«Najlepšaja vulica» ŭ Minsku zakryłasia ŭsiaho praz paru miesiacaŭ paśla adkryćcia
U kancy leta ŭ dvoryku Minskaha hadzińnikavaha zavoda «Pramień» źjaviłasia novaje miesca z vuličnaj ježaj — «Najlepšaja vulica». Arhanizatary anansavali, što jana budzie pracavać ceły hod, ale, miarkujučy pa ŭsim, niešta pajšło nie tak. I kali pierad adkryćciom novaha modnaha prajekta pra jaho havaryli ŭsie, to jaho raptoŭnaje zakryćcio zastałosia amal niezaŭvažanym. Vydańnie CityDog.io pasprabavała razabracca, što adbyłosia.
Jak usio pačynałasia: ažyjataž u ŚMI i niekalki pieranosaŭ adkryćcia
U pačatku lipienia dvoryk zavoda «Pramień» kala parku Čaluskincaŭ stali aktyŭna razmaloŭvać hrafici i murałami, a ŭ Instagram źjaviŭsia akaŭnt novaha fudkorta. Tam raźmiaścili post ab nabory apierataraŭ i anansavali chutkaje adkryćcio.
Čakańniaŭ ad novaha prajekta ŭ minčukoŭ było šmat: jarkaje miesca ŭ styli łacinaamierykanskich kvartałaŭ, dzie abiacali karmić, paić, arhanizoŭvać mierapryjemstvy i, u adroźnieńnie ad kankurentaŭ, pracavać kruhły hod. Fudkort pavinien byŭ stać novym punktam pryciahnieńnia.
Cikavaść padahravali ŚMI i błohiery, jakija rabili šmat ahladaŭ i byccam znarok ukidvali roznyja daty adkryćcia. Spačatku kazali, što prajekt zapracuje 22 lipienia, potym źjaviłasia infarmacyja, što fudkort adkryjuć 1 žniŭnia — ale hetaha nie adbyłosia. U vyniku «Najlepšaja vulica» pačała prymać naviedvalnikaŭ 12 žniŭnia — ale ŭ testavym režymie.
Za pieršyja try dni pracy ŭ testavym režymie, pa źviestkach arhanizataraŭ, fudkort naviedali kala 20 000 čałaviek. Datu aficyjnaha adkryćcia abiacali paviedamić paźniej i arhanizavać z hetaj nahody mierapryjemstva z vystupleńniami artystaŭ, kavier-bendaŭ i majstar-kłasami, ale, mabyć, vyrašyli, što heta ŭžo nie aktualna.
Što adbyvałasia na vulicy na praciahu hetych dvuch miesiacaŭ?
Na etapie zapusku «Najlepšaj vulicy» anansavali, što naviedvalnikaŭ buduć čakać 28 fudtrakaŭ — ad jeŭrapiejskaj da kubinskaj kuchniaŭ, ale ŭ vieraśni ich pracavała ŭsiaho 15. Pryčym u kamientaryjach pad Instagram-pastami minčuki narakali, što, niahledziačy na abvieščany režym pracy z 12 dnia, u hety čas šmat ustanoŭ zastavalisia začynienymi — i navat praź niekalki hadzin adčynialisia nie ŭsie. Dy i sam čas pracy vulicy padkarektavali: kali pieršapačatkova zajaŭlali, što čakajuć haściej štodnia z 12:00 da 02:00, to paźniej stali začyniacca ŭ 23:00.
Niahledziačy na heta, za dva miesiacy ź liškam na «Najlepšaj vulicy» paśpieli pravieści Bačata open air, Family days z animatarami i konkursami, modny pakaz biełaruskich dyzajnieraŭ, «Harošak markiet» i niekalki zakrytych mierapryjemstvaŭ. Pa vychadnych tut ihrali dydžei i kavier-bendy, arhanizoŭvali hulni i karaokie, pakazvali žyvyja tranślacyi futbolnych matčaŭ. Prajšło i niekalki kinapakazaŭ, ale potym ich raptam admianili pa techničnych pryčynach.
A 13 kastryčnika ŭ akaŭncie prajekta raptam źjaviłasia nastupnaje paviedamleńnie: «Siabry, «Najlepšaja vulica» sychodzić na vakacyi! Z 15 kastryčnika my zakryvajem našu bramu da novaha siezona, ale abaviazkova vierniemsia na navahodnija śviaty. A sustreniemsia z vami ŭžo nastupnaj viasnoj z abnaŭleńniami. Sačycie za nami ŭ sacyjalnych sietkach, kab nie prapuścić kaladnyja akcyi i hulańni».
Što mahło pajści nie tak: «Minsku ciapier treba nie bolš za adnu vuličnuju fud-placoŭku»
CityDog.io źviarnuŭsia pa kamientaryj da «Najlepšaj vulicy», ale na jaho zapyt nie adkazali. Tamu vydańnie paprasiła vykazać mierkavańnie, što mahło pajści nie tak, adnaho ź minskich restarataraŭ, jaki pažadaŭ zastacca ananimnym.
Hety ekśpiert dapuściŭ, što placoŭka mieła prablemy ź jakaściu i stabilnaściu ježy, dy i ŭvohule horadu ciapier nie treba bolš za adnu vuličnuju fud-placoŭku. Napeŭna i siezon byŭ nie samy ŭdały, bo vosieńskaje nadvorje nie spryjała, i miesca nie zusim dobraje, bo z adnaho boku ŭ piešaj dastupnaści niama vialikich sučasnych kvartałaŭ, a dla naviedvańnia takich prajektaŭ vielmi važnaja maładaja aŭdytoryja, z druhoha ž — heta nie centr.
Adnosna ž taho, što ludziam u ciapierašnich realijach moža być naohuł nie da ježy i zabavaŭ, restaratar adkazaŭ, što ŭ pryncypie ludziam zaŭsiody da ježy, pytańnie tolki dzie i za kolki. A taki farmat prosta nie vielmi aktualny dla našych šyrot. U nas nie tak šmat ciopłych miesiacaŭ, kab jeści na vulicy było kamfortna. Da taho ž i ceny na fud-placoŭkach časta nie nadta adroźnivajucca ad cenaŭ va ŭstanovach z poŭnym servisam i kamfortam.
Što ž tyčycca takich minskich prajektaŭ, jak «Piasočnica» ci Lidbeer Dvor, jakija dastatkova paśpiachova pracujuć užo nie pieršy siezon, to, na dumku ekśpierta, Lidbeer Dvor maje biudžet na padtrymku prajekta ŭ ciažkija miesiacy, a «Piasočnica» była pieršaj i doŭha adzinaj — tamu stała lehiendaj i hłyboka zasieła ŭ śviadomaść ludziej. A voś u «Najlepšaj vulicy» ni pieršaha, ni druhoha ŭ aktyvie nie było, tamu jana i nie vytrymlivaje kankurencyi.
Kamientary