Dziady-2009. Onłajn

Siońnia - Dzień pamiaci prodkaŭ. U Minsku prajšła tradycyjnaja akcyja ŭšanavańnia pamiaci achviaraŭ u Kurapatach.

14:50

Akcyja faktyčna skončana, ludzi pacichu razychodziacca. Častka zastałasia na hary, dzie ładzić nievialiki mitynh. Udzielniki mitynhu davodziać, što ciapier Łukašenka reanimuje starych kataŭ.

Kiraŭnictva KCHP-BNF padziakavała moładzi, što ŭziała ŭdzieł u akcyi. Moładź siońnia składała blizu 60% udzielnikaŭ šeścia i mitynhu.

14:30

Vystupiŭ namieśnik staršyni KCHP - BNF Siarhiej Papkoŭ, Valer Bujvał začytvaje zvarot Zianona Paźniaka, ludzi zapalvajuć źničy. Častka padymajecca na haru da kryžoŭ.

14:22

Usie ŭžo ŭ Kurapatach, stajać la kryža. Śpiavajuć "Mahutny Boža".

14:16

Pieršyja ŭdzielniki šeścia spuskajucca ŭ pierachod da Kurapataŭ.

14:02

Kałona dajšła da kalcavoj.

13:24

Udzielniki kałony dajšli da vulicy Karbyšava. Kałona raściahnułasia na 300 mietraŭ.

Razam iduć Lavon Barščeŭski, Pavał Sieviaryniec i Vital Rymašeŭski.

12:40

Žurnalisty i pravaabaroncy ŭšanavali pamiać žurnalista Alhierda Nieviaroŭskaha (1969-2009), uskłaŭšy kvietki la jaho doma na vulicy Kalinoŭskaha.

Alhierd pastajanna braŭ udzieł u «Dziadach», a kali ŭdzielniki akcyi prachodzili vulicaj Kalinoŭskaha, jon biehaŭ dachaty i vynosiŭ udzielnikam kavu i harbatu, kab tyja mahli sahrecca.

Alhierd pamior 1 kastryčnika ŭ Biełastoku.

12:29

Udzielniki akcyi zbočyli na vulicu Kalinoŭskaha.

12:10

Kałona dajšła da Nacyjanalnaj biblijateki. La kožnaha doma pa chodu šeścia dziažurać vajskoŭcy unutranych vojskaŭ (častka 3214). Biez dubinak.

11:57

Siarod udzielnikaŭ dziejač kultury Valery Mazynski, kiraŭnik arhkamiteta ruchu «Razam» Viačasłaŭ Siŭčyk.

Źviartaje na siabie ŭvahu dobraja arhanizacyja šeścia.

Ludzi iduć kampaktna, dobra pracuje družyna, ludzi nie źbivajucca na pierachodach. Raściažki paviernutyja da praśpiektu.

Milicyja adrazu pierakryvaje ruch transpartu na pierachodach, taksama pracuje apieratyŭna.

11:49

Kałona dajšła da «Alaksandraŭskaha pasažu», dzie pradajuć «Porše». Zdymaje STV, nie chavajučy łahatypaŭ. Jość inšyja centralnyja kanały.

11:32

Na rahu z Vałhahradskaj dali pierajści darohu, a nie zahaniali ŭ pierachod.

Kałona raściahnułasia mietraŭ na 200, zaraz u joj kala 500 čałaviek. Ludzi dałučajucca z prypynkaŭ transpartu.

Śpiavajuć «A dzie tyja vajary, što chadzili ŭ Krym» («Kamiełot»).

11:29

Kałona akcyi dajšła da korpusu BATU. Nabližajucca da stancyi mietro «Maskoŭskaja». Śpiavajuć patryjatyčnyja pieśni, hukajuć «Žyvie Biełaruś».

Admietnaść akcyi - bahata ludziej u antyhrypoznych maskach.

Maršrutki, što jeduć praśpiektam, skidajuć chutkaść, kab lepš razhledzieć akcyju. Naš karespandent, što jedzie ŭ adnoj z takich maršrutak u kirunku Barysava, paviedamlaje, što pasažyry vielmi pryjazna ŭsprymajuć šeście, a adzin ź ich navat pračytaŭ lekcyju na temu Dziadoŭ.

