Partyja byłoha premjer-ministra Izraila Bińjamina Nietańjachu pieramahła na pazačarhovych vybarach u Knesiet, jakija adbylisia 1 listapada, i hety palityk, chutčej za ŭsio, paśla paŭtarahadovaha pierapynku znoŭ uznačalić krainu.
Ciapierašni premjer-ministr Izraila Jair Łapid užo pavinšavaŭ Nietańjachu ź pieramohaj:
«Dziaržava Izrail vyšej za lubyja palityčnyja mierkavańni, i ja žadaju Nietańjachu pośpiechu dziela naroda Izraila i dziaržavy. <…> Ja prainstruktavaŭ usie padraździaleńni ofisa premjer-ministra padrychtavacca da pieradačy ŭłady».
Čakajecca, što błok z udziełam partyi Nietańjachu «Likud» atrymaje jak minimum 64 miescy sa 120 u Knesiecie. Kaalicyja z udziełam partyi Łapida «Ješ Acid» atrymaje 50 ci 51 miescaŭ.
Bińjamin Nietańjachu syšoŭ z pasady premjer-ministra ŭ 2021 hodzie paśla 12 hadoŭ znachodžańnia na čale ŭrada. Ale hodam paźniej kaalicyja, jakaja damahłasia adchileńnia jaho ad ułady, raspałasia, i byli pryznačanyja pazačarhovyja vybary — piatyja z krasavika 2019 hoda.
Pry hetym Nietańjachu prachodzić abvinavačanym pa troch kryminalnych spravach, źviazanych z chabarnictvam, machlarstvam i złoŭžyvańniem davieram.
Dla našaha rehijona najbolš važna i cikava, jakuju pazicyju zojmie Nietańjachu adnosna rasijska-ŭkrainskaj vajny. Kali jon byŭ raniej premjeram, to padtrymlivaŭ dobryja adnosiny z Uładzimiram Pucinym, ale ŭ ciapierašniaj źmienienaj situacyi nie abaviazkova da ich vierniecca. U adnym ź niadaŭnich intervju, prynamsi, jon abiacaŭ u vypadku prychodu da ŭłady pačać dapamahać Ukrainie zbrojaj.
Kamientary