Dziaŭčyna zaŭvažyła kamieru nazirańnia ŭ prymieračnaj kramy Sinsay. Voś što adkazała dyrektarka
Dniami zdaryŭsia novy kanflikt, źviazany z kamierami videanazirańnia ŭ niečakanych miescach. Hetym razam sumnievy ŭ dziaŭčyny vyklikała prymieračnaja kramy Sinsay ŭ HC «Karona» ŭ Minsku, piša Onliner.by.
Aburanaja dziaŭčyna dasłała niekalki fota, dzie ŭ prymieračnaj sapraŭdy možna zaŭvažyć kamieru videanazirańnia. U toj dzień žadańnie praciahvać šopinh u Vieraniki rezka źnikła.
«A ja ž prymiarała nižniuju bializnu», — aburajecca dziaŭčyna. Razmova z supracoŭnikam jasnaści nie dadała. Pa słovach klijentki, pradaviec prosta pacisnuła plačyma.
Raniej juryst padrabiazna tłumačyŭ praviły vykarystańnia kamier videanazirańnia ŭ handlovych centrach.
Kali koratka, to ŭ prymieračnych im dakładna nie miesca.
— Nie dapuskajecca vykarystańnie videanazirańnia ŭ miescach, jakija źjaŭlajucca častkaj asabistaha (pryvatnaha) žyćcia hramadzian. Tak, pa ahulnych praviłach videanazirańnie niedapuščalna ŭ bytavych i santechničnych pamiaškańniach (u tualetnych pakojach, dušavych, raździavałkach, prymieračnych kabinkach i h. d.), bo hetyja pamiaškańni — nie hramadskija miescy. Ci mohuć asobnyja arhanizacyi ihnaravać praviły i ŭsio ž padhladvać za pakupnikami?
Pa kamientar žurnalisty źviarnulisia ŭ samu kramu Sinsay na Kalvaryjskaj.
Dyrektarka patłumačyła, što kamiera ŭ prymieračnaj prysutničaje, heta nie mulaž, ale jana zdymaje vyklučna kalidor. Toje, što adbyvajecca za zakrytaj štorkaj, zastajecca tajamnicaj dla supracoŭnikaŭ.
— Možacie ŭjavić sabie ŭvachod u prymieračnuju: paabapał iduć kabinki, a pamiž imi svabodnaja prastora. Naša kamiera zdymaje vyklučna ludziej u kalidory, heta nie šyrokafarmatnaja kamiera, jakaja maje ahlad na 360 hradusaŭ. Kali štorka adkrytaja, viadoma, na kamiery budzie vidać, jak čałaviek apranajecca. Ale zakrytaja štorka całkam abaraniaje pakupnika ad starońnich. Heta pieršy zvarot nakont kamiery videanazirańnia ŭ hetaj kramie, padkreśliła dyrektarka.
Ciapier čytajuć
Źjaviłasia jašče adno FOTA Mikoły Statkieviča paśla vyzvaleńnia2
Kamientary