Z voknaŭ maršrutak padajecca, što ściahoŭ vielmi mnoha.

Ludzi, što jeduć maršrutnymi aŭtobusami, taksama vielmi stanoŭča ŭsprymajuć akcyju.

11:17

Šeście rušyła chodnikami ŭ boku Kurapataŭ. Na čale - Aleś Čacholski, Jury Bieleńki (KCHP-BNF), u akcyi zaraz biaruć udzieł 400 čałaviek, napieradzie niasuć zvon, u jaki čas ad času bjuć.

Da akcyi dałučyłasia «Jeŭrapiejskaja Biełaruś».

Pryčym hrupa pradstaŭnikoŭ Jeŭrapiejskaj Biełarusi, Biełaruskaj Chryścijanskaj Demakratyi i Ruchu Za Svabodu - kala 100 čałaviek - iduć zzadu kałony. Jany niasuć raściažku: «Dziady 1937 - 2009» (fota №2).

***

10:54

Zaraz la Mienskaha hadzińnikavaha zavodu sabrałosia prykładna try sotni čałaviek.

Arhanizacyja sioletniaha šeścia była na vysokim uzroŭni. Na videa — udzielniki rychtujuć novyja draŭlanyja kryžy dla miemaryjału:

Jość lider Ruchu «Za Svabodu» Alaksandr Milinkievič, lider «Maładych demakrataŭ» Michaś Paškievič, lider BCHD Vital Rymašeŭski, hraf Prušynski, staršynia Partyi BNF Alaksiej Janukievič, kolišni lider partyi Vincuk Viačorka.

Bahata bieł-čyrvona-biełych ściahoŭ, taksama štandary KCHP-BNF, BCHD, Partyi BNF, adzin ściah Ruchu «Za Svabodu». Jość bieł-čyrvona-čornyja ściahi.

Adzin sa ściahoŭ - z čornaj stužkaj. Małady čałaviek, što trymaje ściah, skazaŭ, što stužka prymacavanyja jak znak žałoby ŭ hety dzień pa zahinułych prodkach.

Na čale kałony - vialikaja tradycyjnyja raściažka «Dziady», jość raściažki Maładoha frontu, Partyi BNF, Maładoj Biełarusi dy inš.

Na čale kałony znachodzicca spadarynia Maja Klaštornaja - dačka rasstralanaha ŭ 1937 h. piśmieńnika Todara Klaštornaha.

Taksama padciahnulisia maładyja ludzi prapitaha vyhladu, jakija, vidavočna, buduć imknucca pravakavać udzielnikaŭ supolnaj akcyi.

Mašyny, što jeduć praśpiektam, sihnalać u znak padtrymki.

***

Sioleta akcyja ładzicca supolna. KCHP—BNF tradycyjna padała zajaŭku, Partyja BNF zajaviła, što nie budzie rabić asobnaha šeścia (jak letaś) i dałučajecca da akcyi.

Zbor udzielnikaŭ a 10:30 la Mienskaha hadzińnikavaha zavoda (stancyja mietro «Park Čaluskincaŭ»),

z 11:00 da 15:00 šeście pa maršrucie praśpiekt Niezaležnaści — Kalinoŭskaha — vuł. Siadych — vuł. Karbyšava — vuł. Hamarnika — vuł. Mirašničenki.

15.00. — 17.00. — miemaryjalny mitynh na terytoryi Kurapataŭ.

Dazvoł uładaŭ na akcyju atrymany.

Kali płanujecie ŭdzielničać u akcyi, to apranajciesia jak najciaplej, zaraz u stalicy - minus 2 marozu.

Dziady ŭ Miensku pravodziacca ŭžo bolej za 20 hod, pieršyja prajšli ŭ 1987 h. u parku Janki Kupały. U 1988 h. Dziady byli razahnanyja milicyjaj.

Hladzi taksama:
Fotarepartaž Alesia Pileckaha
Dziady na Mastoŭščynie

• 0
• 0
• 0
• 0
• 0
• 0
• 0
• 0