Suśvietny bank zaćvierdziŭ vydzialeńnie Biełarusi pazyki na mety raźvićcia ŭ 200 młn. dalaraŭ ZŠA.
Rada vykanaŭčych dyrektaraŭ Suśvietnaha banka zaćvierdziła vydzialeńnie Biełarusi pazyki na mety raźvićcia (PMR) u 200 młn. dalaraŭ ZŠA na padtrymku ekanamičnaj prahramy ŭrada, skiravanaj na ŭstaranieńnie sacyjalnych nastupstvaŭ kryzisu i pahłybleńnie strukturnych reformaŭ, jakija zabiaśpiečvajuć asnovu dla adnaŭleńnia ŭstojlivaha ekanamičnaha rostu.
Jak paviedamili ŭ pradstaŭnictvie Suśvietnaha banka (SB), hetaja adnatranšavaja pazyka vydzialajecca terminam na 16 hadoŭ i praduhledžvaje adterminoŭku pačatku pahašeńnia na šeść hadoŭ.
Rada dyrektaraŭ abmierkavała PMR u kantekście pramiežkavaha ahladu chodu realizacyi Stratehii supracoŭnictva SB z Respublikaj Biełaruś (2008—2011 hady). Suśvietny bank pašyryŭ śfieru i pamiery svajoj finansavaj dapamohi, zapłanavanyja ŭ miežach stratehii, i ŭklučyŭ u jaje «padtrymku biudžetu pry dapamozie PMR, kab pakazać značnyja źmieny źniešniaj kanjunktury i paskareńnie strukturnych pieraŭtvareńniaŭ u Biełarusi».
«Da hetaha času Biełaruśsiu nazapašany stanoŭčy vopyt realizacyi prajektaŭ z Hrupaj Suśvietnaha banka.
Dla Suśvietnaha banka adkryłasia akno mahčymaści padtrymać pahłybleńnie strukturnych reformaŭ u Biełarusi, — skazaŭ dyrektar adździeła Biełarusi, Małdovy i Ukrainy SB Marcin Rajzier. — My spadziajemsia, što damoŭlenaść, dasiahnutaja z uładami Biełarusi, taksama pasłužyć sihnałam dla pryvatnych inviestaraŭ ab tym, što Biełaruś stanovicca bolš adkrytaj».
Pazyka na mety raźvićcia padtrymlivaje prahramu reformaŭ, zhrupavanych pa dźviuch kirunkach. Pieršy ź ich aryjentavany na ŭmacavańnie prahram sacyjalnaj dapamohi za košt uzmacnieńnia ich adrasnaj skiravanaści na biednyja słai nasielnictva, jakija mohuć bolš za ŭsio paciarpieć ad upłyvu hłabalnaha ekanamičnaha i finansavaha kryzisu na ekanomiku Biełarusi. Druhi — padtrymlivaje prahramu ŭrada pa libieralizacyi dla stymulavańnia inviestycyj i stvareńnia pracoŭnych miescaŭ. Havorka idzie ŭ tym liku pra takija miery, jak ukaz ab udaskanaleńni kantrolnaj dziejnaści, jaki dazvolić značna ablehčyć nahruzku dla pradpryjemstvaŭ; libieralizacyja cen (uklučajučy admienu abmiežavańniaŭ handlovych nadbavak u adnosinach da bolšaści vidaŭ pradukcyi); pastupovaja admiena abarotnych padatkaŭ i padrychtoŭka zakanadaŭčaj bazy dla pačatku pracesu pryvatyzacyi.
Staršy ekanamist SB i kiraŭnik hrupy śpiecyjalistaŭ pa padrychtoŭcy pazyki na mety raźvićcia Pabła Saaviedra adznačyŭ: «Apošnimi hadami Biełaruś skaraciła abmiežavańni dla biźniesu, i ŭ ramkach zhadanaj apieracyi padtrymlivajucca dalejšyja zachady ŭ halinie libieralizacyi cen, skaračeńni rehulavańnia i padatkovaj palityki. Kryzis nie tolki ŭzmacniŭ aktualnaść hetych reform, ale i padkreśliŭ nieabchodnaść pahłybić reformy dla zabieśpiačeńnia adnaŭleńnia ŭstojlivaha rostu».
***
Biełaruś stała členam Suśvietnaha banka ŭ 1992 hodzie. Za hety čas krainie było vydzielena 643 młn. dalaraŭ ZŠA na realizacyju dzieviaci prajektaŭ; prykładna 30 nacyjanalnych prahram atrymali hrantavuju padtrymku na ahulnuju sumu 18 młn. dalaraŭ ZŠA. Zaraz Biełaruś vykarystoŭvaje srodki Suśvietnaha banka dla finansavańnia čatyroch prajektaŭ pa raźvićci infrastruktury.
Kamientary