MZS Biełarusi paabiacała «asimietryčny adkaz» Polščy na abmiežavańni. I pastaviła ŭ vinu «pramy ŭdzieł u vajnie na baku kijeŭskaha režymu»
Aficyjny pradstaŭnik biełaruskaha MZS Anatol Hłaz paabiacaŭ Polščy «asimietryčny adkaz» u suviazi z rašeńniem Polščy zakryć miažu dla hruzavikoŭ ź biełaruskimi i rasijskimi numarami. Takija sankcyi Polšča ŭviała ŭ suviazi sa źniavoleńniem aktyvista polskaj mienšaści Andreja Pačobuta.
Anatol Hłaz zajaviŭ, što «polskaje kiraŭnictva svaimi rukami stvaraje ŭsio novyja pieraškody i niečałaviečyja ŭmovy dla hramadzian Biełarusi i Polščy, a taksama pieravozčykaŭ usioj jeŭrazijskaj prastory. Na im lažyć usia vina za antyhumannyja nastupstvy takich krokaŭ».
Hłaz źvinavaciŭ «režym Dudy — Maravieckaha» ŭ płanamiernaj realizacyi kompleksu «antybiełaruskich krokaŭ», jakija «nakiravany na pravakacyju ŭskładnieńniaŭ i eskałacyju, u tym liku va ŭsim rehijonie».
«Rašeńni ŭrada Polščy taksama pakazvajuć, što bazavyja pravy čałavieka, u tym liku prava na svabodu pieramiaščeńnia, na spravie dla ich ničoha nie značać. Na hetyja miery ŭ abaviazkovym paradku rušyć uśled asimietryčny adkaz. Pry hetym nami buduć u maksimalna mahčymaj stupieni ŭličany intaresy prostych palakaŭ, vymušanych pakutavać z-za valuntaryzmu svajho ŭrada, i ŭ maksimalnaj — intaresy našych hramadzian», — zajaviŭ Hłaz.
U śpisie pretenzij da Polščy, ahučanym pradstaŭnikom biełaruskaha MZS, taksama «pramy ŭdzieł u vajnie na baku kijeŭskaha režymu».
Taksama pradstaŭnik MZS dadaŭ, što «ŭ Biełarusi nie pryhniatajecca nivodnaja z nacyjanalnych mienšaściaŭ, usie hramadzianie roznych nacyjanalnaściaŭ žyvuć u miry i zhodzie. Luby palak moža ŭ hetym upeŭnicca, spakojna naviedaŭšy našu krainu ŭ biaźvizavym režymie».
Što za asimietryčny adkaz budzie realizavany, Hłaz nie ŭdakładniŭ.
Z 1 červienia Polšča zakryła ruch praź biełaruska-polskuju miažu dla hruzavych aŭtamabilaŭ, ciahačoŭ, pryčepaŭ i paŭpryčepaŭ, sastavaŭ transpartnych srodkaŭ, zarehistravanych u Biełarusi i Rasii.
Taksama MUS Polščy ŭklučyła ŭ sankcyjny śpis 365 pradstaŭnikoŭ biełaruskaha režymu, a taksama 20 struktur i 16 pradprymalnikaŭ, pieravažna źviazanych z rasijskim kapitałam.
Heta reakcyja na rašeńnie prysudzić žurnalista i aktyvista polskaj mienšaści ŭ Biełarusi Andreja Pačobuta da vaśmi hadoŭ kałonii ŭzmocnienaha režymu. 26 maja Viarchoŭny sud Biełarusi razhledzieŭ apielacyju i pakinuŭ prysud u sile.
Ciapier čytajuć
Jak u halečy śpivałasia radnia Łukašenki? Małaviadomyja fakty6
Kamientary