Małady nastaŭnik ź Minska Uład Bochan u svoj čas vymušany byŭ źjechać u Polšču ad palityčnaha pieraśledu, a paśla taho nieadnarazova troliŭ biełaruskuju sistemu adukacyi z hatoŭnaściu kiraŭnictva škoł i asobnych piedahohaŭ vykanać spuščanaje źvierchu luboje, navat samaje biazhłuzdaje zadańnie. Hetym razam jon zakinuŭ u škoły prapanovu pravieści «patryjatyčny» paetyčny konkurs.
Akcyja nazyvałasia «Vaš honar zaviecca viernaść», u asnovu hetaha najmieńnia byŭ zakładzieny trochi źmienieny deviz vojskaŭ SS Meine Ehre heißt Treue («Moj honar — heta viernaść»).
Pa ŭmovach «konkursu» ŭdzielniki pavinny byli zapisać videarolik z prezientacyjaj aŭtarskaha vierša, jaki pačynajecca z hetych radkoŭ. Siarod jaho metaŭ paznačałasia «padtrymka i pavyšeńnie imidžu pravaachoŭnych orhanaŭ i orhanaŭ pravaparadku ŭ ramkach biełaruska-rasijskaha prajekta «Ciahnik pamiaci-2023», pavyšeńnie prestyžu supracoŭnikaŭ MUS i cikavaści da ich pracy.
U jakaści fejkavych arhanizataraŭ vystupali Nacyjanalny centr mastackaj tvorčaści dziaciej i moładzi sumiesna ź Minadukacyi i MUS.
Na zaklik adhuknułasia i pryniała prapanovu da vykanańnia siaredniaja škoła №3 u Chojnikach. U telehram-kanale apublikavanaje videa, zapisanaje ŭ adpaviednaści z patrabavańniami, vykładzienymi prankieram.
Raniejšyja padobnyja akcyi Ułada Bochana nabyli vialiki rezanans. U lutym minułaha hoda, pradstaviŭšysia «kaardynataram dyjałohavych placovak», jon zapatrabavaŭ zładzić u navučalnaj ustanovie «dyjałohavuju placoŭku pa abmierkavańni papravak u Kanstytucyju». A pierad refierendumam pa kanstytucyi ad imia dziaržaŭnych arhanizacyj jon razasłaŭ u biełaruskija škoły listy z patrabavańniem dałučycca da fejkavaha fłešmobu i raźmiaścić na svaich sajtach fotaspravazdaču, što mnohija i rabili.
Taksama biełaruski prankier troliŭ rasijskija škoły, dasłaŭšy im list z patrabavańniem pravieści akcyju «Praca vyzvalaje» ad imia «rehijanalnaha adździaleńnia partyi «Adzinaja Rasija».
Ciapier čytajuć
Kamientary