Adna z hałoŭnych ajcišnych kampanij krainy pradaje žyllo. Abjavy pra budučy aŭkcyjon, na jakim buduć šukać haspadaroŭ dla šaści minskich kvater, apublikavanyja siońnia ŭ haziecie «Źviazda». Usie łoty raźmieščanyja pa adrasie Franciška Skaryny, 41. Heta panelnaja «śviečka» ŭ PVT 2013 hoda pabudovy, piša Onliner.by.
Važny momant: usie prapanavanyja kvatery znachodziacca na pieršym paviersie. A što pa cenach? Dvuchpakajovyja (kvatery pad numaram 1, 3, 5) płoščaj krychu bolš za 57 kvadratnych mietraŭ startujuć z $60 800 i $60 900 pa kursie. Zadatak, jaki treba ŭnieści, kab stać udzielnikam tarhoŭ, składaje $3040 i $3045 u ekvivalencie.
Z adnapakajoŭkami płoščaj 42,7 kv. m situacyja takaja. Za kvatery pad numarami 2, 4, 6 prosiać pa $46 000 pa kursie. I zadatak u pamiery $2300 u ekvivalencie.
Žyllo pradajecca z meblaj, bytavoj technikaj i nieabchodnymi dla žyćcia drobiaziami. Pryłožkavyja tumbački, fien, piśmovy stoł, naścienny hadzińnik — usio heta ŭžo budzie vas čakać. Poŭny pieralik rečaŭ u kožnaj kvatery možna pahladzieć na sajcie «Instytuta nieruchomaści i acenki».
Krok aŭkcyjonu składaje 1%. Praduhledžanyja i štrafy za admovu ad damovy: $12000 u ekvivalencie pa łotach №1, 3, 5 i $9000 pa kursie pa łotach №2, 4, 6.
Na rasterminoŭku pakupnikam raźličvać nie davodzicca: u praviłach paznačana, što na praciahu 20 kalandarnych dzion paśla zaklučeńnia dahavora kupli-prodažu pieramožca na tarhach pavinien budzie ŭnieści ŭsiu sumu na rachunak ZTAA «EPAM Sistemz».
Aŭkcyjon adbudziecca 19 lipienia ŭ 11:00 pa adrasie: h. Minsk, vuł. Kamsamolskaja, d. 11, 3-ci pavierch, kab. 4. Zajavy prymajucca pa 15 lipienia da 11:00, u pracoŭnyja dni z 8:30 da 12:00, z 13:30 da 16:00 pa adrasie: h. Minsk, vuł. Kamsamolskaja, 11, kab. 7.
Adkryŭšy kožnuju abjavu, vy možacie zaŭvažyć prypisku, što cana ŭkazanaja biez PDV. Ale nie varta pałochacca, jašče 20% ad nazvanaha koštu płacić nie pryjdziecca. Jak udakładnili ŭ «Instytucie nieruchomaści i acenki», žyłaja nieruchomaść u Respublicy Biełaruś PDV nie abkładajecca. Tamu finalnaj stanie taja cana, jakaja budzie ahučanaja ŭ chodzie tarhoŭ. Nijakich niečakanych nadbavak.
Dźmitryj Łukašenka choča pastavić pad kantrol usie mabilnyja telefony11
Kamientary