«Takaja bliskučaja apieracyja, ašukali samoha Trampa: parvali nam pašparty, — iranizuje prafsajuzny lidar Alaksandr Jarašuk. — Ale my vierniemsia ŭ Biełaruś pieramožcami, niahledziačy na tyja parvanyja pašparty».
Siły nam nadavała adčuvańnie, što my praciahvajem słaŭnuju šmatviekavuju historyju biełaruskaha naroda, skazaŭ jon.
74-hadovy prafsajuzny lidar nazvaŭ kałoniju ŭ Škłovie, dzie jaho ŭtrymlivali, «fabrykaj katavańniaŭ». Jon abvinavaciŭ načalnika hetaj kałonii pałkoŭnika Karnijenku ŭ naŭmysnaj arhanizacyi hetych katavańniaŭ.
Jarašuk taksama skazaŭ, što naziraŭ: hetyja siłaviki i kahebisty, jakija im zajmalisia, nasamreč strašna bajacca i chavajuć tvary pad maskami.
«Ja zrazumieŭ, što jany, nasamreč, bajacca. Jany bajacca, tamu što, kali my jechali ŭčora z hetymi kadebešnikami, kali my byli na svaich zonach, u svaich turmach. […] Ja bačyŭ uvieś čas: i ŭ zonie, i ŭ turmie, i ŭčora — tolki maski, maski, maski! Ni adnaho tvara. Chto haspadar u krainie? Davajcie spytajem siabie. Jany haspadary? A čaho ž jany bajacca?
Tamu što jany viedajuć, što jany siońnia, nasamreč, apantanyja stracham. Jany viedajuć, što rana ci pozna za ŭsio pryjdziecca adkazvać. I ŭ tym liku za tyja pašparty, jakija jany skrali.
Napeŭna, Łukašenka ich uznaharodzić za takuju bliskučuju apieracyju nad nami, voś što jany ašukali nie tolki nas, ale i Trampa, i Złučanyja Štaty, i Jeŭrapiejski Sajuz. Nu, dziakujem, chaj nadalej praciahvajuć.
My zaraz tut, my pazbaŭlenyja hramadzianstva, my nie možam viarnucca ŭ Biełaruś. Ale ja chaču vas zapeŭnić: my tudy pryjdziem! My pryjdziem tudy, tamu što my sapraŭdnyja haspadary našaj krainy, našaj lubaj Biełarusi! I dziela jaje nie paškadujem ničoha, i svajho ŭłasnaha žyćcia».
Alaksandr Jarašuk da aryštu byŭ staršynioj Biełaruskaha kanhresu demakratyčnych prafsajuzaŭ.
Jon naradziŭsia ŭ Kamianieckim rajonie i da pačatku 2000-ch pracavaŭ na roznych pasadach, źviazanych ź sielskaj haspadarkaj: zahadčykam adździeła ahrarnaj palityki CK KPB, namieśnikam načalnika hałoŭnaha ŭpraŭleńnia Ministerstva sielskaj haspadarki i charčavańnia, pieršym namieśnikam staršyni Minskaha abłvykankama, staršynioj abłasnoha kamiteta pryrodnych resursaŭ.
Z 1999 hoda ŭznačalvaŭ prafsajuz rabotnikaŭ APK u składzie FPB. U 2001 hodzie sprabavaŭ bałatavacca na prezidenta, ale nie byŭ zarehistravany.
19 krasavika 2022 hoda doma ŭ Jarašuka i na jahonaj pracy prajšli vobšuki, jaho zatrymali i źmiaścili ŭ SIZA. Spačatku prafsajuznaha dziejača abvinavacili pa art. 342 KK (hrupavyja dziejańni, što parušajuć hramadski paradak), paźniej — pa art. 361 (zakliki da sankcyj).
20—26 śniežnia 2022 hoda ŭ Minskim haradskim sudzie adbyŭsia sud, dzie Jarašuk atrymaŭ 4 hady kałonii ahulnaha režymu. U sakaviku 2023 h. jaho pieraviali ŭ mahiloŭskuju turmu № 4, paśla — u kałoniju № 17 u Škłovie.
Ciapier čytajuć
«Zabrali jaho. Nie kinieš ža, usio ž taki naš čałaviek». Łukašenka vykazaŭsia pra Statkieviča19
«Zabrali jaho. Nie kinieš ža, usio ž taki naš čałaviek». Łukašenka vykazaŭsia pra Statkieviča
«U vyniku jon skazaŭ mnie: «Chopić mianie šantažavać, ja chaču palubavacca hetymi drevami». Aksana Kołb raskazała, pra što razmaŭlała sa Statkievičam na miažy88
Kamientary