavušahłu: jany abmiarkoŭvali adkryćcio charčovaha kalidora ŭ Čornym mory dla ekspartu sielskahaspadarčaj pradukcyi z Ukrainy.
Pavodle słoŭ Łaŭrova, situacyja z ukrainskim zbožžam nie maje nijakaha dačynieńnia da charčovaha kryzisu, ale ES maluje ź jaje «katastrofu suśvietnaha maštabu».
Na pres-kanfierencyi pa vynikach pieramovaŭ Łaŭroŭ skazaŭ, što, pa źviestkach tureckaha boku, Ukraina hatovaja albo raźminiravać svaje vody, albo zabiaśpiečyć prachod sudoŭ dla vyvazu zbožža.
Pavodle jaho słoŭ, rasijskija vajskoŭcy znachodziacca ŭ kantakcie z tureckimi kalehami, abmiarkoŭvajučy detali inicyjatyŭ pa vyvazie zbožža.
«Z našaha boku jakich-niebudź pieraškod, kab hetuju prablemu — prablemku, nasamreč, jana maleńkaja — nikoli nie było, kali saśpieła kijeŭskaja ŭłada, my budziem tolki rady supracoŭničać», — skazaŭ Łaŭroŭ.
«My hatovyja pravodzić i harantavać biaśpieku sudoŭ, jakija pakidajuć ukrainskija party i iduć pa pralivach, hatovyja rabić heta ŭ supracoŭnictvie z tureckimi našymi kalehami. Hałoŭnaja prablema była (…) u admovie Ukrainy ad raźminavańnia partoŭ», — cytuje Łaŭrova «Interfaks».
Ukraina vyrablaje 42% aleju, jaki pradajecca na suśvietnym rynku, 16% kukuruzy i 9% pšanicy.
Raniej zachodnija krainy abvinavacili Rasiju ŭ stvareńni pahrozy hłabalnaha hoładu ŭ vyniku błakady ŭkrainskich partoŭ u Čornym mory. Rasija ŭ svaju čarhu zajaŭlaje, što nie pieraškadžaje ekspartu ŭkrainskaha zbožža, i abvinavačvaje ŭ situacyi, jakaja skłałasia z charčovaj biaśpiekaj, zachodnija sankcyi.
TASS siońnia paviedamiła, spasyłajučysia na miascovyja ŭłady, što adhruzki zbožža z akupavanaha Rasijaj Čarnamorskaha porta Biardziansk adnoviacca na hetym tydni paśla zakančeńnia rabot pa abiasškodžvańni min.
Ciapier čytajuć
Mihrancki kryzis, arhanizavany Łukašenkam, — usio? Voś što pakazvajuć ličby9
Kamientary