U Biełaviežskaj puščy abmierali dub-vołat, za 20 hadoŭ jon značna padros
Padčas palavych bataničnych daśledavańniaŭ u zapaviednaj zonie na terytoryi Jaźvinskaha laśnictva supracoŭniki navukovaha adździeła Nacyjanalnaha parku «Biełaviežskaja pušča» vyjšli na dub-vołat ź ledź prykmietnaj ličbaj-numaram. Dreva vymierali, atrymałasia 629 sm u akružnaści, što ŭ dyjamietry składaje roŭna 2 mietry. Zastavałasia paraŭnać ciapierašnija pamiery z zafiksavanymi raniej.
Paśla viartańnia z ekśpiedycyi daśledčyki ŭdakładnili, što ŭ achopie stvoł hetaha vołata ŭ 1960 hodzie składaŭ 550 sm (175 sm u dyjamietry), a ŭ 2004 — kala 600 sm (bolš za 190 sm). Heta značyć, za apošnija 20 hadoŭ dub dadaŭ kala 10 sm u dyjamietry.
Pa taŭščyni hety dub nie sastupaje turystyčnaj słavutaści puščy — dubu-patryjarchu, a pa vyšyni značna jaho pieraŭzychodzić — amal na 40 mietraŭ.
Kryteryjem, pa jakim vyłučajucca drevy-vołaty ŭ Biełaviežskaj puščy, źjaŭlajecca dyjamietr stvała, vymierany na vyšyni 1,3 mietra.
Dla duba i chvoi pamiežnym pakazčykam, paśla jakoha prysvojvajuć hanarovaje zvańnie «vołat», źjaŭlajecca dyjamietr stvała bolš za 100 santymietraŭ. Dla astatnich dreŭ: lipy, jasienia, jełki, klona, asiny, viaza i alešyny — bolš za 80 sm.
Drevy, jakija rastuć u lesie, pry takim ža samym uzroście majuć značna mienšy dyjamietr u paraŭnańni z tymi, što vyraśli na adkrytaj terytoryi.
Ciapier u Biełaviežskaj puščy naličvajecca kala tysiačy dreŭ-vołataŭ i pa hetym pakazčyku hety les nie maje sabie roŭnych u Jeŭropie. U Biełaviežskaj puščy jość drevy-vołaty, jakija źjavilisia na śviet jašče da adkryćcia Amieryki.
Navukoŭcy daŭno zajmajucca vymiareńniem drevaŭ u puščy. U mižvajenny pieryjad polskija ŭłady ŭnosili bujnyja drevy Biełaviežskaj puščy ŭ śpis pomnikaŭ pryrody, jakija achoŭvalisia jak asobnyja abjekty.
U paślavajenny pieryjad na biełaruskaj častcy Biełaviežskaj puščy razam z pačatkam navukovych daśledavańniaŭ stali zajmacca taksama vymiareńniem i rehistracyjaj dreŭ-vołataŭ. U 1950—1970-ja hady hetym zajmalisia navukovyja supracoŭniki Jaŭhien Ramłaŭ i Mikałaj Śmirnoŭ. Paźniej, u 1980—1990-ja hady, hetym zajmaŭsia Alaksandr Strałkoŭ, a ŭ pačatku 2000-ch — Dźmitryj Biarnacki.
Dziakujučy nazapašanaj infarmacyi navukoŭcy majuć mahčymaść adsačyć dynamiku rostu dreŭ-vołataŭ.
Ciapier čytajuć
Žonka ahienta-kachanka Anžaliki Mielnikavaj źviazanaja z arhanizacyjaj Ruskaja madel efiektyŭnaha spakušeńnia22
Kamientary