«Viasna»: Za 2022 hod pa palityčnych matyvach zatrymali minimum 6380 čałaviek
Pravaabarončy centr «Viasna» padvioŭ sumnyja vyniki 2022 hoda, datyčnyja metanakiravanaha i mietadyčnaha dziaržaŭnaha hvałtu ŭ Biełarusi, jaki nie spyniaŭsia ni na adzin dzień. Pa źviestkach pravaabaroncaŭ, ahułam za hod zatrymali nie mienš za 6381 čałaviek — heta minimum 17 čałaviek u dzień. Pry hetym takaja ličba — tolki minimalnaja, bo mnohija vypadki pa roznych pryčynach zastajucca nieviadomyja hramadskaści.
Pa infarmacyi «Viasny», letaś zatrymali jak minimum 6 381 čałaviek. Ź ich amal paŭtary tysiačy — žančyny, jašče kala piaci tysiač — mužčyny. Taksama viadoma, što było zatrymana nie mienš za 15 niepaŭnaletnich dziaciej.
Bolšaść zatrymańniaŭ prypała na Minsk — 3 334 čałavieki. Dalej pa kolkaści zatrymanych iduć Bresckaja i Homielskija vobłaści — 683 i 682 čałaviek. Mienavita ŭ hetych rehijonach siłaviki aktyŭna pieraśledujuć miascovych žycharoŭ za pratesty suprać vajny va Ukrainie, a taksama za fotazdymki rasijskaj vajskovaj techniki.
«Viasna» maje źviestki pra minimum 3 272 sudovyja rašeńni. Łukašenkaŭskija sudy pryznačyli nie mienš za 938 štrafaŭ na ahulnuju sumu ŭ 888 224 rubli (amal 325 tysiač dalaraŭ). Taksama sudździ pryznačyli minimum 2 274 aryšty. Ahułam u izalatarach biełarusy adbyli 28 804 sutak (amal 78 hadoŭ). Pry hetym, pa danych pravaabaroncaŭ, pa roznych pryčynach spynili tolki 47 spraŭ.
Dva hady ŭłady aktyŭna vykarystoŭvajuć «pierazatrymańni» dla dadatkovaha cisku na zatrymanych. Byłyja aryštanty nazyvajuć heta «karusiellu» — kali čałavieka nie vypuskajuć na volu paśla «sutak», a pierazatrymlivajuć pavodle novaha pratakoła. Takim čynam ludziej mohuć utrymlivać za kratami biez srodkaŭ hihijeny i źmiennaj bializny pa niekalki miesiacaŭ. U minułym hodzie pravaabaroncam stała viadoma pra piać najbolš hučnych takich vypadkaŭ.
Pravasłaŭny śviatar Uładzisłaŭ Bahamolnikaŭ pravioŭ za kratami pa administracyjnych aryštach 100 sutak, navapołacki aktyvist Andrej Hałavyryn — 90, minčuk Vital Jenarovič — 85, staršynia niezaležnaha prafsajuza Volha Brycikava — 75, pravabaronca Nasta Łojka — 60 (ciapier suprać jaje zaviali kryminalnuju spravu).
Uvieś 2022 hod pravaabaroncy dakumientavali fakty katavańniaŭ i biesčałaviečaha abychodžańnia. «Viaśnie» viadomyja vypadki, kali biełarusaŭ pry zatrymańni źbivali dubinkami, patelniaj, elektrašokieram, mietałašukalnikam i biercami. Ludziam na hałavu nadziavali viadro dla śmiećcia i matacykletny šlem i bili pa ich dubinkami. Časta, kab prymusić ludziej davać pakazańni, siłaviki bjuć ich elektrašokieram. Paśla masavych aryštaŭ za ŭdzieł u antyvajennym mitynhu ludziej nie tolki źbivali padčas zatrymańniaŭ, ale i katavali i niepasredna na Akreścina: puskali haz z bałončyka pa vientylacyi ŭ dušy; supracoŭniki chadzili pa ludziach, taptali nahami pa śpinie; zatrymanych vyvodzili na kalidor i źbivali.
Viadoma, što ŭ minułym hodzie siłaviki aktyŭna vykarystoŭvali zbroju: stralali na paražeńnie pa «rejkavych partyzanach» i sprabavali zastrelić sabak zatrymanych.
Ciaham 28 miesiacaŭ ludziej kidajuć za kraty ŭ niečałaviečyja ŭmovy biez srodkaŭ hihijeny i źmiennaha adzieńnia. Ludzi, jakich utrymlivajuć u niavoli pa try miesiacy, byvajuć na śviežym pavietry tolki tady, kali ich viazuć u RUUS składać novy pratakoł.
«Kantrolnyja» kamiery (tak zavucca tyja kamiery, dzie ŭtrymlivajucca palitźniavolenyja) uvieś čas pierapoŭnienyja, tamu ludziam davodzicca spać na padłozie, pad łožkami, na łaŭcy. Im nie vydajuć paścieli, nie vyvodziać u duš i na špacyr. U kamiery sadžajuć biazdomnych ludziej u jakaści dadatkovaha cisku. Nočču i dniom bieśpierapynna haryć śviatło.
Myła i tualetnuju papieru zatrymanym davodziłasia vyprošvać u administracyi. Časam ich nie vydavali dva-try dni zapar.
Praz «voka» i videanazirańnie ŭ kamierach za kožnym dziejańniem zatrymanych sočać dziažurnyja. Ciopłaj vady niama, a tuju, što ciače z-pad krana, vielmi nie rekamiendujecca pić.
Tym, kaho zabirajuć z doma, nie dazvalajuć uziać navat srodki hihijeny, tamu jany prydumvajuć novyja sposaby, jak, naprykład, pačyścić zuby tymi rečami, jakija jość u kamiery. Pieradačy da ludziej nie dachodziać.
Miedycynskaja dapamoha nie akazvajecca, pry tym, što šmat ludziej traplajuć na Akreścina mocna źbityja. Adzinaja krynica infarmacyi — novyja sukamierniki, jakich zakidvajuć štodzionna. Hetyja ŭmovy pravaabaroncami rasceńvajucca jak katavańni.
Padrabiaźniej pra ŭsio heta čytajcie ŭ spravazdačy.
Biełarus, jaki vajavaŭ za Ukrainu, raspavioŭ, čym jaho začaravała kachanka Ina Kardaš, ahientka KDB29
Biełarus, jaki vajavaŭ za Ukrainu, raspavioŭ, čym jaho začaravała kachanka Ina Kardaš, ahientka KDB
«Ź mianie ničoha nie voźmieš, a ludzi paciarpieli». Para piensijanieraŭ druhi hod nie moža vypisać ź minskaj kvatery šmatdzietnuju siamju emihrantaŭ88
Kamientary