«Zaviali spravu za mietałałom». Raźbirajemsia, jaki łom možna zdavać, a za jaki moža prylacieć
Milicyja pieryjadyčna paviedamlaje pra zatrymańnie ludziej, jakija vieźli mietałałom u narychtoŭčuju kantoru. Abvinavačvajuć u niezakonnaj pradprymalnickaj dziejnaści. Raskazvajem, što zdavać možna, a što — nie.
Zakanadaŭstva nie zabaraniaje zdavać bytavy łom, ale…
Ludziam nie zabaroniena zdavać narychtoŭčym arhanizacyjam bytavy łom — heta toj, jaki ŭtvaryŭsia ŭ vyniku haspadarčaj dziejnaści. Jaho dazvalajecca pryvozić z ułasnaha dvara ŭ lubym abjomie.
Narychtoŭčyja kantory nie ŭsio prymajuć. Śpis dazvolenaha vyznačaje pałažeńnie «Ab paradku zakupki łomu i adchodaŭ čornych i kalarovych mietałaŭ u nasielnictva». U im pradmiety chatniaha ŭžytku i bytavoj techniki. Akramia taho, narychtoŭcy zabiaruć lehkavyja i hruzavyja aŭtamabili, pryčepy, sielskahaspadarčuju techniku, čaŭny i inšyja rečy, paznačyŭšy ich danyja dy pašpartnyja źviestki ŭładalnika.
Kali «ŭłasnaha mietałałomu» zašmat, to mohuć źjavicca pytańni ŭ orhanaŭ, tamu varta być hatovym davieści adkul jon.
«U tym i prykoł, što treba dakazać, što hety mietał z tvajho doma, aharoda, haraža, — apaviadaje adzin z pakaranych. — U mianie takaja situacyja była. Jechaŭ zdavać. Spyniła DAI. Na štrafstajanku pryčep. Praź miesiac byŭ sud, jaki aštrafavaŭ mianie na 31 rubiel, i 700 kiłahramaŭ mietału kanfiskavali. Heta sprava vypadku».
Dzie nielha źbirać mietałałom, i što stvaraje pahrozy
Źbirańnie fizičnaj asobaj mietałałomu na zvałkach, u zakinutych pramysłovych budynkach dla zdačy narychtoŭčym arhanizacyjam ličycca niezakonnaj pradprymalnickaj dziejnaściu. Inšymi słovami, kali čałaviek pryciahnie kanalizacyjny luk, častki pramysłovaha ahrehata, vialiki matok drotu, to jaho samoha «zdaduć».
U narychtoŭčaj kantory rehistrujecca fakt zdačy mietałałomu. Kali druhasnuju syravinu zdaje adzin čałaviek nieadnarazova, to heta moža być rasceniena jak pradprymalnickaja dziejnaść. Kali na jaje niama dazvołu, to čakajcie prablemaŭ.
Zhodna z zakanadaŭstvam, hramadzianie metanakiravana narychtoŭvać i skuplać mietałałom nie mohuć. Takaja dziejnaść ličycca niezakonnaj i karajecca štrafam da 100 bazavych vieličyniaŭ (3200 rubloŭ) z kanfiskacyjaj mietałałomu (častka 1-1 art. 12.7 KoAP).
Kali dachod ad realizacyi kanfiskavanaha mietałałomu pieravysić 1000 bazavych vieličyń (pa stanie na siońnia 32 000 rubloŭ), karać buduć užo pavodle art. 233 Kryminalnaha kodeksa, jaki praduhledžvaje da siami hadoŭ pazbaŭleńnia voli.
Kamu možna źbirać i skuplać mietałałom
U milicejskich zvodkach historyj z pakarańniami za niezakonnaje abaračeńnie mietałałomu niamała. Hieroj adnoj z apošnich, 28-hadovy žychar Mahilova, za paŭhoda naźbiraŭ bolš za 8 ton łomu. Zbyć jaho chacieŭ u narychtoŭčuju kantoru, ale chovanku na leciščy vykryli apieratyŭniki. Mužčyna trapiŭ pad administracyjny pieraśled, a mietałałom na sumu 2400 rubloŭ kanfiskavali.
Jak patłumačyŭ «Našaj Nivie» juryst, na źbirańnie abo zakup pramysłovaha łomu, adkidaŭ čornych i kalarovych mietałaŭ treba mieć licenziju. Jaje vydaje Ministerstva pramysłovaści zhodna z ukazam Łukašenki «Ab licenzavańni asobnych vidaŭ dziejnaści«.
«U Biełarusi prava na zakonnych padstavach ažyćciaŭlać takuju dziejnaść majuć pradpryjemstvy «Biełdrahmieta», narychtoŭčyja arhanizacyi «Biełkaapsajuza» i indyvidualnyja pradprymalniki, kali ŭ ich jość adpaviednaja licenzija», — davodzić ekśpiert.
Na abviestačnych internet-siervisach paviedamleńniaŭ z hatoŭnaściu kupić mietałałom bieźlič. Za kožnaj z prapanoŭ staić pradprymalnik, jaki maje licenziju.
U milicejskich zvodkach niamała historyjaŭ i z zatrymańniem naładavanych mietałałomam mašyn pablizu biełaruska-rasijskaj miažy. Ich zatrymlivajuć, kali ŭładalniki hruzaŭ nie majuć dakumientaŭ z dazvołam na vyvaz mietałałomu za miažu. Łom kanfiskujecca, a ŭładalnika štrafujuć. U susiedniuju krainu viazuć mietał, bo zakupnyja ceny na jaho tam vyšejšyja. Dla zakonnaha vyvazu mietału taksama treba mieć dazvoł.
U Vietkaŭskim rajonie dvoje biespracoŭnych razabrali most
Rabotnik trenažornaj zały skraŭ hanteli i zdaŭ na mietałałom, a ŭładalnik źbiŭ jaho
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj93
Kamientary