Palot fantazii Ejsmanta: «U Brytanii dziaciej vučać siabravać ź piedafiłami»
BT vypuściła šakujučuju navinu: u Vialikabrytanii z dapamohaj śpiecyjalnych brašur dziaciej vučać nie bajacca piedafiłaŭ, a siabravać ź imi.
Telekanał, na čale jakoha staić Ivan Ejsmant — muž Natalli Ejsmant, pres-sakratarki Alaksandra Łukašenki — u svajoj fejkavaj navinie pryvodzić tekst «brašury»: «Što rabić, kali da ciabie padyšoŭ nieznajomy na vulicy? Nie treba jaho bajacca, zvyčajna jon nie zrobić tabie ničoha drennaha. Nie treba kryčać i płakać, heta moža abrazić pačućci nieznajomca. Nie nazyvaj jaho piedafiłam, heta słova łajankavaje. Pasprabuj spaznać jaho lepš. Jon prosta choča zavieści sabie novych siabroŭ, jak ty. Zaprasi jaho da siabie. Ty nie možaš sabie ŭjavić, jakim viasiołym moža być tvoj novy siabar».
Ale adkul BT pra heta daviedałasia? Moža, u ich źjavilisia karespandenty ŭ Brytanii? Usio našmat praściej — biełaruskija prapahandysty ŭziali hetuju navinu z rasijskaha sajta «Caŕhrad».
Nasamreč, nichto ŭ Brytanii nie vučyć dziaciej siabravać ź piedafiłami. Naadvarot, brytanskich dziaciej u škołach i sadkach vučać, jak ich paźbiahać i nie stać ich achviarami, jak abaranić siabie ad piedafiłaŭ. Navina — absalutny fejk.
Tłumačym čamu.
Pieršaja detal, na jakuju my źviartajem uvahu ŭ «brytanskaj brašury» — poŭnaja adsutnaść łahatypa albo ŭlikovych danych arhanizacyi, jakaja jaje apublikavana. Niama nijakich dokazaŭ (akramia movy) taho, što hetaja brašura sapraŭdy była apublikavanaja ŭ Brytanii i što jana sapraŭdy vykarystoŭvajecca va ŭstanovach adukacyi.
Vidavočna, što kali b hetaja brašura była ad aficyjnaj ustanovy, to aŭtary byli b pieršymi zacikaŭlenyja ŭ demanstracyi łahatypa. Ale ničoha padobnaha niama. Heta brašura, jakuju moh by zrabić chto zaŭhodna i ŭ luboj krainie.
Nastupnaja detal — Google dazvalaje šukać krynicu vyjavy. I ŭvieś pošuk pa pieršakrynicach hetych malunkaŭ viadzie vyklučna na rasijskija prapahandysckija sajty-śmietnicy. Foty raspaŭsiudžvaje vyklučna rasijskaja sietka dezynfarmacyi, častkaj jakoj łukašysty zrabili biełaruskija dziaržaŭnyja ŚMI.
Pry ŭvodzie ŭ Google nazvy brašury nie vyskokvaje nivodnaha vyniku, jaki paćviardžaŭ by, što brašura raspaŭsiudžvajecca ŭ dziciačych sadkach Vialikabrytanii.
Hety fejk — standartnaja rasijskaja kampanija dezynfarmacyi dla dyskredytacyi krain Zachadu i raspalvańnia varožaści da inšych narodaŭ.
Kamientary