Novy vid machlarstva? Biełarusam prapanujuć adpačynak u nieisnujučym domie na drevie
Minčanka šukała miesca dla adpačynku, natrapiła na machlaroŭ i straciła 175 rubloŭ.
Adzin dzień ź vialikich listapadaŭskich vychadnych Ksienija (imia źmieniena) płanavała pravieści ŭ malaŭničym miescy za 100 kiłamietraŭ ad stalicy. Adnak adpačyć u «rajskim kutočku» ŭ jaje tak i nie atrymałsia, piša prajekt «1906».
Pra hetaje miesca dla adpačynku dziaŭčyna daviedałasia praź instahram. Heta była zvyčajnaja płatnaja rekłama, jakaja źjaŭlajecca ŭ stužcy.
Usia kamunikacyja čytački z «ułaśnikami» domika na drevie viałasia praz dyrekt. Nijakaha numara telefona ŭ profili paznačana nie było, jak i infarmacyi pra dakładnaje miescaznachodžańnie abjekta. Tym nie mienš, Ksienija nie źviarnuła na heta ŭvahi i pačała pierapisku z machlarami.
«Adkazali na moj zapyt davoli chutka, ja ŭdakładniła, ci volny domik na nieabchodnuju mnie datu. Tam adkazali, što jon dasiažny dla braniravańnia i ahučyli košt u 350 rubloŭ za sutki».
Dla taho kab zabraniravać domik, ad klijentaŭ patrabavali pieraličyć 175 rubloŭ na kartku ŭ jakaści pieradapłaty. Paśla taho, jak machlary atrymlivali hrošy, jany padćviardžali fakt broni, raśpisvali hadziny zajezdu i vyjezdu.
Taksama jany prasili za dva dni da zajezdu znoŭ napisać im u dyrekt, kab jany mahli vysłać kantakty čałavieka, jaki sustrenie i zasielić u dom. Samastojna znajści hetaje miesca, pa słovach machlaroŭ, nie atrymajecca.
Bližej da daty zajezdu čytačka paprasiła vysłać dakładnyja kaardynaty.
«Jany vysłali punkt na karcie, dzie prosta znachodziłasia niejkaja łužyna, adnak my nie nadali hetamu ŭvahi, bo padumali, što tam prosta vialikaja terytoryja», — kaža žančyna.
Ź ciaham času ŭ Ksienii ŭsio ž pačali źjaŭlacca zdahadki, što z hetym domikam na drevie adbyvajecca niešta dziŭnaje.
«U niejki čas u akaŭncie pravodzili rozyhryš, ale hety dopis źnik, a razam z dopisam źnikła mahčymaść pakidać kamientary. Aproč hetaha, źmianiłasia nazva akaŭnta. Spačatku heta byŭ newtree.house, a paźniej jon staŭ nazyvacca tree.house.by».
Apošni raz žančyna vychodziła na suviaź z machlarami za dva dni da zapłanavanaha zajezdu. Ranicaj Ksienija nahadała, što ŭ jaje broń na paślazaŭtra. Machlary adkazali joj tolki ŭviečary. Jany znoŭ nie dasłali žančynie nijakich kantaktaŭ, a tolki paprasili pakinuć svoj numar, kab pieradać jaho mieniedžarcy Valeryi, jakaja pavinna sustreć i pravieści da domika na drevie. Na suviaź z žančynaj nichto tak i nie vyjšaŭ. Na nastupny dzień machlary zabłakavali Ksieniju. Na hetym pierapiska skončyłasia.
Pieršaja publikacyja ŭ profili «Kazačnaha domika» źjaviłasia 26 vieraśnia. Apošni dopis u im apublikavali 7 kastryčnika.
Na našy paviedamleńni ŭ dyrekt nichto nie adkazaŭ.
Ksienija nie adzinaja, chto pieravioŭ hrošy hetym machlaram u nadziei na adpačynak. U instahramie ludzi vykładali skrynšoty hetaha profila i pisali, što taksama ŭnosili pieradapłatu, paśla čaho ich błakavali.
Kamientary