Finski hałoŭnakamandujučy zajaviŭ pra zdolnaść svajoj armii «vieści vajnu, jak va Ukrainie»
Kamandujučy Uzbrojenymi siłami Finlandyi hienierał Cima Kivinien u intervju ahienctvu Bloomberg zajaviŭ, što jahonaja kraina maje značnyja abaronnyja mahčymaści i zdolnaja vieści «takuju ž vajnu, jak va Ukrainie».
«Na dušu nasielnictva ŭ nas, vierahodna, samaja vialikaja ahniavaja moc u Jeŭropie», — adznačyŭ hienierał.
Pa słovach Kiviniena, Finlandyja daviała svaje vydatki na abaronu da 2% ad VUP (u 2006 hodzie ministry abarony nataŭskich krain pryniali rašeńnie ab vydzialeńni nie mienš čym 2% svajho vałavoha ŭnutranaha praduktu na abaronu).
Choć nasielnictva Finlandyi składaje ŭsiaho 5,5 młn čałaviek, u jaje bolš artyleryi, čym sumiesna ŭ Francyi i Hiermanii. U vypadku vajennych dziejańniaŭ kraina moža mabilizavać da 280 tys. sałdat — bolš, čym Vialikabrytanija, kaža finski vajskoviec.
Finskija źniščalniki F/A-18 Hornet nieŭzabavie zamieniać 64 samaloty F-35A. Na mory kraina vałodaje raźvitoj bierahavoj abaronaj i maje miełkavodny fłot, prystasavany da skalistych uźbiarežžaŭ Bałtyjskaha mora. Taksama ŭ jaje jość mahčymaści dla viadzieńnia bajavych dziejańniaŭ u Arktycy i Łapłandyi.
U kancy červienia Kivinien kazaŭ, što Finlandyja dziesiacihodździami rychtavałasia da napadu Rasii i zdolnaja akazać supraciŭ, kali jon adbudziecca.
«My płanamierna raźvivali našu abaronu mienavita dla taho vidu bajavych dziejańniaŭ, jaki viadziecca tam [va Ukrainie], — z masiravanym užyvańniem ahniavoj mocy, braniatechniki, a taksama avijacyi», — adznačyŭ finski hałoŭnakamandujučy.
Akramia ŭsiaho inšaha, kraina zapasłasia kryłatymi rakietami dalokaściu da 370 km i źbirajecca zamović čatyry novyja bajavyja karabli i da 2 tys. bieśpiłotnikaŭ.
Ciapier čytajuć
Ipešnik u Minsku pisaŭ ananimki na kankurentaŭ, u tym liku i palityčnyja. Zafiksavana 18 epizodaŭ3
Kamientary