U Saudaŭskaj Aravii źjavicca vysokatechnałahičny chmaračos u formie kuba
Jon stanie «adnym z najbujniejšych zbudavańniaŭ u śviecie».
U Saudaŭskaj Aravii pabudujuć novy vysokatechnałahičny rajon z hihanckim kubičnym chmaračosam. Pra heta 16 studzienia paviedamiŭ Suvierenny fond Saudaŭskaj Aravii — adzin z najbujniejšych fondaŭ u śviecie z ahulnym kapitałam u 620 młrd dalaraŭ (zvyš 1,5 tryljona biełaruskich rubloŭ).
Rajon New Murabba płoščaj 19 kvadratnych kiłamietraŭ budzie pabudavany na paŭnočnym zachadzie Er-Ryjada. U centry novaha rajona budzie ŭźviedzieny hihancki kub Mukaab pamieram 400×400×400 mietraŭ, u jakim budzie znachodzicca śpiralepadobnaja vysokaja vieža i masiŭnyja hałahrafičnyja ekrany z funkcyjaj imitacyi roznych vidaŭ asiarodździa i nieba.
Pa zadumcy aŭtaraŭ, New Murabba stanie «novym tvaram Er-Ryjada i bramaj u inšy śviet», a Mukaab — «adnym z najbujniejšych stvoranych zbudavańniaŭ u śviecie».
«Prajekt New Murabba budzie ŭklučać bolš za 100 tysiač kvater i 9 tysiač haściničnych numaroŭ, a taksama bolš za 980 tysiač kvadratnych mietraŭ roznych kram i amal paŭtara miljona kvadratnych mietraŭ ofisnych pamiaškańniaŭ. Tudy ž uvojduć 80 zabaŭlalnych i kulturnych placovak, univiersitet technałohij i dyzajnu, šmatfunkcyjanalny imiersiŭny teatr i muziej», — paviedamiŭ Suvierenny fond Saudaŭskaj Aravii.
Taksama jon raspavioŭ padrabiaznaści pra novy chmaračos Mukaab, jaki, pa słovach architektaraŭ, «zmoža raźmiaścić u sabie 20 budynkaŭ pamieru Empajr-stejt-biłdynh».
«Mukaab budzie pabudavany ŭ sučasnym architekturnym styli i zaklučany ŭ kubičny fasad, što dazvolić maksimalna zadziejničać volnuju prastoru dla raźmiaščeńnia virtualnych i hałahrafičnych technałohij. Sama płošča kuba budzie dasiahać 2 miljonaŭ kvadratnych mietraŭ i ŭ im raźmieściacca mnostva kram, kulturnych i turystyčnych miescaŭ, a taksama amal va ŭsiu vyšyniu atryum, u jakim budzie znachodzicca śpiralepadobnaja vieža», — padkreślili ŭ Suvierennym fondzie.
Sam košt budaŭnictva pakul nieviadomy, ale kančatkovy termin jaho realizacyi datujecca 2030-m hodam. Taksama viadoma, što płany pa stvareńni New Murabba i Mukaab uklučany ŭ bolš hłabalny prajekt Saudaŭskaj Aravii pad nazvaj Saudi Vision 2030.
U ramkach hetaha prajekta ŭrad krainy taksama płanuje ŭźvieści z nula vysokatechnałahičny «horad budučyni» Nieom, koštam zvyš 500 młrd dalaraŭ (amal 1,4 trłn bieł. rub.), pra što my ŭžo pisali raniej.
Kamientary