Ad 55 rubloŭ za dzień. Kolki kaštuje adpačyć u samych rejtynhavych sanatoryjach Biełarusi
Pahladzieli na ceny ŭ piaci najlepšych sanatoryjach Biełarusi pavodle rejtynhu ŭ Tripadvisor. Niekatoryja pucioŭki — pa canie padarožža ŭ Italiju.
Miadzielski rajon
Pieršaje miesca ŭ rejtynhu pa vyniku 185 vodhukaŭ atrymlivaje sanatoryj «Pryaziorny». Znachodzicca jon u Miadzielskim rajonie Minskaj vobłaści ŭ miežach nacyjanalnaha parka «Naračanski». Ad terytoryi sanatoryja da voziera Narač — kala 400 mietraŭ.
Aproč kłasičnaj pucioŭki ź lačeńniem, sanatoryj prapanuje adpačynak ź lačeńniem pa niekalkich profilnych kirunkach. Taksama jeść azdaraŭlenčaja prahrama dla tych, chto pierachvareŭ na COVID-19.
Z 24 červienia pa 22 žniŭnia ŭ sanatoryi budzie dziejničać pikavy prajs.
Samy tanny varyjant adpačynku abydziecca ŭ 150 rubloŭ z čałavieka za sutki pražyvańnia ŭ dvuchmiesnym numary. Ahučanaja cana dziejničaje tolki pry ŭmovie, što ŭ pakoi buduć žyć adrazu dva čałavieki, u inšym vypadku košt vyraście da 170 rubloŭ. Dapłata za dziaciej va ŭzroście ad 2 da 12 hadoŭ składaje 60 rubloŭ, ad 12 hadoŭ — 117 rubloŭ. U košt uvachodzić charčavańnie pa sistemie šviedskaha stała.
Vynikaje, što 10-dzienny adpačynak na dvuch čałaviek u samym rejtynhavym sanatoryi Biełarusi abydziecca minimum u 3000 rubloŭ.
Za sutki pražyvańnia ŭ 2-pakajovym numary ŭ katedžy prosiać 220 rubloŭ za darosłaha — heta 4400 rubloŭ za 10-dzionny adpačynak na dvaich pobač z samym vialikim vozieram Biełarusi.
Dziatłaŭski rajon
Druhoje miesca, pavodle rejtynhu TripAdvisor, zajmaje sanatoryj «Alfa Radon».
Jon znachodzicca ŭ pasiołku Navajelnia Dziatłaŭskaha rajona Hrodzienskaj vobłaści.
Minimalny košt 10-dzionnaha adpačynku na dvuch darosłych — 4900 rubloŭ. Stolki kaštuje pucioŭka bieź lačeńnia.
Taki ž adpačynak ź lačeńniem pa prahramie «Classic» kaštuje ŭžo 6180 rubloŭ. U hetuju sumu ŭvachodzić trochrazovaje charčavańnie sa šviedskim stałom i bieźlimitny dostup da SPA, trenažornaj zały i h.d.
Minski rajon
Treciajeie miesca ŭ śpisie TripAdvisor — u sanatoryja «Junactva», što znachodzicca na Minskim mory.
Ciaham letniaha pieryjadu cana adpačynku z pražyvańniem u dvuchmiesnych numarach pačynajecca z adznaki ŭ 271 rubiel z čałavieka. Kali brać pražyvańnie z naboram pracedur, to minimalnaja cana ŭzrastaje da 296-564 rubloŭ z čałavieka ŭ zaležnaści ad abranaha azdaraŭlenčaha kompleksu.
Vynikaje, što minimalny košt 10-dzionnaha adpačynku ŭ samym rejtynhavym sanatoryi na ŭźbiarežžy Minskaha mora składzie 5420 rubloŭ na dvaich darosłych.
Pražyvańnie ŭ dvuchmiesnym numary «luks» abydziecca ŭ 319 rubloŭ bieź jakich-niebudź azdaraŭlenčych pracedur. Heta 6380 rubloŭ za dziesiacidzionny adpačynak na dźvie asoby.
Śvietłahorski rajon
Čaćviortaje miesca ŭ rejtynhu «najlepšyja suadnosiny koštu i jakaści» — u sanatoryja «Srebranyja klučy». Mieścicca jon na bierazie raki Biareziny, u ahraharadku Čyrkavičy Śvietłahorskaha rajona Homielskaj vobłaści.
I heta samy tanny ź piaci najbolš rejtynhavych sanatoryjaŭ Biełarusi. Ceny na adpačynak u «Srebranych klučach» startujuć z adznaki ŭ 55 rubloŭ za miesca ŭ dvuchmiesnym adnapakajovym numary druhoj katehoryi. Pražyvańnie ŭ dvuchmiesnym dvuchpakajovym numary «Luks» najvyšejšaj katehoryi kaštuje 75 rubloŭ z čałavieka. Vynikaje, što samy biudžetny 10-dzionny adpačynak na dźvie asoby ŭ hetym sanatoryi moža abyścisia vam usiaho ŭ 1100 rubloŭ.
Maksimalny košt adpačynku ź lačeńniem i pražyvańniem u dvuchpakajovym numary «Luks» najvyšejšaj katehoryi kaštuje 112 rubloŭ za sutki.
Hrodzienski rajon
Zamykaje top-5 biełaruskich sanatoryjaŭ pa vynikach rejtynhu TripAdvisor «Aziorny». Łakacyja — Hrodzienski rajon, ahraharadok Aziory. Sanatorny kompleks staić na bierazie Biełaha voziera.
Ceny za sutki adpačynku ŭ «Aziornym» pačynajucca sa 115 rubloŭ. Stolki kaštuje dzień u dvuchmiesnym adnapakajovym numary biez azdaraŭlenčaj prahramy. Sutki adpačynku ŭ dvuchmiesnym dvuchpakajovym numary abyducca ŭ 200 rubloŭ z čałavieka. Adsiul minimum, jaki daviadziecca zapłacić za 10-dzionny adpačynak na dźvie asoby, składzie 2300 rubloŭ.
U košt adpačynku ŭvachodzić naviedvańnie akvaparka, błoka saun i basiejna, trenažornaj zały i h.d. «Aziorny» — adziny z top-5 sanatoryjaŭ, na terytoryi jakoha jość akvapark.
Adpačynak z kompleksam azdaraŭlenčych pracedur u «Aziornym» prapanujuć pa cenach ad 143 rubloŭ. Za taki 10-dzionny adpačynak na dźvie asoby zapłacicie 2860 rubloŭ.
Čytajcie taksama: Biełaruskija turfirmy dahetul prapanujuć pajezdki ŭ Krym. Kolki biaruć?
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal1
Kamientary