Ci prosta zrabić ispanskuju vizu ŭ Minsku i na kolki jaje vydajuć

U biełaruskaj stalicy 21 červienia adnaviŭ pracu vizavy centr Ispanii. Zdavałasia, heta dadatkovy šaniec aformić šenhienskuju vizu chacia b dziela adpačynku. Uličvajučy, što zapisacca samim praktyčna nierealna, žurnalisty źviarnulisia ŭ turfirmy, to-bok, pa sutnaści, pa dapamohu dvuch pasiarednikaŭ. 

Da šaści tydniaŭ i nie bolš za miesiac

Pradstaŭnica adnoj z turfirmaŭ raspaviała, što ŭ pieršy tydzień pracy vizavy centr vyłučyŭ kala 100 miescaŭ, to-bok 20 čałaviek na dzień.

I vyśvietliłasia, što pa časie i canie atrymałasia prykładna toje ž samaje, što i padavacca praz Maskvu.

Surazmoŭnica adznačyła, što maksimalny termin, na jaki stavili dazvolny štamp, nie pieravyšaŭ troch miesiacaŭ. I čaściej afarmlajuć adnarazovyja vizy pad zapytanuju pajezdku. Admovy, viadoma, taksama byvajuć.

Jašče ŭ adnoj turystyčnaj kampanii adkazali, što dakumienty na atrymańnie ispanskaj vizy dypłamaty ciapier razhladajuć kala šaści tydniaŭ. Terminy dziejańnia vydajuć maleńkija, u asnoŭnym na 30 dzion. Tut taksama paćvierdzili, što admovy zdarajucca.

Sami pasłuhi pa zapisie i padrychtoŭcy dakumientaŭ kaštujuć 550 rubloŭ.

Takuju ž canu i pieryjad afarmleńnia ad troch da šaści tydniaŭ u pierapiscy paznačyła treciaja turfirma. Praŭda, u hetym vypadku pakazali i inšyja vydatki: konsulski zbor 35 jeŭra, a jašče servisny i łahistyčny — 45 i 80 rubloŭ adpaviedna. Ale pry hetym nazvali mahčymy varyjant zapisu na kaniec lipienia, što pa ciapierašnich časach zdajecca nievierahodnym.

Jašče ŭ adnoj firmie prapanavali minimalny ceńnik na pasłuhi — 300 rubloŭ, ale pakazali na nieabchodnaść apłacić zbor 50 jeŭra i strachoŭku na čas znachodžańnia ŭ inšaj krainie. Praŭda, tut zapis byŭ mahčymy tolki na kaniec žniŭnia abo pačatak vieraśnia. Taksama stała vidavočna, što čaściej za ŭsio ispanskuju vizu vydajuć na miesiac.

Hetym letam Ispanija ŭžo nie śviecić

Hałoŭnaja vysnova adna: kali pačynać rabić ciapier, adpačyć letam 2023 hoda ŭ Jeŭropie pa ispanskaj vizie nie atrymajecca, pakolki razhlad dakumientaŭ moža zajmać 45 dzion.

Peŭnuju błytaninu i sumnievy stvarajuć nieadnolkavyja ceny i vidy pasłuh, jakija nazyvajuć turfirmy.

Samaje cikavaje, što pašparty, zdadzienyja ŭ ispanski vizavy centr u Minsku, usio roŭna viazuć u maskoŭskaje dyppradstaŭnictva. I kali rabić naŭprost, to viarnuć ich mohuć chutčej. 

Da taho ž dadatkovyja niuansy paŭstali paśla źmieny sajta dla rehistracyi: zapisacca na pryjom u stalicy Rasii možna tolki ź miascovaha IP i numara telefona, to-bok tak ci inakš pryjdziecca zadziejničać pasiarednikaŭ — turfirmu abo svajakoŭ i siabroŭ.

Dzie ŭ Minsku atrymać doŭhaterminovuju šenhienskuju vizu

Niekalki krynic, źviazanych z turystyčnaj śfieraj, paćvierdzili, što samym «adkrytym» zastajecca pasolstva Italii. Praŭda, miescy, jakija prapanujucca ŭ ahulnym dostupie na sajcie, raźbirajuć vielmi chutka.

Adna sa śpiecyjalistak nazvała nadziejniejšym varyjantam afarmleńnie italjanskaj vizy pa zaprašeńni svajakoŭ abo siabroŭ, jakija lehalna pražyvajuć na Apieninach.

• 3
• 0
• 0
• 0
• 0
• 8
• 0
• 0