Ad siońnia sankcyi ŭ dačynieńni da rasijskaha tranzitu praź Litvu ŭ Kalininhrad pašyrajucca na cemient i śpirt
Z 10 lipienia ŭstupaje ŭ siłu zabarona na ŭvoz cemientu, śpirtu i šerahu inšych tavaraŭ rasijskaha pachodžańnia na terytoryju Jeŭrasajuza, praduhledžanaja čaćviortym pakietam sankcyj ES. Abmiežavańnie zakranie i tranzit u Kalininhrad, choć raniej kazałasia, što ŭ novym tłumačeńni ab prymianieńni sankcyj ad Jeŭrakamisii mohuć źjavicca vyklučeńni, piša delfi.lt.
Na sajcie Ministerstva zamiežnych spraŭ Litvy, pryśviečanym realizacyi mižnarodnych sankcyj, padkreślivajecca, što naziemny tranzit pamiž Kalininhradskaj vobłaściu i inšymi častkami Rasiejskaj Fiederacyi nie spynieny i nie zabłakavany.
«Tranzit pasažyraŭ i hruzaŭ, jakija nie patrapili pad sankcyi ES, praciahvajecca. Litva nie ŭvodziła nijakich adnabakovych, indyvidualnych ci dadatkovych abmiežavańniaŭ na hety tranzit», — adznačajecca tam.
Taksama tłumačycca, što Litva, jak i inšyja krainy — členy ES, prymianiaje abmiežavalnyja miery, pryniatyja ES. Čaćviorty sankcyjny pakiet ES, pryniaty 15 sakavika 2022 h., uvioŭ abmiežavalnyja miery na impart i transparciroŭku stali i inšych vyrabaŭ z čornych mietałaŭ i mieŭ na ŭvazie skasavańnie takich dahavoraŭ, zaklučanych da ŭstupleńnia sankcyj u siłu — da 17 červienia 2022 hoda.
U MZS nahadvajuć, što z 10 lipienia 2022 hoda ŭvachodzić u dziejańnie zabarona na ŭvoz i transparciroŭku cemientu, śpirtu i inšaj pradukcyi. U dakumiencie adznačajecca, što Rasija atrymlivaje ad hetych tavaraŭ značny dachod i dziakujučy hetamu moža ažyćciaŭlać dziejańni, jakija destabilizujuć situacyju va Ukrainie.
Čarhovaje pašyreńnie abmiežavańniaŭ čakajecca 10 žniŭnia 2022 hoda, kali pavinna ŭstupić u siłu zabarona na vuhal i inšyja vidy ćviordaha vykapniovaha paliva. Z 5 śniežnia 2022 hoda i ŭ lutym nastupnaha hoda sankcyi JEZ taksama pavinny raspaŭsiudzicca na rasijskuju naftu i adpaviednyja naftapradukty (z asablivymi ŭmovami).
«Tolki try čałavieki buduć viedać pra vas. Samy pieršy čałaviek krainy». Źjavilisia zapisy razmoŭ špijonki Iny Kardaš z kurataram13
«Tolki try čałavieki buduć viedać pra vas. Samy pieršy čałaviek krainy». Źjavilisia zapisy razmoŭ špijonki Iny Kardaš z kurataram
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2020
Kamientary