Sprava pa č. 207 KK (razboj) raspačata Savieckim RUUS Minska ŭ dačynieńni da 19‑hadovaha minčanina.
Sprava pa č. 207 KK (razboj) raspačata Savieckim RUUS Minska ŭ dačynieńni da 19‑hadovaha minčanina. Małady čałaviek užo sudzimy za kradziež i rabavańnie i niekalki miesiacaŭ tamu vyzvaliŭsia sa źniavoleńnia pa amnistyi.
Jak skazała pres‑aficer rajonnaha ŭpraŭleńnia ŭnutranych spraŭ Volha Jaskievič, uviečary 16 kastryčnika na vulicy Jakuba Kołasa chłopiec, pahražajučy dvuma pistaletami, patrabavaŭ hrošy ŭ studentaŭ‑pieršakurśnikaŭ Biełaruskaha nacyjanalnaha techničnaha univiersiteta, hramadzian Turkmienistana, i niekalki razoŭ vystraliŭ u ich. Pra stralbu ŭ milicyju paviedamili śviedki. Usio heta adbyvałasia niepadalok ad budynka, dzie raźmiaščajucca hrupa kadraŭ Savieckaha RUUS i padraździaleńnie patrulna‑pastavoj słužby milicyi. Na vulicy supracoŭniki orhanaŭ unutranych spraŭ ubačyli, što dva chłopcy i dziaŭčyna kidajuć kamiani ŭ maładoha čałavieka, jaki addalaŭsia.
Da zatrymańnia złamyśnik paśpieŭ čatyry razy vystralić u bok milicyjanieraŭ. Kuli ź pnieŭmatyčnaj zbroi, jak vyśvietliłasia paźniej, zakranuli vałasy supracoŭnika milicyi, nie pryčyniŭšy jamu škody.
Ciapier vyśviatlajecca, ci znachodziŭsia małady čałaviek u momant učynieńnia złačynstva ŭ stanie ałkaholnaha abo narkatyčnaha apjanieńnia. Nie vyklučana, što akramia razboju jamu budzie inkryminavana supraciŭleńnie supracoŭnikam milicyi.
Ciapier zatrymany znachodzicca ŭ izalatary časovaha ŭtrymańnia.
Kamientary