Ministerstva achovy zdaroŭja zabaraniaje ŭvoz u Biełaruś, realizacyju, zachoŭvańnie, transparciroŭku i vykarystańnie charčovaj pradukcyi, jakaja źmiaščaje muchamory. Pastanova pryniataja 16 žniŭnia namieśnikam ministra achovy zdaroŭja — hałoŭnym dziaržaŭnym sanitarnym doktaram Biełarusi, zaŭvažyŭ Reform.by.
Zhodna z dakumientam, jurydyčnyja asoby i indyvidualnyja pradprymalniki, jakija pradajuć pradukcyju z muchamorami, abaviazany nie dapuścić abarotu hetaj pradukcyi na terytoryi krainy z momantu ŭstupleńnia pastanovy ŭ siłu, a taksama zabiaśpiečyć viartańnie takoj pradukcyi vytvorcu albo jaje ŭtylizacyju.
Zachady zroblenyja ŭ suviazi z prodažam u internecie charčovych dabavak, jakija źmiaščajuć muchamory. Ministerstva achovy zdaroŭja źviartaje ŭvahu, što dokazaŭ stanoŭčaha ŭpłyvu hetych hryboŭ na zdaroŭje niama.
«Na siońniašni dzień niama nivodnaha navukovaha dokazu ab stanoŭčym upłyvie muchamoraŭ, uklučajučy mikradozy, na arhanizm čałavieka», — zajaŭlaje Ministerstva.
Ministerstva achovy zdaroŭja papiaredžvaje, što rečyvy ŭ muchamorach viaduć da źjaŭleńnia źmianieńnia stanu śviadomaści, pry praciahłym užyvańni muchamoraŭ mahčymyja prablemy z sercam i dychańniem.
Miedyki źviartajuć uvahu, što apošnim časam pačaścilisia vypadki atručvańnia muchamorami. Jany źviazany z «naŭmysnym užyvańniem hałoŭnym čynam asobami maładoha ŭzrostu ŭ syrym i sušanym vyhladzie, a taksama ŭ vyniku vypadkovaha ŭžyvańnia ŭ vyhladzie nastojki».
Kamientary