Pradstaŭnik Abjadnanaha pierachodnaha kabinieta pa pytańniach abarony i biaśpieki zajaviŭ, što nielha dapuścić, kab Biełaruś vajavała z Ukrainaj.
«Kiraŭnictva Rasii sprabuje ŭciahnuć ŭ svaju vajnu Biełaruś, — skazaŭ Sachaščyk. — Što čakaje nas, kali im heta ŭdasca? U hetym pytańni ja mahu vystupać u roli ekśpierta, bo pravioŭ va Ukrainie niamała času z kanca lutaha.
Ukraincy vielmi dobra padrychtavanyja da napadu z boku RB. Žychary Biełarusi hatovyja prymać svaich synoŭ u čornych polietylenavych pakietach?
Dla USU ŭžo nie budzie nijakich strymlivajučych faktaraŭ, jakija zaminajuć prymianić usiu moc samych sučasnych srodkaŭ paražeńnia pa lubych abjektach, što vykarystoŭvajucca ahresarami na terytoryi RB.
Na praciahu pieršych niekalkich sutak buduć źniščanyja Mazyrski NPZ, usia krytyčnaja infrastruktura pamiežnaj pałasy. Moža zahinuć i paciarpieć vialikaja kolkaść ludziej.
Kolkaść našych dobraachvotnikaŭ va Ukrainie istotna vyraście. Vajskoŭcaŭ US RB buduć sustrakać svaje ž biełarusy, tolki značna lepš padrychtavanyja, abstalavanyja i matyvavanyja.
Biełaruś stanie krainaj-izhojem u śviecie i padzielić z Rasijaj hańbu paražeńnia i abaviazak vypłaty reparacyj.
Usie vojny zakančvajucca. Chłuśnia prapahandy, manipulavańnie faktami pierastanuć pracavać. Kim vy budziecie ŭ hetaj budučyni? Pavažanymi členami hramadstva abo fihurantami mižnarodnaha trybunała?
Ludzi ŭ vajenna-palityčnym kiraŭnictvie Biełarusi, ad vas zaležyć budučynia našaj krainy jak nikoli. Ukraina ni razu nie adkazała na rakiety i bieśpiłotniki, jakija laciać z terytoryi RB, choć daŭno maje bajavy patencyjał dla takoha adkazu. Pieršyja zabityja i paranienyja biełarusy pasvarać našy narody na dziesiacihodździ.
Zaklikaju vas uśviadomić usiu surjoznaść taho, što adbyvajecca i žudasnyja mahčymyja nastupstvy. Kožny z nas — chaj u roznaj stupieni — ale moža paŭpłyvać na budučyniu Biełarusi», — kaža Sachaščyk.
Ciapier čytajuć
Amierykancy dabilisia vyzvaleńnia Juryja Ziankoviča. Jon byŭ prysudžany da 11 hadoŭ źniavoleńnia13
Kamientary