Biełarusam telefanujuć z rasijskich numaroŭ z sacyjałahičnymi apytańniami. Čym cikaviacca?
Čytačy paviedamili «Našaj Nivie» pra chvalu sacyjałahičnych apytańniaŭ z rasijskich numaroŭ. U biełarusaŭ, jakija ŭnutry krainy, cikaviacca staŭleńniem da vajennych dziejańniaŭ va Ukrainie i mahčymaha ŭzbrojenaha paŭstańnia ŭ Biełarusi.
Takija telefanavańni byli niekalki tydniaŭ tamu.
«Nazvalisia niejkim rasijskim sacyjałahičnym centram. Skazali, što pravodziać daśledavańnie siarod biełarusaŭ na pradmiet ich staŭleńnia da aktualnych palityčnych padziej u rehijonie. Suviaź była drennaja, i na fonie było čuvać vielmi šmat telefonnych razmoŭ — miarkuju, što na hetuju temu», — dzielicca žycharka adnaho z abłasnych centraŭ.
Biełaruska vyrašyła adkazać na pytańni, kab u inicyjataraŭ apytańnia było bolš niehatyŭnych vodhukaŭ i «kab nie dumali, što ŭ Biełarusi jość padtrymka dziejańniaŭ Rasii».
«Miarkuju, na asnovie hetych daśledavańniaŭ jany buduć vyznačać svaju palityku ŭ dačynieńni da našaj krainy».
Žančyna zapomniła i paznačyła pytańni, jakija joj zadavali. Spačatku standartna zapytali pra ŭzrost i rehijon pražyvańnia, a paśla pajšli zakrytyja pytańni z mahčymymi adkazami «tak» ci «nie» abo z prapanavanymi varyjantami adkazaŭ. Pryvodzim ich:
- Ci padtrymlivajecie vy dziejańni Rasii ŭ hetym kanflikcie?
- Chto vinavaty ŭ situacyi, jakaja skłałasia: Rasija / Ukraina / Polšča / NATA?
- Jak vy miarkujecie, ci pahražaje Litva terytaryjalnaj cełasnaści Respubliki Biełaruś?
- Ci pahražaje Polšča terytaryjalnaj cełasnaści Biełarusi?
- Ci pahražaje Rasija terytaryjalna cełasnaści Biełarusi?
- Ci daviarajecie vy miedyja Rasii?
- Ci daviarajecie vy miedyja Ukrainy?
- Ci daviarajecie vy dziaržaŭnym miedyja Biełarusi?
- Ci daviarajecie vy niezaležnym miedyja Biełarusi?
- U vypadku ŭzbrojenaha paŭstańnia biełaruskaha demakratyčnaha ruchu ci hatovyja vy dałučycca da jaho?
- Jak vy ličycie, u vypadku raptoŭnaj śmierci prezidenta Biełarusi, što stanie z krainaj? (Palepšycca ci pahoršycca situacyja)
- Ci pryjduć u takim vypadku demakratyčnyja pieramieny?
U kancy ŭ biełaruski spytali, na jakoj movie jana razmaŭlaje doma i da jakoj nacyjanalnaści naležyć.
Toje, što pravodzicca apytańnie, paćvierdzili nam jašče niekalki žycharoŭ Biełarusi. Častka pytańniaŭ supadaje z tymi, pra jakija raskazvałasia vyšej. Ale ž niekatoryja hučać inačaj:
- U składzie jakoha sajuza vy b chacieli znachodzicca? (U ES, z Rasijaj, ni z kim, stać subjektam RF)
- Ci patrebnaja mytnia Biełarusi z RF? (Tak, nie)
- Jak vy staviciesia da pracoŭnaj dziejnaści (pracy) biełarusaŭ u RF? (Dobra, drenna, chutčej dobra, chutčej drenna i da t. p.).
- U skład jakoha vajskovaha sajuza vy b chacieli ŭvachodzić? (NATA, ADKB, inšyja varyjanty).
Što za rasijskaja arhanizacyja pravodzić apytańnie, našy čytačy adkazać nie zmahli. Adny nie pamiatajuć, a inšyja kažuć, što na tym baku provadu dakładna nie nazvalisia.
«Skazali, što telefanujuć z Maskvy i robiać sacyjałahičnaje apytańnie biełarusaŭ», — zhadaŭ adzin z čytačoŭ.
Nakolki viadoma «Našaj Nivie», biełaruskija niezaležnyja inicyjatyvy, jakija taksama rehularna pravodziać sacyjałahičnyja apytańni, da hetaha apytańnia dačynieńnia nie majuć. Mahčyma, hramadskuju dumku vyvučali rasijskija dziaržaŭnyja sacyjałahičnyja ahienctvy, naprykład VCIOM.
Ciapier čytajuć
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu1515
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu15
«Ja skazaŭ na videa, što mianie nie katujuć — na toj momant heta było praŭdaj. A praź dźvie hadziny mianie źbili». Ukrainski žurnalist dva hady pravioŭ u rasijskim pałonie — voś što jon pieražyŭ11
Kamientary