Rasijskaja śpiavačka Niatrebka sudzicca z hałoŭnaj opieraj ZŠA z-za Pucina i vajny

Rasijskaja opiernaja śpiavačka Hanna Niatrebka padała ŭ sud na hałoŭnuju opiernuju kampaniju ZŠA «Mietrapoliten-opiera», jakaja razarvała ź joj adnosiny z-za admovy asudzić Uładzimira Pucina za vajnu va Ukrainie, piša Bi-bi-si.

Niatrebka, jakaja vystupała davieranaj asobaj Pucina na prezidenckich vybarach u Rasii i padtrymlivała prarasijskich sieparatystaŭ va ŭkrainskim Danbasie, patrabuje vypłacić joj 360 tysiač dalaraŭ kampiensacyi za maralnuju i finansavuju škodu.

Niatrebka ŭžo atrymała 200 tysiač ad «Mietrapoliten-opiery» za admienu 13 vystupaŭ, zapłanavanych, ale admienienych paśla ŭvarvańnia. Tuju skarhu razhladaŭ arbitraž pa prafsajuznaj linii, a ciapier Niatrebka padała ŭžo pazoŭ u Akruhovy sud Manchetena.

Niatrebka śćviardžaje, što razryŭ paśla 20 hadoŭ vystupaŭ na scenie «Mietrapaliten-opiery» ŭ ńju-jorkskim Linkaln-centry naškodziŭ staŭleńniu publiki da jaje i vyklikaŭ pratesty suprać jaje vystupaŭ na Zachadzie.

Adna z hałoŭnych suśvietnych saprana Niatrebka daŭno žyvie ŭ Aŭstryi. Paśla pačatku vajny jaje vystupy ŭ Jeŭropie stali redkija, a tyja, što zdarajucca, časta supravadžajucca skandałami.

Uviesnu jana źjaviłasia na scenie fiestyvalu ŭ niamieckim Visbadenie, z-za čaho tudy admovilisia pryjazdžać muzyki Nacyjanalnaj opiery Ukrainy i artysty Charkaŭskaha dramatyčnaha teatra imia Tarasa Šaŭčenki. Zamiest ich arhanizatary sprabavali zaprasić rasijski rok-hurt Pussy Riot, ale i jaje ŭdzielniki ŭ vyniku admovilisia.

Zapłanavany na kastryčnik kancert Niatrebki ŭ Prazie taksama staŭ pradmietam burnych sprečak, vynik jakich pakul niajasny.

Niatrebka śpiavała ŭ červieni ŭ Italii i značycca na afišach vystupleńniaŭ u Bierlinie, Vienie, Miłanie, Paryžy i Buenas-Ajresie.

Paśla pretenzij z boku «Mietrapoliten-opiery» Niatrebka ŭ vyniku asudziła vajnu — praź miesiac paśla ŭvarvańnia. Adnak admoviłasia krytykavać asabista Pucina, na jakoha Mižnarodny kryminalny sud vypisaŭ ordar na aryšt pa abvinavačvańni ŭ vajennych złačynstvach va Ukrainie.

Antyvajenny dopis Niatrebki vyklikaŭ abureńnie ŭ Rasii. Śpikier rasijskaj Dziarždumy Viačasłaŭ Vałodzin nazvaŭ jaho zdradaj i dadaŭ: «Hołas jość, a sumleńnia niama».

U pazovie suprać «Mietrapoliten-opiery» śpiavačka śćviardžaje, što ŭ vyniku pazbaviłasia dachodaŭ u tym liku i ŭ Rasii.

Jana patrabuje kampiensacyi nie tolki stračanych dachodaŭ, ale i maralnaj škody.

«Niatrebka adčuvaje ciažkija dušeŭnyja pakuty i pieražyvaje emacyjny razład uklučajučy, aproč inšaha, depresiju, prynižeńnie, źbiantežanaść, stres i tryvohu», — cytuje jaje pazoŭ hazieta Washington Post.

«Mietrapoliten-opiera» ŭ adkaz koratka zajaviła, što pazoŭ Niatrebki «nie maje pad saboj padstaŭ».

• 6
• 0
• 51
• 4
• 5
• 1
• 14
• 0