Paśla infarmacyi pra dopyty ajcišnikaŭ, jakija danacili ŭ BYSOL u 2020 hodzie, biełaruskaja supolnaść ustryvožyłasia. Raspaviadajem, jak śpiecsłužby Biełarusi znachodziać achviaradaŭcaŭ, jak zrazumieć, što vy ŭ niebiaśpiecy, i jak abaranicca ŭ budučyni.
Achviaravańni ź biełaruskich kartak
U bolšaści vypadkaŭ danacić z vašaj ułasnaj biełaruskaj kartki — heta niebiaśpiečna, i siłaviki bačać takija achviaravańni.
Da prykładu, BYSOL vykarystoŭvaje płaciožnuju sistemu Stripe. Pry pieravodzie praz Stripe banku i, adpaviedna, siłavikam bačny jak suma, hetak i atrymalnik płaciažu. Toje samaje – i praz achviaravańni praz PayPal.
Ci biaśpiečna rabić achviaravańni praz Stripe?
Z Patreon i Facebook usio składaniej. Tam bank bačyć tolki fakt i sumu pieravoda, ale nie kankretnaha adrasata. Ale zastajecca niebiaśpieka, što vaša achviaravańnie było publičnym, jaho paśpieli zaskrynšocić śpiecsłužby abo što jany zdolejuć atrymać dostup da vašaha akaŭnta padčas zatrymańnia ci vykliku na hutarku.
Kali vy danacicie praz servisy kštałtu Patreon, to pierakanajciesia, što da ich nie atrymajuć dostup siłaviki. Da prykładu, vy možacie stvaryć asobny akaŭnt na Facebook ci Patreon i zrabić adnarazovy danat, nie ŭvachodziačy ŭ jaho bolej, abo prasić rabić heta vašych siabroŭ za miažoj z zamiežnych kartak.
Achviaravańni z zamiežnych kartak
Kali kartka vypuščanaja rasijskim bankam, to heta amal tak ža niebiaśpiečna, jak i ź biełaruskaj — chutčej za ŭsio, takija achviaravańni mohuć ubačyć biełaruskija śpiecsłužby.
Kartki jeŭrapiejskich ci inšych zamiežnych bankaŭ z krain, jakija nie nadta aktyŭna supracoŭničajuć ź biełaruskimi ŭładami, značna bolš nadziejnyja. Biełaruskija ŭłady ŭvohule nie bačać, kali vy robicie achviaravańnie.
Hałoŭnaja niebiaśpieka — u zatrymańni. Kali vas zatrymajuć i praz vašy hadžety atrymajuć dostup da vašaj finansavaj historyi, to amal dakładna zdolejuć zrazumieć, kudy vy achviaravali hrošy.
Adziny vychad — vydalać historyju vašych apieracyj. Taksama lepš nie zachoŭvać kartku doma i nie mieć internet-bankinhu ŭ vašym smartfonie. Možacie paprasić siabra ci svajaka za miažoj, jakomu vy sapraŭdy možacie daviarać, kiravać vašym zamiežnym rachunkam.
Danaty kryptavalutaj
Tut taksama ŭsio niaprosta. U artykule pra kuplu kryptavalut my pisali, što častka biržaŭ patrabuje ad vas identyfikacyju asoby. Vy pieradajacie asabistyja źviestki ŭ «čornuju skryniu» — i ichni dalejšy los zaležyć vyklučna ad sumlennaści administrataraŭ prajekta.
Da prykładu, na sajcie biełaruskaj biržy currency.com pišacca, što birža dziejničaje zhodna ź biełaruskimi zakonami (čytajcie tut i tut). Ci mahčyma takoje, što jana vydaść vašy asabistyja źviestki? My nie viedajem, ale varta być aściarožnymi z achviaravańniami z currency.com na «ekstremisckija» inicyjatyvy, asabliva — ź biełaruskaj kartki.
Ale amal dakładna vydaść vašy danyja amal lubaja z rasijskich kryptavalutnych biržaŭ. Budźcie aściarožnyja pry vybary servisu dla kupli kryptavaluty.
Kali vy danacicie kryptavalutami, to lepš abirać servisy, jakija nie patrabujuć ad vas identyfikacyi asoby, i zapytvać danat naŭprost na rachunki, na jakija vy chočacie achviaravać. A kali vy rehistrujeciesia z Rasii, to važna, kab jany nie byli źviazanyja ź biełaruskimi ci rasijskimi ŭładami.
Kab abaranić siabie, kali vy ŭžo rabili achviaravańnie, pakłapaciciesia pra toje, kab da vašaha akaŭnta nie mahli atrymać dostup siłaviki — pierastvarycie jaho (kryptakašalok abo akaŭnt) abo pieradajcie na zachavańnie vašym siabram u zamiežžy.
«Naša Niva» — bastyjon biełaruščyny
PADTRYMAĆ
Kamientary
informacy iz piervych, kak hricco ruk
da, šeu?