U škłoŭskaj balnicy, pacyjentku jakoj «ratavaŭ» Łukašenka, zakryli infiekcyjnaje adździaleńnie
Chvorych ź infiekcyjnymi chvarobami sa Škłova buduć vazić za try dziasiatki kiłamietraŭ u Mahiloŭ. Rekamiendacyi zakryć adździaleńnie vypisała kamisija Iryny Abielskaj, śćviardžajuć miedyki.
Likvidavańnie infiekcyjnaha adździaleńnia tłumačycca maštabnaj madernizacyjaj.
Niadaŭna pryznačany na pasadu hałoŭnaha doktara rajonnaj balnicy Alaksandr Łobaŭ kaža, što ŭsich pacyjentaŭ ź infiekcyjnymi chvarobami paviazuć u novy infiekcyjny korpus Mahiloŭskaj balnicy №1.
Hetaja balnica za try dziasiatki kiłamietraŭ ad Škłova i jašče nie pracuje. Jaje aŭralna ŭzvodzili z raźlikam na čarhovuju chvalu kavidnaj epidemii.
U miedyčnym asiarodździ kažuć, što Łobaŭ paśpiašaŭsia zajavić ab pieravozcy chvorych, bo pakul niajasna, jak ich buduć transpartavać.
Ale miedyki nie vyklučajuć, što padobnuju madernizacyju praviaduć va ŭsich balnicach rajcentraŭ, jakija hieahrafična blizkija da lakarniaŭ, zdolnych pryniać pacyjentaŭ ź infiekcyjnymi ci inšymi chvarobami.
Jak kažuć miedyki, takoha rodu ekśpierymient — adzin z vynikaŭ pravierki, jakuju pravodziła admysłovaja kamisija, stvoranaja ź inicyjatyvy Łukašenki. Jaje ŭznačalvała Iryna Abielskaja, hałoŭnaja lekarka Respublikanskaha kliničnaha miedcentra kiraŭnictva spraŭ Łukašenki.
U hutarkach z «Našaj Nivaj» miedyki adznačali, što taki krok vymušany, bo rajonnym balnicam brakuje kadraŭ.
«Asnoŭnaja pryčyna zakryćcia adździaleńnia ŭ Škłovie — adsutnaść daktaroŭ i miedrabotnikaŭ siaredniaha źviana. Sanitarak niejak nabrać mohuć. Vydzielać na bazie terapieŭtyčnaha adździaleńnia paru pałat i buduć špitalizavać infiekcyjnych chvorych. Usich ža ŭ Mahiloŭ nie paviazieš, kali tolki maršrutkami. Pahatoŭ u Škłovie jość pałaty z asobnym sanvuzłom», — vykazvaje svajo bačańnie situacyi mahiloŭski miedyk.
Dla paŭnavartasnaha funkcyjanavańnia, naprykład, infiekcyjnaha adździaleńnia ŭ Škłovie patrabujecca bolš za dziesiać štatnych adzinak piersanału. Ich zarobkavy biudžet moža siahać 10 tysiač rubloŭ štomiesiac, a jašče patrabujucca srodki dla lačeńnia chvorych. Takim čynam, efiektyŭnaść ekśpierymientu Abielskaj, miarkujuć u asiarodździ, — u aščadžeńni srodkaŭ.
Łobaŭ kaža, što sioleta zapłanavany maštabny ramont balnicy. Voźmucca za dach i fasad budynku.
Škłoŭskaja rajonnaja balnica prahrymieła na ŭsiu Biełaruś, kali Łukašenka zajaviŭ ab vyratavańni žančyny, jakuju jon «praktyčna vyciahnuŭ z morha». Sa Škłova tady pacyjentku pieravieźli ŭ Mahiloŭ, a adtul u Minsk.
Paśla hetaha Łukašenka strašyŭ ministra achovy zdaroŭja Dźmitryja Pinieviča niečakanymi pravierkami i abiacaŭ, što litaści nikomu nie budzie. Nieŭzabavie była stvoranaja kamisija, jakuju ŭznačaliła Abielskaja. Joj pastavili zadačy pravieryć usie balnicy i padrychtavać spravazdaču.
Adnoj ź pieršych achviar pravierki Abielskaj staŭ hałoŭny doktar Škłoŭskaj balnicy Siarhiej Novikaŭ. Pra jaho zvalnieńnie stała viadoma ŭ sakaviku.
Łukašenka tym časam na pasłańni parłamientu i narodu abiacaŭ achovu zdaroŭja «strasianuć tak, što pył pasyplecca».
«Naša Niva» — bastyjon biełaruščyny
PADTRYMAĆHladzicie taksama:
«Ja nie źbiraŭsia kapać akopy». Miedyk z rajcentra raskazvaje, čamu bolš nie vytrymaŭ
Ciapier čytajuć
Džefry Epštejn niekalki razoŭ atrymlivaŭ vizu ŭ Biełaruś. I dakładna naviedvaŭ našuju krainu7
Kamientary