«Čaho vam na radzimie nie chapała, nie razumieju». Biełaruska napisała pra pošuk pracy ŭ Polščy — paru kamientataraŭ paraili joj raskajacca. Zdahadajciesia, ź jakoj krainy

Biełaruska Maryna miesiac tamu raźmiaściła ŭ LinkedIn post pra pošuk pracy ŭ Polščy. Žančyna napisała, što jany z mužam viasnoj byli vymušanyja pakinuć Biełaruś, bo jana stała padazravanaj pa «narodnym» artykule 342 Kryminalnaha kodeksa («Arhanizacyja dziejańniaŭ, jakija hruba parušajuć hramadski paradak, ci aktyŭny ŭdzieł u ich»). Ciapier muž (3D-mastak) zastaŭsia biez pracy i šukaje vakansii.

Jaje post sabraŭ tysiaču repostaŭ i bolš za 400 kamientaroŭ. Bolšaść vykazvali svaju padtrymku, zyčyli ŭdačy ci pakidali parady pa rynku pracy. 

Adnak paru kamientataraŭ nie zrazumieli rašeńnie žančyny ab pierajeździe.

Adzin ź ich, Illa Kuzaŭkin, napisaŭ:

«Biełaruś heta:

— Čyścinia i paradak;

— Razumnyja ceny na žyllo i pasłuhi;

— Jakaść pasłuh na vyšyni;

— Smačnaja kuchnia;

— Prystojnyja ludzi;

— Adsutnaść etničnych AZH [arhanizavanych złačynnych hrup]!!! Vy nie ŭjaŭlajecie, jaki heta vielizarny plus u sučasnych realijach;

— Multykulturnaja supolnaść z pavahaj da kožnaj kanfiesii;

— Dastatkovy ŭzrovień transpartu;

— Kolkaść elektramabilaŭ na pieršy pohlad bolšaja, čym u Maskvie;

— Zachavany architekturny styl haradoŭ;

— Zachavanyja histaryčnyja pomniki architektury;

— Vieładarožka praz uvieś Minsk;

— Park vysokich technałohij — heta naohuł šaniec dla luboha pradprymalnika… Prosta pačytajcie ŭmovy rezidenctva.

Čaho vam tut na radzimie nie chapała i čym vy tut niezadavolenyja byli, ja nijak nie razumieju… Proćma moładzi, proćma dziaciej, ludzi vietlivyja, narmalna adzietyja…. Kramy pracujuć, pasłuhi taksama…

Nie chočacca złaradničać, ale pasprabujcie źviarnucca pa dapamohu da tych, chto vam tak abiacaŭ «svabodu i demakratyju», a taksama «dopomohu» i da kaho vy tak terminova źjechali.

Dziakuj Alaksandru Ryhoraviču Łukašenku za toje, što zachavaŭ takuju krainu, nie majučy takich resursaŭ, jak u nas u Rasii, i takoha ŭnutranaha jomistaha rynku.

Pryjazdžajem nie pieršy raz i, zrazumieła, płanujem jašče».

Pavialičyć

Druhi post u padobnym duchu pakinuŭ ajcišnik Kanstancin Kreśćiańnikaŭ.

«Na moj pohlad, lepš raskajacca i viarnucca na radzimu. U Jeŭropie vy nikomu nie patrebnyja. Advakat vam u dapamohu. Uciekačoŭ nidzie nie lubiać, asabliva žabrakoŭ.

Situacyja składanaja. Lublu Łukašenku, i Biełaruś, i biełarusaŭ.

Vulica ŭ Jeŭropie ci turma na radzimie — vy sami daviali siabie da takoj situacyi. Adnak vyjście jość, upeŭnieny. Pakolki ŭ RB karupcyja minimalnaja, to padazreńni pa 342 artykule mohuć być spraviadlivymi.

Z takim bekhraŭndam ciažka znajści pracu, imavierna. Naohuł ja vam nie vieru. 3D-mastak šukaje pracu nie ŭ Polščy ci ŭ Łondanie, a pierš za ŭsio ŭ siecivie. Chapaje prapanoŭ z zamovami, u telehram-kanałach, na sajtach i inšaje… Dy ŭrešcie možna na 3D-stokach pradavać svaje madeli.

A vy pišacie tak, što nijakaj pavahi da vas niama i być nie moža. Biehli sa svajoj krainy ŭ Jeŭropu, tam trapili ŭ prablemy, ciapier vam dapamahaj. I tut nie prablema, što vaš muž nie moža znajści pracu, što jon jaje straciŭ — a ŭ tym, što jon drenna starajecca, kab jaje znajści. Kab nie apynucca na vulicy, bo jość kuča varyjantaŭ, jak padpracavać abo zarabić sumlennym šlacham, rukami pracavać možna, a tam, hladziš, hałava spatrebicca i vychad na pasadu, jakuju chočacie — 3D-mastak. Ale heta, kali vieryć u vašu bajku. Ja voś vam nie vieru», — napisaŭ mužčyna.

Pavialičyć

Kali vieryć infarmacyi ŭ profilach, to Kreśćiańnikaŭ z Krasnadara, pracuje hrafičnym dyzajnieram na fryłansie, a Kuzaŭkin — z Maskvy, inžynier pa prajektavańni śvidravin, apošnim miescam pracy paznačana kampanija Shell.

Inšyja karystalniki ich nie padtrymali.

• 21
• 0
• 37
• 146
• 7
• 17
• 58
• 0