Rabotniki kultury i adukacyi Haradoččyny razmalavali prypynki da Dnia biełaruskaha piśmienstva. I ŭzialisia za damy
U Haradku viadziecca padrychtoŭka da Dnia biełaruskaha piśmienstva, jaki maje adbycca 2-3 vieraśnia. Da hetaj daty ŭ rajcentry na Viciebščynie pravodzicca dobraŭparadkavańnie. Z rabotnikaŭ ustanoŭ kultury, adukacyi, sportu i turyzmu stvaryli admysłovuju tvorčuju hrupu dla afarmleńnia transpartnych prypynkaŭ pa maršrucie Haradok — Astraŭlany. Hetaja vioska — małaja radzima Kanstancina Vieranicyna, aŭtara viadomaj paemy «Taras na Parnasie».
Padčas płanavańnia prahramy Dnia biełaruskaha piśmienstva viałasia razmova i pra ŭstaloŭku pomnika Kanstancinu Vieranicynu ŭ Astraŭlanach, ale ideja akazałasia vielmi zatratnaj i składanaj dla vykanańnia.
Było vyrašana abmiežavacca infarmacyjnym ščytom, dzie raźmieściać fakty bijahrafii litaratara i źviestki pra jahonuju paemu. I razmalavać aŭtobusnyja prypynki pa darozie na viosku.
Skončyŭšy pracu na prypynkach, tvorčaja hrupa rabotnikaŭ kultury i adukacyi ŭziałasia za «stvareńnie murałaŭ z cytatami biełaruskich kłasikaŭ» — tak hučna ichny vid dziejnaści nazvali miascovyja čynoŭniki.
Takich malunkaŭ na ścienach zapłanavana zrabić kala dziasiatka.
Što jašče da vizualnaha afarmleńnia śviatkavańniaŭ, to ŭžo anansavana, što vyjavy i cytaty piśmieńnikaŭ naniasuć na vahony adnaho z dyziel-ciahnikoŭ «Viciebsk-Jeziaryšča», jaki prachodzić cieraz Haradok. Eskizy vyjavaŭ užo hatovyja, ale kamu daručać rabić malunki, pakul nie paviedamlajecca.
Ina Kulej: Milinkievič pieramoh śmierć, ale šlach da poŭnaha adužańnia niablizki4
Kamientary