Chto z nabližanych da ŭładaŭ biznesmienaŭ i sielebryci maje nieruchomaść u Dubai?
U śpiavački Alesi — apartamienty z tryma spalniami, u syna Aleksina — viła za paru miljonaŭ. Dubajskuju ŭłasnaść działkoŭ i znakamistaściaŭ znajšli žurnalisty Biełaruskaha rasśledavalnickaha centra.
Alaksiej Aleksin i jaho syn Dźmitryj kantralujuć amal pałovu tytuniovaha rynku Biełarusi, razam z partniorami majuć asablivyja pryvilei ŭ łahistycy, vypuskajuć kaŭbasy, zajmajucca haściničnym biznesam. Na Zachadzie Aleksina-starejšaha ličać kašalkom Łukašenki i nakłali na biznesmiena i jaho kampanii sankcyi.
U dubajskaj bazie za Alaksiejem Aleksinym ličacca dvuchspalnyja apartamienty ahulnaj płoščaj 144 kvadratnyja mietry. Acenačny košt nieruchomaści — 568 tysiač dalaraŭ. Na Dźmitryja Aleksina zapisanaja viła ahulnaj płoščaj 680 kvadratnych mietraŭ na sumu bolš za 2,6 miljona dalaraŭ. Usie abjekty raźmieščany na vostravie Pałm-Džumiejra.
Jašče adzin uładalnik ułasnaści ŭ Dubai — biznesmien Dźmitryj Kiryłaŭ. Na pradprymalnika i jahonuju byłuju žonku zapisanaja kvatera ahulnaj płoščaj 81 kvadratny mietr, jakuju aceńvajuć u 129 tysiač dalaraŭ. Kiryłaŭ kaliści byŭ dyrektaram «Biełaruskaj cukrovaj kampanii», u pačatku 2020 hoda jon trapiŭsia na chabarach, i KDB zatrymaŭ jaho, abvinavaciŭšy ŭ machinacyjach. Dźmitryja Kiryłava pazbavili voli na 7,5 hod.
Dźmitryj Chadkievič, pa infarmacyi kibierpartyzanaŭ, pracavaŭ namieśnikam dyrektara i namieśnikam staršyni praŭleńnia ŭ kampanii «Biełtechekspart». Hety bujny eksparcior biełaruskaha uzbrajeńnia nie adnojčy traplaŭ pad zachodnija sankcyi, apošni raz — u 2021 hodzie. Kampanija taksama paśpieła zaśviacicca ŭ dakładzie AAN u liku pastaŭščykoŭ zbroi ŭ Kot-dJIvuar dla sił dyktatara Hbahba.
U Dubai Chadkieviču naležać čatyry kvatery ahulnaj płoščaj 330 kvadratnych mietraŭ. Apartamienty raźmieščany ŭ kompleksie Jumeirah Lakes Towers, jaki składajecca z 80 viežaŭ, pabudavanych pa krajach troch štučnych azior. Acenačny košt nieruchomaści Chadkieviča — 776 tysiač dalaraŭ.
Jość siarod ułaśnikaŭ nieruchomaści ŭ Dubai i znakamitaści. Volha Miniec (śpiavačka Alesia) u 2011 hodzie vyjšła zamuž za biznesoŭca Leanida Minca i jany pačali razam budavać miedyja-impieryju. Paśla atrymańnia va ŭłasnaść «BiełMuzTV», a zatym i pałovy telekanała VTV para zaniałasia prodažam rekłamy nie tolki na svaich telekanałach, ale i na dziaržaŭnych, a taksama na niekatorych radyjostancyjach. Partnioram Mincoŭ pa hetym biznesie staŭ były spartyŭny funkcyjanier i biznesmien Siarhiej Ciacieryn.
U Dubai ŭ śpiavački jość apartamienty z tryma spalniami ŭ kompleksie Marina Gate II na ŭjeździe ŭ Dubaj z vyhladam na Piersidski zaliŭ. Ahulnaja płošča — 168 kvadratnych mietraŭ. Acenačny košt nieruchomaści — 666 tysiač dalaraŭ.
Jašče adna znakamitaść, jakaja atabaryłasia ŭ Dubai, — Michaił Hraboŭski. Jon ličycca samym vynikovym biełaruskim hulcom u historyi paŭnočnaamierykanskaj Nacyjanalnaj chakiejnaj lihi. U 2016 hodzie paśla čarhovaj traŭmy Hraboŭski pierastaŭ vychodzić na lod, z tych časoŭ zorku NCHŁ stali bačyć u kampanii z Łukašenkam. Jon navat pačaŭ vystupać za jaho amatarskuju chakiejnuju kamandu. Hraboŭskamu naležyć dvuchspalnaja kvatera ahulnaj płoščaj 181 kvadratny mietr. Jana znachodzicca na štučnym vostravie Pałm-Džumiejra. Acenačny košt apartamientaŭ Hraboŭskaha — 716 tysiač dalaraŭ.
Ciapier čytajuć
«Jak tolki čujuć pra Rasiju — dyk usio… U čym prablema?» U Minsku nie chočuć zdavać kvateru čałavieku z rasijskim pašpartam5
Kamientary