ŚMI paviedamili, što USU ŭpieršyniu źbili «Kinžał», adnak ukrainskaja armija nie paćvierdziła
Fota abłomkaŭ rakiety, źbitaj nad Kijevam 4 maja, u pryvatnaści nasavoha abciakalnika sa śladami paškodžańnia, padobnyja da Ch-47 «Kinžał».
Uzbrojenyja siły Ukrainy, mahčyma, upieršyniu paśpiachova pierachapili rasijskuju hipierhukavuju rakietu Ch-47 «Kinžał». Heta zdaryłasia kala 02:40 4 maja ŭ niebie nad Kijevam, piša ŭkrainskaje vydańnie Defense Express.
Pra ataku Kijeva ŭ hetuju noč aficyjna paviedamiła Kijeŭskaja haradskaja vajskovaja administracyja, adznačyŭšy, što ŭ atacy, akramia dronaŭ-kamikadze «Šachied», zadziejničali i rakiety — «imavierna, balistyčnaha typu». Defense Express z ułasnych krynic atrymała fota abłomkaŭ rakiety.
Miarkujučy pa fota, abłomki biez bajavoj častki ŭpali na stadyjonie ŭ miežach ukrainskaj stalicy. Na adnym z fota — nasavy abciakalnik, jaki maksimalna padobny da taho, što vykarystoŭvajecca mienavita ŭ rakiecie Ch-47 «Kinžał» sa składanaj formaj rezkich pierachodaŭ dyjamietra.
Alternatyva ŭ vyhladzie Ch-22 maje inšuju nasavuju častku, z avalnymi pierachodami. Taksama zafiksavany na fota abciakalnik źbitaj rakiety adroźnivajecca i ad balistyčnaj rakiety ATRK «Iskander», jaki «taŭściejšy».
Pa abłomku vidać, što jon atrymaŭ paškodžańnie, što dazvalaje acanić taŭščyniu materyjału, jaki nieabchodny dla taho, kab vytrymać vysokuju tempieraturu padčas razhonu da hipierhukavaj chutkaści. A taksama pakazvaje na toje, što pierachop byŭ dastatkova efiektyŭnym, sa źniščeńniem bajavoj častki jašče ŭ pavietry.
Z hetym i źviazany mahutny vybuch, jaki čuli žychary Kijeva nočču 4 maja.
Nahadajem, što ŭnačy z 2 na 3 maja bieśpiłotnik ŭzarvaŭsia nad Kramlom. Ataka ŭnačy na 4 maja była svajho rodu aktam adpłaty. Adnak nad Kijevam usie rasijskija rakiety i drony byli źbityja.
«Kinžał», choć jon i razhaniajecca da hipierhukavych chutkaściaŭ za košt paskaralnika, nie moža padtrymlivać takuju chutkaść pastajanna. Užo na terminalnym učastku, heta značyć, padčas ataki, jon zachodzić na cel pa balistyčnaj trajektoryi i maje choć i vysokuju, ale daloka nie hipierhukavuju chutkaść.
Ukraina niadaŭna atrymała srodki, jakija mohuć zmahacca z balistyčnymi celami — kompleksy Patriot. Mahčyma, mienavita hetaja ŭstanoŭka i źbiła «Kinžał», pisała vydańnie.
Adnak pres-sakratar kamandavańnia Pavietranych sił USU Juryj Ihnat u kamientary «Suśpilnamu» abvierh infarmacyju ab vierahodnym źbićci balistyčnaj rakiety nad Kijevam nočču 4 maja.
«Mahčymaść prymianieńnia była, ale balistyčnych rakiet nie zafiksavana», — zajaviŭ jon.
Ciapier čytajuć
«Škada, što ludzi mianie ličać takim idyjotam». Dziadok raskazaŭ, jak jaho zmahli vysačyć paśla piaci miesiacaŭ padpolla4
Kamientary