«Dla nas jak nacyi važna pašyrać svaju prysutnaść». Irena Kaciałovič — pra zaprašeńnie ŭ žury kinapremii «Załaty hłobus»
Upieršyniu hramadzianin Biełarusi staŭ členam žury prestyžnaj premii «Załaty hłobus», jakuju štohod uručajuć u ZŠA. Irena Kaciałovič kaža, što, nasamreč, pra heta nie maryła, bo jak kinakrytyk i čałaviek jana addaje pieravahu inšamu, — aŭtarskamu kino.
Irena raspaviadaje, što daviedałasia pra zaprašeńnie ŭ žury ź lista na elektronnuju poštu za podpisam prezidentki HFPA Chelen Chone, «z paćviardžeńniem, vinšavańniem i stosam prymacavanych dakumientaŭ, jakija treba było pračytać ci padpisać».
Zaprašeńnie novych siabroŭ žury «Załatoha hłobusa» — razavaja inicyjatyva, zładžanaja vyklučna da 80-j cyrymonii.
«Napeŭna, heta było spravakavana krytykaj, jakoj apošnim časam padviarhajecca Halivudskaja asacyjacyja zamiežnaj presy za niedastatkovuju raznastajnaść u kołach tych, chto prysudžaje adnu z hałoŭnych premij u śviecie vialikaha kamiercyjnaha kino», — miarkuje Irena.
U pošuku novych siabroŭ asacyjacyja źviarnułasia ŭ tym liku da Mižnarodnaj fiederacyi kinapresy (FIPRESCI), udzielnicaj jakoj Kaciałovič źjaŭlajecca. Irena vykazała svaju zacikaŭlenaść, a voś što dalej adbyvałasia ŭ kułuarach, jak prachodziła zaćviardžeńnie kandydatury, jana nie viedaje.
U Halivudskuju asacyjacyju zamiežnaj presy (HFPA) uvachodzić kala sta čałaviek, jašče 103 siabra žury, jakija nie źjaŭlajucca členami asacyjacyi, dadalisia dla arhanizacyi 80-j premii.
Pavodle Kaciałovič, hramadzianie Biełarusi nie byli ŭ žury, chacia biełarusy ZŠA ci inšych krain — całkam mahčyma.
Žurnalistka raspaviadaje, što ŭ Łos-Andželes nie pajedzie: siabry žury nie zaprošanyja na cyrymoniju ŭručeńnia. «Asacyjacyja płanuje šerah mierapryjemstvaŭ u Jeŭropie, ale padrabiaznaści hetaha pakul nieviadomyja», — kaža jana.
Takoje biesprecedentnaje zaprašeńnie dla Ireny cikavaje i tym, što jak siabra žury jana atrymlivaje dostup da vializnaj kolkaści filmaŭ.
«Sa mnoj užo skantaktoŭvajucca studyi, uładalniki aŭtarskich pravoŭ, kab supravadzić dostupam da anłajn-prahladaŭ, i ich stolki, što pakul składana navat achapić», — kaža jana.
A jašče joj važna toje, što Biełaruś i pradstaŭniki Biełarusi źjaŭlajucca ŭ mižnarodnych inicyjatyvach, u tym liku takich «hlancavych» padziejach.
«Dla nas jak nacyi važna pašyrać svaju prysutnaść, pryčym ź biełaruskim samavyznačeńniem», — padsumoŭvaje Irena.
Irena Kaciałovič — biełaruski kinakrytyk, kulturny žurnalist, člen Mižnarodnaj fiederacyi kinapresy FIPRESCI. Uvachodziła ŭ skład žury na kinafiestyvalach u Biełarusi, Hiermanii, Charvatyi, Polščy. Pracavała ŭ redakcyi «Našaj Nivy», ciapier pracuje na telekanale «Biełsat».
«Załaty hłobus» — amierykanskaja kinapremija, jakuju z 1944 hoda ŭ Łos-Andželesie prysudžaje Halivudskaja asacyjacyja zamiežnaj presy za pracy ŭ kinafilmach i televizijnych karcinach. Uznaharoda ŭručajecca kožny hod u studzieni pa vynikach hałasavańnia kala 90 mižnarodnych žurnalistaŭ, jana ličycca adnoj z samych prestyžnych u kinaindustryi i druhoj pa značnaści paśla «Oskara».
Čytajcie taksama:
Biełaruskaja žurnalistka ŭvajšła ŭ žury prestyžnaj kinapremii «Załaty hłobus»
Čym žyvie biełaruski kinaprakat? Analizujem afišu
6 biełaruskamoŭnych jutub-kanałaŭ, jakija vy mahli prapuścić
Ina Kulej: Milinkievič pieramoh śmierć, ale šlach da poŭnaha adužańnia niablizki4
Kamientary