«U pieršuju čarhu na rašeńnie paŭpłyvaŭ napłyŭ haściej». Minsielhascharč aryhinalna patłumačyŭ abmiežavańni na ekspart kuraciny
U Minsielhascharčy paćvierdzili, što z 1 žniŭnia ŭviali abmiežavańni na ekspart miasa ptuški. Pra heta siońnia skazaŭ namieśnik ministra sielskaj haspadarki i charčavańnia — dyrektar Departamienta vieterynarnaha i charčovaha nahladu Minsielhascharča Ivan Śmilhiń, pieradaje BiełTA.
«Z 1 žniŭnia sapraŭdy byli ŭviedzieny časovyja abmiežavańni na ekspart miasa ptuški ź Biełarusi ŭ cełym na źniešnija rynki», — skazaŭ čynoŭnik.
Pavodle jaho słoŭ, u pieršuju čarhu heta było źviazana ź nieabchodnaściu zabiaśpiečyć žycharoŭ Biełarusi i jaje haściej u ramkach II Hulniaŭ krain SND. Śmilhiń dadaŭ, što taksama ŭličvaŭsia cenavy faktar na źniešnich rynkach i žadańnie biełaruskich vytvorcaŭ vyvieźci bolš pradukcyi za miažu.
«Ale ŭ pieršuju čarhu na rašeńnie paŭpłyvaŭ napłyŭ haściej», — adznačyŭ namieśnik ministra sielskaj haspadarki i charčavańnia.
Z troch biełaruskich ptuškafabryk, praŭda, hetyja abmiežavańni, maŭlaŭ, užo źniatyja, heta tyčycca indyčyny i miasa kački. Što da astatnich, to «zabarona na ekspart moža być źniataja navat na hetym tydni».
Namieśnik ministra adznačyŭ, što hałoŭnaje — atrymać ad biełaruskich vytvorcaŭ harantyju, što jany zmohuć zabiaśpiečyć pad poŭnyja patreby ŭ kuracinie ajčynnyja handlovyja sietki.
Śmilhiń skazaŭ, što siońnia, 7 žniŭnia, prajšli kansultacyi pa nazvanaj tematycy z Raśsielhasnahladam, udakładniŭšy, što jość poŭnaje parazumieńnie. Pry hetym jon zapeŭniŭ, što ŭ Biełarusi, maŭlaŭ, niama nijakich prablem z ptušynymi zachvorvańniami — «ni z vysokapatahiennym ptušynym hrypam, ni z chvarobaj Ńjukasła».
Śpiavak Dźmitryj Kałdun pakazaŭ svaju minskuju kvateru niedaloka ad Drazdoŭ ŠMAT FOTA15
Kamientary