Vystava «Milenium», pryśviečanaja 1000-hodździu pieršaj zhadki ŭ piśmovych krynicach Litvy, adkryłasia ŭ minskim Pałacy mastactva.
Vystava «Milenium», pryśviečanaja 1000-hodździu pieršaj zhadki ŭ piśmovych krynicach Litvy, adkryłasia ŭ minskim Pałacy mastactva. Na joj pradstaŭleny kala tysiačy prac.
— My musim nie zabyvacca, što heta naša supolnaje śviata. Bo z hetym narodam i ź inšymi susiedziami my prajšli słavutuju supolnuju historyju. I hetaja historyja nie skončyłasia, a budzie ciahnucca i nastupnyja 1000 hadoŭ, — skazaŭ pieršy namieśnik staršyni Sajuza mastakoŭ Biełarusi Ryhor Sitnica.
U ekspazicyju vystavy ŭvajšli žyvapisnyja, hrafičnyja pracy, skulptura. Tut možna pahladzieć na instalacyi, rekanstrukcyju staražytnych strojaŭ. Raźmieščana vystavy ŭ troch załach, što, na dumku mastaka Mikoły Kupavy, paćviardžaje značnaść padziei dla Biełarusi.
Heta adzin ź niešmatlikich vypadkaŭ, kali na karcinach adlustravany bieł-čyrvona-bieły ściah i Pahonia, a vystava nie zabaroniena.
Šerah pytańniaŭ vyklikaje adbor karcin dla vystavy. Kali častku ź ich jašče pa naźvie možna adnieści da Litvy ci Vialikaha kniastva Litoŭskaha, to niekatoryja prosta nijak nie ŭpisvajucca ŭ vyznačany farmat. Chiba što łuh ź dźmuchaŭcami ci vyhlad vioski hledaču treba traktavać jak toje, što zastałosia ŭ spadčynu ad kniazia Mindoŭha.
Siarod mastakoŭ, jakija ŭdzielničajuć u «Mileniumie», — Arlen Kaškurevič, Alaksiej Maračkin, Uładzimir Višnieŭski, Leŭ i Siarhiej Humileŭskija. Usiaho zvyš 300 aŭtaraŭ.
Na pytańni «Našaj Nivy» adkazvaje adzin z arhanizataraŭ vystavy mastak Ryhor Sitnica.
«NN»: Sp. Ryhor, ci byli ciažkaści z arhanizacyjaj hetaj vystavy? I čamu jana adbyłasia tolki k kancu śviatočnaha hoda?
RS: Ciažkaści byvajuć zaŭsiody, kali surjozna stavišsia da svajoj spravy. Nijakich pieraškodaŭ nam nichto nie čyniŭ. Nijakich piarečańniaŭ z boku kiroŭnych struktur my nie zaznali. Heta dobry znak. Čamu ŭvosień? Bo ŭletku ŭ nas była davoli vialikaja vystava, pryśviečanaja vyzvaleńniu Biełarusi ad fašystaŭ. I my nie paličyli patrebnym dźvie vialikija imprezy pa maštabie i pa značnaści złučać u adnu. Tym bolš, što heta davoli simvaličnaja data. My ž možam jaje śviatkavać i ŭ nastupnym hodzie. Nichto nam nie zaminaje heta rabić.
«NN»: Suarhanizataram vystavy vystupiła Ministerstva kultury Biełarusi. Ale na adkryćci adsutničali pradstaŭniki hetaha viedamstva. Ich zaprašali?
RS: Zaprašali. Ja dakładna viedaju, što ministr Łatuška ŭ dadzieny momant znachodzicca ŭ Administracyi prezidenta, a ŭ pieršaha jaho namieśnika ciapier adbyvajecca narada. Ja nie chaču šukać u hetym niejki palityčny ci ideałahičny padtekst. Prynamsi, pradstaŭnik Ministerstva kultury pierad adkryćciom vystavy vybačaŭsia za adsutnaść pieršych asobaŭ.
«NN»: Było skazana, što hetaja vystava moža być pakazana i ŭ inšych haradach Biełarusi. Jakija varyjanty razhladajucca?
RS: Pa Biełarusi my možam pravieźci jaje biez asablivych ciažkaściaŭ. Bo zaraz Sajuz mastakoŭ pracuje na toje, kab achapić jak maha bolšuju terytoryju našaj krainy. Kab mastactva było skancentravana nie tolki ŭ stalicy, my ładzim vystavy i ŭ inšych haradach. Tamu voś hety varyjant i razhladajem. Inšaja sprava, što raźmiaścić «Milenium» duža ciažka ŭ inšym horadzie. Značycca buduć farmavacca mienšyja ekspazicyi.
Śviatkavańnie 1000-hodździa Litvy ŭ Biełarusi praciahvajecca.
27 kastryčnika adbudziecca prezientacyja almanacha «Litva». U listapadzie projduć Dzień paezii, litaraturna-mastackaja viečaryna «Radzivilijada», śpiektakl «Spatkańnie ź Litvoj», kancert kłasičnaj i dudarskaj muzyki.
Kamientary