Šale, hłempinh i chatki na drevach. Top niezvyčajnaha žylla dla adpačynku ŭ Biełarusi
Kab pieraklučycca, nieabaviazkova jechać u hory — možna spynicca ŭ Biełarusi kala voziera abo siarod lasoŭ. «Naša Niva» pahladzieła, jakoje niezvyčajnaje i ŭtulnaje žyllo možna arandavać u miežach krainy.
Siadziba ŭ skandynaŭskim styli
Hety domik znachodzicca ŭsiaho za 25 km ad Minska. Interjer aformleny ŭ minimalistyčnym skandynaŭskim styli, u domie ciopłyja padłohi, usie vyhody. Niepadalok ad siadziby — vadaschovišča, navokał drevy i cišynia. Aproč taho, možna schadzić na kulinarnyja majstar-kłasy, u łaźniu i na johu.
Ceńnik za sutki ŭ budni — 220 rubloŭ, u vychodnyja — 240 rubloŭ na dvaich abo 260 na čaćviarych.
Domik z džakuzi na dvary
Siadziba znachodzicca taksama niepadalok ad stalicy, u Smalavickim rajonie. Vielmi pryvablivaje kuchnia z panaramnym vidam na sažałku.
Taksama usie vyhody, łaźnia na drovach i navat ułasnaje džakuzi. Akramia taho, arandatary buduć mieć svoj panadvorak z arelami, šezłonhami, sadovaj meblaj, kazanom i manhałam.
U budni taki domik kaštuje 150$ za sutki, u subotu — 200$. Dvoje sutak — 300$.
Dom-trochkutnik siarod lesu
Taki modny dom mieścicca ŭ Nalibockaj puščy, za 86 km ad Minska. Akramia ŭtulnaha i minimalistyčnaha interjeru, haściej A-frame doma čakajuć šklanaja ściana ź vidam na 300-hadovy dub, terasa z hamakami i kresłami-kokanami i manhalnaja zona. U chacie jość duš, tualet, rukamyjnica, fien, ručniki i srodki pa dohladzie cieła.
Haspadary łajalnyja dla chatnich žyvioł, a kali ŭ vas ich niama, pobač z domam vy abaviazkova sustreniecie kocikaŭ.
Sutki pražyvańnia kaštujuć 250 rubloŭ na dvaich abo 300 rubloŭ na čaćviarych.
Dom na drevie
Da hetaj redkaj znachodki — 80 km ad Minska. Dom raźličany na 2—6 čałaviek. Akramia pabudovy, haściam budzie dastupny asobny izalavany ŭčastak z vychadam da raki, zonaj barbiekiu i terasaj. U chacie jość elektryčnaść i prastorny bałkon.
Akramia hetaha, haściam dastupny taksama susiedni dom z sanvuzłom, mini-kuchniaj, pakojem z kaminam i prastorny hłempinh-namiot z łožkam king size i ŭłasnaj terasaj.
Sutki ŭ budni kaštujuć 350 rubloŭ, u vychodnyja — 500. Kali braniravać ceły ŭikend, to 800 rubloŭ.
Hłempinh
Hłempinh — heta raznavidnaść kiempinha, jakaja abjadnoŭvaje ŭ sabie kamfort haściničnaha numara z mahčymaściu adpačynku na pryrodzie. Voś jak jon vyhladaje. Ranicaj vydatny vid na voziera, dniom — na jarki piejzaž, a ŭviečary na zorki i ahieńčyki šatra.
U domiku-namiocie jość łožak king size, posud, elektryčnaść, mini-chaładzilnik i abahravalnik. Zvonku — terasa z kresłami, manhał i pledy. Hłempinh raźmieščany ŭsiaho za 18 km ad Minska.
Košt arendy na sutki — ad 250 rubloŭ.
Utulnyja pravans-domiki
Heta prykład taho, jak zvyčajnyja viaskovyja chaty možna pieratvaryć u instahramnuju maru, dziakujučy detalam i zachavańniu aŭtentyčnaści. Tak zrabili haspadary dvuch damoŭ u Hrodzienskaj vobłaści.
Pieršy dom nazyvajecca «Choma». Pobač les, 3 km da Biareziny, 2 km da Niomana. Dom z sapraŭdnym viaskovym kałarytam i haradskimi vyhodami.
Pieč, kuchnia, duš i tualet — usio heta jość u domie, a na dvary dobraŭparadkavana ŭtulnaja manhalnaja zona z łaŭkami i stałom ź vidam na zachad sonca.
Druhaja chatka pad nazvaj «Kaziulčyn dom» — u cichim žyvapisnym miescy na bierazie Niomana. Tut taksama jość usie vyhody, a na dvary — altanka i manhał.
Sutki ŭ pieršym domiku kaštujuć 100 rubloŭ, u druhim — 125.
Dom nad vadoj
Chatka znachodzicca ŭ Puchavickim rajonie na bierazie nievialikaj sažałki — lubavacca vidami možna z adnaho z dvuch bałkonaŭ. Unutr viaduć šyrokija draŭlanyja ŭschody z parenčami.
Ścieny i dach uciepleny, jość pieč-kamin na drovach, hukaizalacyja ad daždžu, kampaktnaja kuchonnaja zona, duš i bijaprybiralnia.
Arenda doma ŭ vychodnyja abydziecca ŭ 250 rubloŭ za sutki, kali zabraniravać adrazu dvoje sutak — 400. U budni dajucca źnižki ŭ 20%.
Ciapier čytajuć
Paśla pajezdki za miežy ES tajamniča źnik Anatol Kotaŭ, byłaja pravaja ruka Paŭła Łatuški52
Kamientary
prabačcie
chatki takija ničoha. a na košty nie hladzieła... kudy zaraz pajedzieš? dziela čaho? nie da taho (