Skačok śmierciaŭ źniavolenych: što viadoma pra straty Rasii za 13 miesiacaŭ vajny
Na asnovie adkrytych krynic Bi-bi-si ŭdałosia ŭstanavić imiony 17 375 rasijskich vajskoŭcaŭ, jakija zahinuli na vajnie va Ukrainie. Asabliva vialikija straty niasuć źniavolenyja, jakija adpravilisia na front. Z pačatku hoda zahinuła nie mienš za 1000 čałaviek, jakija pavinny byli adbyvać pakarańnie ŭ rasijskich turmach.
Za apošnija dva tydni Ruskaj słužbie Bi-bi-si sumiesna z vydańniem «Miedyjazona» i kamandaj vałancioraŭ udałosia ŭstanavić imiony 1304 zahinułych, što pa-raniejšamu istotna bolš, čym siarednija pakazčyki 2022 hoda. Ciaham pieršaha hoda ŭvarvańnia rasijskija krynicy kožny tydzień zvyčajna paviedamlali prykładna pra 250—300 zahinułych.
Havorka idzie tolki pra tych danyja, jakija atrymlivajecca znajści i pravieryć pa adkrytych krynicach, to-bok realnaja kolkaść strat, biezumoŭna, jašče bolšaja.
Da siaredziny sakavika ŭdałosia paćvierdzić hibiel 17 375 rasijskich vajskoŭcaŭ. Tracina ŭsich hetych strat prypadaje na tych, chto da pačatku ŭvarvańnia nie byŭ źviazany z armijaj: dobraachvotnikaŭ, mabilizavanych, źniavolenych i niadaŭna nabranych supracoŭnikaŭ PVK.
Śpis moža ŭtrymlivać, prynamsi, u dva razy mienš imionaŭ zahinułych, čym nasamreč pachavana ŭ Rasii. Da takoj vysnovy žurnalisty pryjšli, vyvučyŭšy abstanoŭku na mohiłkach u bolš čym 65 rasijskich nasielenych punktach na praciahu apošnich 13 miesiacaŭ.
Takim čynam, pavodle najbolš kansiervatyŭnaj acenki, padčas uvarvańnia va Ukrainu Rasija mahła stracić kala 35 tysiač čałaviek zahinułymi.
Ahulnyja biezzvarotnyja straty Rasii (heta značyć kolkaść tych, chto vybyŭ sa stroju pa pryčynie ranieńnia, śmierci albo prapaŭ bieź viestak) mohuć składać, prynamsi, 157 500 čałaviek.
Hetaja ličba atrymana na asnovie nazirańniaŭ Centra vajskova-marskoha analizu ZŠA, zhodna ź jakimi na kožnaha zahinułaha rasijskaha vajskoŭca padčas vajny va Ukrainie prypadaje ŭ siarednim blizu troch z pałovaj paranienych.
U hetuju ličbu nie ŭvachodziać tyja, chto vajavaŭ na baku Rasii ŭ składzie «narodnych milicyj» Daniecka i Łuhanska. Akramia taho, nie ŭdajecca ŭstanavić navat prykładnuju kolkaść vajskoŭcaŭ, jakija źnikli bieź viestak.
-
Śviatłana Aleksijevič raskazała, jakuju knihu vypuścić nastupnaj. Jana nie pra kachańnie, jak płanavałasia raniej
-
Łukašenka raskazaŭ, što karova pavinna stajać u pałacy, i kožnamu nieabchodna «choć pa dźvie barazionki» bulby pasadzić
-
Kamisija ci admova: jakija banki hatovy ŭziać u vas nie samyja idealnyja kupiury
Kamientary