Z prychodam ciapła aktyvizavalisia čaŭnaki-viełasipiedysty. Kolki jany zarablajuć za niekalki hadzin?
Kolki možna zarabić, kali ty žyvieš niedaloka ad miažy ź Litvoj i maješ dziejnuju vizu i rovar? Spytali ŭ viełasipiedystaŭ-čaŭnakoŭ.
Viza jak krynica zarobku
Dziejnaja viza abo VNŽ adnoj z krain ES dajuć žycharam biełaruskaha pamiežža nie tolki mahčymaść padarožničać pa Jeŭropie, ale i mieć dadatkovuju krynicu zarobku. Pryčym, jak pakazvaje praktyka, dla taho kab zajmacca tradycyjnym pryhraničnym biznesam, nie abaviazkova mieć aŭtamabil.
Paśla zakryćcia «Babroŭnikaŭ» asnoŭnym kirunkam, dzie kvitnieje viełasipiedny ruch, zastajecca Litva, bo pierasiakać miažu na rovary ŭ punkcie propusku «Brest-Tarespal» nielha.
Tavar na pieravozku čaŭnaki šukajuć u admysłovych čatach abo ŭžo majuć kantakty z tymi, kamu treba pierakinuć pakupki praź miažu.
«Na pieravozcy tavaru na rovary asabliva šmat nie zarobiš, ale svaich 50-60 dalaraŭ za raz atrymaješ», — pryznajecca čaŭnok.
Mužčyna kaža, što standartnaja staŭka za pieravoz adzieńnia, na jakoje nie treba afarmlać tax-free i dekłaravać na čyrvonym kanale, składaje try dalary za kiłahram. Abutak — pa 3-7 dalaraŭ za paru. Zimovaja kurtka— kala 10.
«Kaniešnie, adzieńnia na 30 kiłahramaŭ naŭrad ci atrymajecca nabrać, ale jość jašče takija rečy, jak kava, pralnyja paraški, padhuźniki, aŭtamabilnaje masła, za pieravoz jakoha dajuć pa 10 dalaraŭ za 4-5 litraŭ, i aŭtazapčastki. Tamu kiłahramaŭ 20 dakładna nabirajecca, choć časam byvaje i bolej. U toj bok možna pravieźci 2 pački cyharet i 1 litr harełki. Z hetaha naboru taksama atrymlivajecca zarabić niekalki dalaraŭ», — dzielicca mužčyna.
Surazmoŭca śćviardžaje, što prachodžańnie miažy na rovary ŭ dva baki zajmaje ad 1,5 da 2,5,-3 hadzin.
«Takim čynam, usia pajezdka zajmaje kala pałovy pracoŭnaha dnia, za jaki ty atrymlivaješ čystymi nie mienš za 50 dalaraŭ», — padličvaje jon.
Mužčyna kaža, što ź Litvy niaredka pieravoziać b/u aŭtazapčastki. Tamu čałaviek na rovary z pryviazanym da śpiny kapotam ci kryłom ad aŭtamabila — heta nie redkaść.
«Kali ŭ ravarysta jość va ŭłasnaści aŭtamabil, to źjaŭlajecca mahčymaść padzarabić na pieravozcy pakryšak. Siarod inšaha časam byvaje patreba ŭ pieravozcy hrošaj. Naturalna, što hrošy na pierakid nichto praz čaty ŭ telehramie nie razdaje, ale, kali jość znajomy, jaki, naprykład, zajmajecca pierahonam aŭto, časam padvaročvajecca i takaja chałtura. Mnie znajomy pierahonščyk za pieravozku 10 tysiač jeŭra davaŭ 50 jeŭra», — zhadaje mužčyna.
Pa słovach surazmoŭcy, najbolšaj papularnaściu siarod viełasipiedystaŭ-čaŭnakoŭ karystajucca raskładnyja viełasipiedy «Aist».
«Častka ludziej pakidaje rovary pryšpilenymi da niejkaha słupa abo da dreva, asabliva kali heta tanny rovar. Raskładnyja «Aist» vielmi zručnyja, bo, pa-pieršaje, u ich jość bahažnik, a pa-druhoje, ich zručna pieravozić na aŭto», — kaža surazmoŭca.
Jak časta možna jeździć praź miažu na rovary i kolki možna zarabić za miesiac?
Asablivych abmiežavańniaŭ na pierasiačeńnie miažy na rovary niama, ale kali asnoŭnaja meta — pieravoz tavaraŭ, to jeździć treba nie čaściej, čym raz na tydzień.
Inakš normy pa kolkaści tavaraŭ, jakija možna pieravozić, značna skaračajucca.
«Za miesiac atrymlivajecca zjeździć 3-4 razy. Za apošnija čatyry pajezdki ŭ sumie atrymałasia zarabić amal 300 dalaraŭ, 50 ź jakich byli za pieravozku hrošaj, što byvaje niačasta. Tamu miarkuju, što takaja padpracoŭka ŭ miesiac budzie prynosić u siarednim dalaraŭ 200-250, što taksama nie błaha z ulikam patračanaha na heta času», — ličyć surazmoŭca.
Za paŭtara hoda biełarusaŭ, jakija pracujuć u Polščy, stała bolej amal u dva razy
U Brasłaŭskim rajonie ŭ bazu «darmajedaŭ» unieśli 10% nasielnictva
Ciapier čytajuć
Rasijskija i łukašenkaŭskija śpiecsłužby na fonie zalotu dronaŭ u Polšču praviali infaataku. Jaje zładžanaść daje padstavy dumać, što zalot byŭ spłanavany1616
Kamientary
Ale ŭ 90-ch u ludziej była nadzieja na śvietłuju budučyniu, a ciapier jaje dakładna niama.....
ps. mienavita dziakujučy blizaści miežaŭ Hrodna i Brest zaŭždy byli bolš zamožnymi haradami ŭ paraŭnańni ź Viciebskam, Homielam i Mahilovam