50% ukrainskich uciekačoŭ, jakija znachodziacca ŭ Niamieččynie, chočuć zastacca žyć u hetaj krainie, navat pa zakančeńni dvuch hadoŭ, paviedamiła vydańniu Deutsche Welle pradstaŭnica Fiederalnaj baćkoŭskaj sietki arhanizacyj mihrantaŭ za adukacyju i ŭdzieł (bbt) Natalla Rojśler.
Ukrainskija ŭciekačy ŭ Niamieččynie majuć prava na časovuju abaronu. Hety status pieršapačatkova dziejničaje dla ich na praciahu adnaho hoda, ale moža być padoŭžany dvojčy, kožny raz na šeść miesiacaŭ.
Pa danych Centralnaha rejestra zamiežnikaŭ (AZR), da listapada hetaha hoda kala 1,02 młn ukrainskich biežancaŭ zarehistravalisia ŭ orhanach ułady Hiermanii.
Kala 35% ź ich — dzieci i padletki va ŭzroście da 18 hadoŭ. Biežancy školnaha ŭzrostu, pa zakonie, abaviazany chadzić u niamieckuju škołu, jak i niamieckija dzieci. Zaraz škołu ŭ Hiermanii naviedvaje kala 201 tys. ukrainskich dziaciej i padletkaŭ.
Pry hetym u Hiermanii nie chapaje 30 tys. nastaŭnikaŭ. Ciapier u niamieckich škołach pracujuć 3 tys. ukrainskich nastaŭnikaŭ, ale ŭ asnoŭnym u jakaści dapamožnaha piedahahičnaha piersanału z bolš nizkaj apłataj.
Pieršapačatkova bolšaść biežancaŭ spadziavałasia, što zmoža chutka viarnucca dadomu. «Jany byli ŭschvalavanyja, siadzieli na valizkach, i ŭ ich nie było asablivaha žadańnia adpraŭlać svaich dziaciej u niamieckuju škołu», — cytuje DW Natallu Rojśler. Tym bolš, što dzieci mahli anłajn praciahvać navučańnie va ŭkrainskaj škole.
Ale situacyja mianiajecca. Ukrainskija dzieci pa-raniejšamu mohuć vučycca anłajn, ale z časam usio mienš dziaciej źviartajecca da hetych urokaŭ paśla navučalnaha dnia ŭ niamieckaj škole. Jak skazała DW ekśpiert pa adukacyi Džulijana Karakajali, heta jašče adno śviedčańnie taho, što mnohija maładyja ŭkraincy vyrašyli dla siabie, što zastanucca ŭ Hiermanii.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary